2 Crónicas 35 - Biblia Dc en Mixe de Quetzaltepec

Ma ja Josías tnixëëwtunyën ja ëmaayxyëëw

¹ Josías ojts tnixëëwtuny ja ëmaayxyëëw jam Jerusalén, mëti'ipë tyukmëjja'awëyën ja Wintsën: ma myajkmajkts anyën ja mëtu'uk po'opë, jää ojts tyäky ja kupixyny mëti'ipë ja Wintsën yajtukwintsë'këyën.

² Tääts tmooytyääy ja teetyëjk ja tyuunkëty ets tjomëkwinkajpxëy ets akujk jotkujk tyuntëty ma ja tsajptëjkën.

³ E ja Leví ja'ayëty mëti'ipë yaj'ijxpëjktëpën ojts ya'atë aaw ayuk tmo'oy: Pëjkta'aktë yë Wintsën yë kyaaxë jap tsajptëkoty, ma ja tsajptëjkën mëti'ipë Salomón kyojën, David yë myaank, mëti'ipë yajkutujkën jam Israel. Këtiipë nëkoo kejkyijxy xy'ëkëëyjyëtijnëtëty, tyam yi'iyë yë Wintsën ëmuumtu'ukjot mmëtuntë ets nyaax kyajpn.

⁴ Je'eyëp ko yajxon nätyukniwitsëtë wi'ix mëpaat mtuntën tu'kjëëky tu'kmëku'uk, jëtu'un tä ja David ets myaank Salomón ojts kuja'ay tyajwë'ëmtën ko yajkutujktë jam ma Israel.

⁵ Mwë'ëmtëp jam ëpëky ma ja tsajptëjkën miitsëty Leví ja'ayëty, nitu'ukjaty jënu'un mtu'kja'ay'atën ets jëtu'un ja Israel ja'ayëty tkutänëtëty ja myëku'uk nitu'ukjaty.

⁶ Yaj'ooktë ja kupixyny mëti'ipë tuka'ajëpën tyam ma ja ëmaayxyëëwën, miitsëty näypyuj näjyä'ätsëtë yajxon ets jëtu'un xypyatuntëty ja ënä'ämën mëti'ipë ja Moisés yajwë'ëmën.

⁷ Josías ojts ja mayjyä'äy tmo'oy ja tsajpkaa, kupixyny, mëti'ipë wintsë'kën'atëpën ma ja ëmaayxyëëwën: ja kupixyny ets tsajppax jä'ä nyiwinë'ajty i'px majk mil, ëpëky ja tsajpkaa tëkëëk mil.

⁸ Näyjyëtu'un ja wintsëntëjkëty ojts näjyëtu'un tyajktëpë ja jyä'äjëty ma ja mayjyä'äyën ets tmooytyë ja Leví ja'ayëty ets ja teetytyëjkëty. Ja Hilquías, Zacarías ets Jehiel, mëti'ipë kyë'ë'am'ajtëpën ja tsajptëjk; ojts tmo'otë ja teetyëjk mäjtsk mil ja kupixynyëty, tsajppaxëty ets tëkëëk mil yë tsajpkaa ets tyajtuntëty ma ja ëmaayxyëëw yajmëjjawën;

⁹ ja Conanías mëët ja myëku'uktëjk mëti'ipë xyëëwajtëpën Semaías ets Natanael, Hasabías, Jehiel, Josabad; yë Leví ja'ayëty ojts näjyëtu'un jyä'ä tyaktë, mëkoxk mil tyajktë ja tsajpkaa ets mëkoxk mëko'px ja mëjatyëtypë ja tsajpkaa ets tnixëëwtuna'antë ja ëmaayxyëëw.

¹⁰ Ko kya'pxtaay ja jëyujk mëti'ipë ënety tsojkëpën ma ja wintsë'kën yajyaka'any, ënät ja teetytyëjkëty tyuuntëjkëtyë ets Leví ja'ayëty nyätyukniwijtsëtyë tiijaty tyuntëpën jëtu'un tä ënety ja yajkutujkpë të tyuknipëkëtën.

¹¹ Tä tyaj'o'ktë ja jëyujk mëti'ipë ja ëmaayxyëëw tyukmëjjawëjantëpën; ja Leví ja'ayëty jä'ä yaj'o'ktë ja jëyujk e ja teetytyëjkëty jä'ä ja ne'pny xyijkxjëtijtëp jam ma wintsë'këntyaknën mëti'ipë ja Leví ja'ayëty yajktëpën.

¹² Ja jëyujk on ëpëky tpëjktaktë ets ja ja'ayëty këëkjä'ä tyajktë jam ma wintsë'kën yajyäkyën; jëtu'un tä ja ënä'ämën myinyën mëti'ipë ja Moisés yajwë'ëmën; näjyëtu'un tuuntë ja mëjatyëtypë ja tsajpkaa.

¹³ Tääts ëpëky ja tsu'utsy tsaaytyë mëti'ipë tyukmëjjawëjantëpën ja ëmaayxyëëw ets ja maypyë jap tu'tsjoty tyajkëëwtë ets apëjkënjoty tmooytyääytyë ja mayjyä'äy.

¹⁴ Ja Leví ja'ayëty ëpëky ja jyä'äjëty tyaj'o'oyëtë mëët ja teetytyëjkëty ja jyä'äjëty, jä'ä ko ja teetytyëjkëty, ka'ap myëtaktë kë'ëm ja jyä'ä tyaj'oyëtëty mëët ko ja tuunk mëk ojts tyuka'ajëtë; kootspaat tyuuntë ets ënu'kxë jyajtë mëët ko tyaktë ja wintsë'kën: ja tsu'utsy ets ja on ma Wintsënën. Paatykyëjxm ja Leví ja'ayëty yë'ë yaj'o'oyëtë ja kääky uuky mëti'ipë ënety ja teety ets ja Aarón ja y'u'unk y'ok patëtëpën.

¹⁵ E ja ëëpë yaxpë mëti'ipë ja Asaf jyä'äy'äjtypyën, ojts ja tyuunk t'atänëtën jëtu'un tä ojts ja David, Asaf, Hemán ets Jedutún tni'ënä'ämëtën. Ja mëti'ipë y'atënaaytyëpën ja tsajptëjk'aaw nijä'äjaty ojts tkëwent'atë; jä'ä ko ja myëku'uktëjkëty mëti'ipë Leví ja'ayëtyën yë'ë ojts tyaj'o'oyëtya'atë winë mëti'ipë kyäytyëpën y'uuktëpën.

¹⁶ Jëtu'un tuknima'kxëtyë janty'oy ja ëmaayxyëëw maa ja Wintsën yajmëjjawëja'anyën ets ma ënety tyaka'antën ja wintsë'kën nino'okpyë ma ja Wintsën ja wyintsë'këntyaknën, jëtu'un tä ënety ja yajkutujkpë Josías të tni'ënä'ämën.

¹⁷ Ja Israel ja'ayëty ojts ja ëmaayxyëëw tukxoonta'aktë, wëxtujk xëëw xyëëwtuuntë ets jëtu'un tkaaytyë t'uktë ja tsajpkääky mëti'ipë tsäkën.

¹⁸ Ka'ap ënety jëtu'un nijëna'a yajnixëëwtunyëm ja ëmaayxyëëw tä ya'atën, maju'unëm jyuuky'ätyën ja Samuel, ja Wintsën ja kyukajpxpë; nitu'uk yë yajkutujkpë ojts jëtu'un tkanixëëwtuny yë ëmaayxyëëw jëtu'un tä txëëwtuunyën yë Josías, mëët ja teetytyëjkëty, Leví ja'ayëty, Judá ja'ayëty ets Jerusalén ja'ayëty.

¹⁹ Jää ma myajkmokx tëkëëk jëmëjtpejtyën ma Josías yajkutukyën jää ya'atë ëmaayxyëëw yajnixëëwtuuny.

Ma ja Josías y'ooky tyëkoyën

²⁰ Ok ma ënety ja Josías të tkoj oyën ja tsajptëjk, jää ojts yë Necao, Egiptë yajkutujkpë myiny; jamtsow myiiny Éufratestsow ets tsyiptuna'any jam Carquemis. E ja Josías ojts nyitsoonyë ets jam jyëjpkuwa'këyë;

²¹ yë Necao ojts ja jyä'äy tkexy ma ja Josías ets y'ënëmaayë: Mijts yajkutujkpë, ma m'ëne'emyën jam Judá, këtii ntu'ujës xy'ëtuky, jä'ä ko ka'ap myijtsëty niminy, wiink ja'ayës mëët ntsiptuna'any. Wintsënës kë'ëm të xy'ënëëmë koos njotëkoyëty; paaty n'ënëëmë këtii nëkoo xy'ëtuky mëti'ipë yë'ë të tuknipëjktaakën këtiipë kë'ëm mjotmay xy'ixkukëtëty ets nyaj'atëkoytyëty.

²² E yë Josías ka'ap kyäjpxyjyä'äykyujkëy, ni'ikyë ojts jyotmëktä'äky ets koonëm tsyiptuna'any oy jëtu'un jyayaj'ënëmaay, mëti'ipë ënety ja Wintsën kë'ëm të kyexyën, tääts tyëjkëy mëët tsiptuunpë jam Meguido,

²³ e ko ja ti'pxpëty ja tyi'px ti'pxë'ktë kujk ojts timmyo'otë ja Josías. Tä Josías ja tyuunpëtëjk t'ënëmaay: Ju'tëkës yaa tsipjoty jä'ä ko tëëjës ntsëtyuty.

²⁴ Ja tyuunpëtëjk ënätyë jam myëpëtsëëmë tsipjotm ma ja keypywyintëkäämpën mëti'ipë ënety myëtsiptuunpyën ets yajnajxë ma wiinkpë kepy wintëkäämpën ets poj'am yajnëjkxë jam Jerusalén ma ojts y'o'kyën. Jam nyaaxtëjkëy ma ja y'aptëjk ënety të nyaaxtëkëtën. Ja Judá ja'ayëty ets ja Jerusalén ja'ayëty jeky nyijëëy nyiyaxëtë.

²⁵ Ojts yë Jeremías tu'uk yë ëy tyuknijayëty ko y'oky tyëkooy. Mëti'ipë tyampaat je'eyëm y'ëëwtëpën ko pën y'ooky mëti'ipë tyukja'amyäjtstëpën ja Josías. Ya'atë ëy xëmë t'ëwtë yë Israel ja'ayëty ets aak myëët'ajtëp yë ja'ayëty ma y'iynyokyëtyën.

²⁶ Yë Josías yë nyikäjpxy nyimëtyä'äky ets tëkokyë mëti'ipë oy tyuunën jëtu'un tä ënety myinyën jap kuja'ay ma ja Wintsën ja nyokyën mëti'ipë pyatën,

²⁷ ets mëti'ipë tyuunën kyajpxën, tyimtso'ontäky ets jyëjpkëjxy, jap myiinta'ay kuja'ay ma ja nyokyëtyën ja yajkutujkpëtëjk mëti'ipë jam ënä'ämtën Israel ets Judá.