2 Crónicas 6 - Biblia Dc en Mixe de Quetzaltepec

Ma ja Salomón tnixëëwtunyën ja tsajptëjk

¹ Ënet ja Salomón y'ënäny: Mijts Wintsën jëtu'un m'ëna'any ko akootstuuy mtsëënë.

² E tyam tëë tu'uk ja mtsajptëjk nkojyës, ma mtsëënëtyën ets ma m'itëtyën xëmë.

³ Tä ja yajkutujkpë t'ijxy ja mayjyä'äy ets ojts tkënu'kxy

⁴ jëtu'un y'ënäny: Kënu'kxy mëjjawë ja Wintsën ja xyëëw y'itëty mëti'ipë ja Israel ja'ayëty Tyios'ajtëpën, jä'ä ko tëë tjanty tyukniwä'äky ja y'aaw y'ayuk tä ojts ja nteetyës David tukwinwanën, ko t'ënëmaay.

⁵ Maju'unëmës yë Israel kajpn jap njuutyën Egiptë, nimaajës ënety yë naax kajpn të nkawin'ixynyëm ma Israel ja'ayëtyën ets jam yajkojëty tu'uk yë tsajptëjk maas ja nxëëw yajmëjjawëtyën, näy kajnëmës ënety pën tu'uk ja'ay nwin'ixynyëm mëti'ipës ja naax nkajpn, Israel kajpn tyu'uwinye'eyëpën,

⁶ e ëjts ojtsës nwin'ixy yë Jerusalén ets jam yajmëjjawëty yë nxëëwës ets nwin'ijyxës yë ntuunpës David ets yë'ë tu'uwinye'eyëty yë naax nkajpnës.

⁷ E yë nteetyës David ojts tjaniwinmayë tjakojany yë Wintsën yë tyëjk, mëti'ipë yë Israel ja'ayëty y'ëwtajtëpën.

⁸ E yë Wintsën jëtu'un y'ëtsooy: Oy jëtu'un ko xyjyamay xyjyatajy xyjyakoja'any yë ntëjkës;

⁹ je'eyëp ko ka'ap myijtsëty xykyojëty, yë'ë nëjkx tkojy yë mmaank mëti'ipë juuky'ataanpën.

¹⁰ E tëë jëtu'un ja Wintsën ja y'aaw y'ayuk tjanty tyukniwä'äky. Jëtu'un ijxtëm y'ënänyën, tëë ja nteetyës David yë nyaax kyajpn yajwin'ixy ets tëëjës jam nja'ty ma ijty yë'ë yajkutukyën; ma ja Israel ja'ayëty ja kyutujktaknëty tmëët'atën ets ënät të njanty kyojyës ja Wintsën ja jyëën tyëjk, mëti'ipë ja Israel ja'ayëty y'ëwtajtëpën.

¹¹ Jap tsajptëkoty tëëjës jap mpëjktä'äky ja Wintsën ja kyaaxë, mëti'ipë myë'ijtypyën ja käjpxytyu'unën, mëti'ipë yë Wintsën tyuunën mëët yë Israel ja'ayëty.

¹² Ënet ja Salomón wya'ak'o'oyëy jam winkon ma ja Wintsën ja wyintsë'këntyaknën, tam ënety ja mayjyä'äy të nyiye'eypyätë ets ojts xyajwä'kxy.

¹³ Jam kyëxwä'ky ma ënety të yajni''ixën këjxm, tsuxkpujxn mëët yaj'oytyuuny, tu'kxajpk ja tu'kkë'ënux y'ayenyëty, tu'kxajpk ja tu'kkë'ënux myëjwiinëty ets tëkëëk kë'ënux kyëjxmëty, mëti'ipë ënety tëkot'itkujky të yajkojyën. Jamts nyäkyoxtënaaytyakë, tam ënety ja mayjyä'äy yajpaaty tu'kmukyë ets txajë'ky ja kyë'ë mäjtskëty, tsajpkëjxm tyujkxajy,

¹⁴ ets y'ënäny: Wintsën, Dios teety, mëti'ipë yë Israel ja'ayëty y'ëwtajtëpën: Ka'ap jam tsajpwinm ets naaxwiiny ma jëtu'umpë Wintsën myëjëty tä mijtsën, jä'ä ko mijts tëë ja m'ayuk xytyukniwä'äky ijxtëm m'ënanyën ets m'oyjya'ap mtsujja'ap ja mëti'ipë winë aaw winëjot mëtuunëpën;

¹⁵ mijts tëë xypyatuny ja m'aaw m'ayuk ijxtëm ja nteetyës David ojts xytyukwinwanën, jëtu'un'äämpy ja aaw ayuk tyam y'atëy mëët ja tu'unën kajpxën.

¹⁶ E tyam ënät npëjktsoy, Wintsën mëti'ipë Israel ja'ayëty Tyios'ajtëpën; mtukniwa'akëp ja m'aaw m'ayuk ko xy'ënëmaay ja nteetyës David: Ko nän yë'ë ma'any ja y'u'unk y'ëna'k myëwë'ëmtëp ja kutujktakn mëti'ipë ënety mëtoopën ets mëti'ipë pyatuumpyën ja m'ënä'ämën mtëyajtën jëtu'un ijxtëm yë'ë tpatuunyën.

¹⁷ E jëtu'unts y'itëty Wintsën, mëti'ipë Tyios'ajtëpën yë Israel ja'ayëty ets y'atëwëty ja m'aaw m'ayuk mëti'ipë mtukwinwa'anëyën ja nteetyës David.

¹⁸ E kë'ëmtsës yam näyyajtëyë, ko yë Wintsën ¿wä'än jëtää tjëkyepy y'ijtmukëty mëët yë naaxwiinyëtë ja'ayë? Yajnija'ap ko tsajp ets poj yoots ka'ap myëtä'äky mëët yë'ë, e tyam ¿wä'än jëtääjën ënät jap m'ëk'itaanpëtyë ma tu'uk ja tëjkën mëti'ipë mijts të mjayajtuknikojënë?

¹⁹ E oy ka'ap tii t'ëktsowëty mëti'ipë yam mijts mjayajmoopyën, tyam n'amëtoy npëjktsoy mijts Wintsën, mëti'ipës nTios'ajtypyën ets xymyëtoow'itëty ja nu'ktxtakënës; mëtoow'it ya'atë ja aaw ayuk mëti'ipë yam ya'atë mtuunpë mtukmëtoowëpën.

²⁰ Këtii xy'ëxmatsëty ya'atë mjëën mtëjk xëëny koots, ma të m'ëna'anyën ko m'ita'any jap xëmë. Mëtoow'it ya'atë jëëytyak nu'kxtakën mëti'ipë ya'atë mtuunpë yam yajnajxypyën.

²¹ Mëtoow'itëp ets mkupëkëp ja jyiiytyak nyu'kxtakën ya'atë mtuunpë ets ya'atë mnaax mkajpn ets m'u'unk m'ëna'k ko yaa myintëty. Mëtoow'ijtëk ëëts jam tsajpjotm ma m'ity mtsëënën ets pokymyä'kxtëk ëëtsëty.

²² Ko ënety pën tii ja myëku'uk të tukmëtuuntëkoy ets t'atsip'aty ets yë'ë tukajpxpätëty ja Wintsën ja xyëëw yaa ma wintsë'këntyaknën mëti'ipë yajpatpën ma ya'atë tsajptëjkën.

²³ Mijts mëtoow'itëp jam tsajpjotm ets tun ja mtuunk ets nipaye'ey ja mtuunpë. Mijts mtëytyunëp ja tuuntëkoopyë kajpxtëkoopyë ets kë'ëm ëxëëk tmëjatëty ko ënety ëxëëk y'ëti'itsy y'ënä'äny ets mijts näjyëtu'un mnipaye'eyëp ja ja'ay mëti'ipë nanëkookyëjxm yajtëytyuunpën.

²⁴ Ko ënety ja myëtsip të myëmëtä'äkyë ya'atë ja mnaax mkajpn mëët ko të pyokytyuntë ets jatëkok jyotwinpitëty, tmëjpëjkta'aktëty ja mxëëw ets myintëty yaa ma mtsajptëjkën jëëytyak nu'kxtakpë,

²⁵ mijts mtunëp yë mëyajtën mëtoow'itëp jam tsajpjotm, mmä'kx myajnitëkoyëp ja nyëë pyokyëty ets xytyukpaatëty jatëkok ja nyaax kyajpnëty mëti'ipë mooyën yë'ëjëty ets ja tyeety y'apëty.

²⁶ Ko ënety ja naaxwiinyëtë yajpatnë aanë'ëk tëëtsë'ëk, mëët ko ja mnaax mkajpn të mëtëkoyë ets myintëty yaa ma mjëën mtëjkën jëëytyak nu'kxtakpë ets tmëjpëjkta'aktëty jatëkok ja mxëëw ets jyotwinpitëty ko ënety xytyukkumëtoy ja pyoky,

²⁷ tun mëyajtën mëtoow'itëp ja jyiiytyak nyu'kxtakënëty ets mä'kxëp ja nyëë pyokyëty, ma ënety të tyëkoytyën ja mtuunpë ets ja mnaax mkajpn ets xytyukni''ixëty mëti'ipë tu'u mëpaat tye'eytyën. E jëtu'unts xykyäxëty ënät ja mtuu ma ja mnaax mkajpnën mëti'ipë ja m'u'unk m'ëna'k të xytyukkumayën.

²⁸ Ko ënety jyam'aty ja yuu xëëw ma ja naax kajpnën, ëkë jyam'aty ja pa'am ëyo'on, ëkë y'aanë'k tyëëtsë'knëty ja naaxwiinyëtë; ëkë jyam'ajtnëty ja yuu pa'am, ëkë ja jëyujk mëti'ipë ja aay ujts yajwintëkoopyën, ëkë tsu'tspë nä'ämpë jam y'ijnëty; ëkë ko ja mëtsip ja naax kajpn tyajnatujknëty, ëkë oynatii ëyo'on natii jotmay myinëty kyëtaknëty,

^29-30 mëtoow'it tëkokyë ja jëëytyak nu'kxtakën mëti'ipë tyuuntëpën ja ja'ay, mëti'ipë tyuuntëpën tëkokyë ja Israel kajpn ko ënety t'ixtë mëj këjää ja ëyo'on jotmay. Ko ja kyë'ë txajë'ëktëty ets tnajtsxajëtëty ma mjëën mtëjkën. Mëtoow'it jam tsajpjotm ma myajpaatyën ets pokymyä'kx; mo'o nitu'ukjaty ja ja'ay ijxtëm pyäätyën, jä'ä ko mijts wa'ats xynyijawë wi'ixjaty nitu'ukjaty yë ja'ay ja jot wyinma'anyën.

³¹ Jëtu'un nëjkx mëjpëjktä'äkyë ets mtukxoontä'äkyë yaa naaxwiiny naaxkëjxy ma xymyooyën ja nyaax kyajpnëty ëëts ja n'ap n'okëty.

³² Oy yë'ëjëty jaaypyaat jaaypyo'kxy, mëti'ipë ka'ap kyunaax kyukajpnëtyën ma ja mnaax mkajpnën, je'eyëp ko mëët yë'ë ko tmëtoy'äty ko mijts mëj ets mëtoopy ja kajpxtakën ets myintëty yaa ma ya'atë tsajptëjkën ëkë muum jëkäm mnitsoonëtëty,

³³ mijts mëtoow'itëp jam tsajpjotm, ma mtsëënën. Mo'ojëp tukë'ëyë mëti'ipë y'amëtoowtëpën, jëtu'un tëkokyë ja naax kajpn nijawëtëty ets mkënu'kxyjyawëtëty jëtu'un tä Israel ja'ayëtyën ets tja'akyukëtëty ko mxëëw yaa yaj'ëwtaty ma ya'atë tsajptëjkën mëti'ipës të nkojyën.

³⁴ Ko ënety ja mnaax mkajpn tsyoony tsiptuunpë ëkë muum nyijkxy ma xykyexyën, pën m'ëwtajtëp jëyëjp ma ya'atë ja naax kajpnën mëti'ipë të xywyin'ixyën ets ma ya'atë ja tsajptëjkën mëti'ipë të ntuknikojën,

³⁵ mijts mëtoow'ijtëp jam tsajpjotm mëti'ipë y'amëtoow pyëjktsoowtëpën ets mëti'ipë nyijëëytyak nyinu'kxtaktëpën ets kuwa'an nixaj näjyëtu'un.

³⁶ Ko ënety muum tii tëkatsy tuntë ëkë y'ëëwtëkoy kyajpxtëkoytyë, jä'ä ko aak pokytyuunpë ja'ay ëëts yaa nyajpaatë ets ënety xytyukjoot'anpëky ets xykyë'ëyakëty ma ja myëtsipëtyën ets yajnëjkxëtëty ja myëtsiptëjk wiink naax wiink kajpn muum jëkäm ëkë muum winkon,

³⁷ e jamts ma ënety yajpaatën tsumy matsy wiink naax wiink kajpn ets jam jatëkok jyotwinpitëty ets mijts mënu'kxta'akëtëty ets xypyokymyä'kxëty mëët ma të tyuuntëkoy të kyajpxtëkoytyën,

³⁸ ets y'ëna'antëty ko jatëkok tyaj'oyëja'antë ja jyot wyinma'anyëty winë aaw winëjot, ma ënety jam jëtu'un yajpaatën wiink naax wiink kajpn ets mëkajpxëtëty, myintëty yaatsow ma ja mjëën mtëjkën, ma ja naax kajpnën mëti'ipë mmooyën ja tyeety y'apëty, mëti'ipë mijts mwin'ijxën;

³⁹ mijts mëtoow'ijtëp ja y'ëëwtak kyajpxtakënëty ets jyiiytyak nyu'kxtakënëty jam tsajpjotm ma myajpaatyën, paye'ey ja nyëë pyokyëty, nikajpxtu'ut ets mä'kxëp ma ënety të mëtëkoyëtën.

⁴⁰ E mijts Wintsën, mëti'ipës n'ëwtajtëpën, mëtoow'itëp ja n'aaw n'ayukëtyës mëti'ipë yaa yajyajkpën ma mjëën mtëjkën.

⁴¹ Mëj mijts m'itëty Wintsën, mëët ja mkaaxë mëti'ipë myëët'ajtypyën ja mëj'ajtën, ets min ma ja mtsajptëjkën ets mpo'kxëty. Ja mtuunpëtëjkëty, ja teetytyëjkëty, wä'än tnikajpx tnimëtya'aktë mijts ja mnitsokën ets ja mëti'ipëjaty mëtuunëpën wä'än tukxoonta'aktë ko oy tsuj jyuuky'atë.

⁴² Mijts Wintsën, këtii xy'ëxmatsëty ja m'u'unk maay mëti'ipë të xypyëjktä'äkyën ets ja mnaax mkajpn tu'uwinye'eyëty. Mja'amyätsëp wi'ix ojts mëk xytsyoky xyjyawën ja David, mëti'ipë mëtuunën.