2 Crónicas 33 - Biblia Dc en Mixe de Quetzaltepec

Ma ja Manasés yajkutukyën

¹ Majkmäjtsk ënety yë jyëmëjt yë Manasés ko tyëjkëy yajkutujkpë, wëxtyikxy myajkmokx jëmëjt ojts y'ëne'emy jam Jurusalén.

² Je'eyëp ko yë'ë ka'ap ojts winë oy tuny ma Wintsënën, ojts t'ëwtaty ja tsaapotsy, ja awinax ets oynatii ka'apë Tiosëtyën; näjyëtu'un ojts winë tuny tä ja naax kajpnëtyën mëti'ipë ka'ap ja Wintsën t'ëwtatën, ja naax kajpn mëti'ipë ja Wintsën wyojpëtsëëmën ko jam jyajtë ma ja Israel ja'ayëtyën:

³ Ojts t'akojëtyä'äy ja nyitsajptëjk mëti'ipë jam tunkëjxm kopkkëjxm yajpatëpën, tä ja tsaa ja kepyëty, mëti'ipë ënety ja tyeety Ezequías të tjijtë'ëkyën, ojts t'apojtsëtyä'äy ja wintsë'këntyakn ets ja Baal ja nyitëjk ets t'oytyuuny ja Aserá y'awinax. Yë'ëpaat ojts t'ëwtajnë ja xëëw po'o mëti'ipë ka'ap jyapaatyën jeexyë t'ëwtaty,

⁴ ojts jap ëpëky tyaj'oyë ja wintsë'këntyakn ma ja Wintsën ja jyëën tyëjkën ma ënety ja Wintsën të tnikäjpxyën ko jap winë xëëw yajpaata'any ets ko jap ja xyëëw yajmëjjawëty.

⁵ Ojts jam tsajptëjk'ëkë'ëm ëpëky t'oytyuny ja wintsë'këntyakn ets yë'ë tuknikojëy ja xëëw po'o xëëw mëtsa'a.

⁶ Tä tyaj'o'ky ja y'u'unk y'ëna'k ets nino'ky nixämy mëti'ipë tyukwintsë'këyën ja Ben-hinom; ojts tyajmëjnajxnë ja näpyatoy näpyanaxë, ja najtsja'awën, ja toonkajpk ets ja kaxpojkën. Tim tëkatsy ojts winë tuunë, aakjä'ä mëti'ipë ja Wintsën y'ëxëëk'ijxypyën.

⁷ Wiink awinax ojts jap tsajptëkoty tpëjktaknë ma ja Wintsën ja jyëën tyëjkën, ma ënety ja Wintsën të t'ënëëmën ja David ets ja myaank Salomón: Ya'atë tsajptëjk, mëti'ipë yaa yajpatpën Jerusalén ma tsyëënëtën yë Israel ja'ayëty, ëjts njä'ä'atäämpy ets yaajës yë nxëëw yaja'amyätsëty xëmëkyëjxm.

⁸ Ëjts ka'apës yaa yë Israel ja'ayëty nijëna'a nyajtsoontëty maas ja y'aptëjk ojts nyajtsënaaytyaknpëktën ets jëtu'un tkuuytyuntëty ja n'aaw n'ayukës, ja n'ënä'äm ntëyajtënës mëti'ipë ja Moisés ntukmëwë'ëmënës.

⁹ Je'eyëp ko ja Manasés ni'ikyë ojts tnajtstujë ja Judá ja'ayëty ets ja Jerusalén ja'ayëty ets ja ëxëëk tu'u tpanëjkxtëty ets wäänëni'ik o'ktëy winë tuntëty këtiinëm ja naax kajpn mëti'ipë ojts ja Wintsën tyajkutëkoyën ko ja Israel ja'ayëty jam jyajtë.

¹⁰ Ja Wintsën ojts tjamëkäjpxy ja Manasés ets ja naax kajpn, yë'ë ka'ap jyä'äkyujkëtyë.

¹¹ Paatykyëjxm yë Wintsën tyukniwoowpäjtëtë ja Asiria ja'ayëty ets tmajtstë ja Manasés ets tsumy xoty ojts tyajnëjkxtë jam Babilonyë, mëët pujxntejpxy.

¹² E ko nyäjya'awëyë mëj këjää jyotmaypyatnë, ënät ja Wintsën ojts tmëkäjpxy winë aaw winëjot, tä nyäpyëjktakë ëmaay amutsk ma ja Wintsënën, mëti'ipë ja y'aptëjk y'ëwtajtën.

¹³ Ko mëktä'äky ja Wintsën ojts tmëkäjpxy tä pyutëjkëyë; ojts jatëkok yajnëjkxyë jam Jerusalén ets tunëty ja tyuunk ma ënety yajkutukyën. Jäänëm ja Manasés twinja'awëy ko yë Wintsën janty yë'ëtëm myëët'ajtyp ja mëj'ajtën ets yë'ë mëpaat yaj'ëwtaty.

¹⁴ Ko jëtu'un ya'atë y'ëktuun y'ëkjajtë, ënät yë Manasés ojts tnakojëtity ja David ja kyajpn, jamtsow ma yajtijyën Guihón, matsow xëëw pyëtsimyën; jam wokjotm tyajtso'ontäky ets tyajjaty ma tijtën Nëëjëyujk Tëjk'ëkë'p ets y'ëwtijtë'ky jamtsow Ofel. Këjxm yajxon t'oytyuuny. Ojts tpëjktä'äky këwent'ajtpë maajaty ja kajpnën mëti'ipë ta'tspëkyën jam Judá.

¹⁵ Jyëpëjk ja awinax mëti'ipë ënety jap tsajptëkoty të tkojyën ets ja wintsë'këntyakn ets t'ixjëpijptaay jam kajpnpë'am.

¹⁶ Ets tpojts'o'oyëy ja wintsë'këntyakn, ojts ja wintsë'kën tyäky ma ja nay'ëëw'oy näykyajpx'oyë yajtunyën ets ma yajkukajpxën winë, tä t'ënëmaay ja Judá ja'ayëty ets Jerusalén ja'ayëty ko yi'iyë tu'uk y'ëwtatëp ja Wintsën.

¹⁷ E ja ja'ayëty je'eyëm ja wintsë'kën tyaktë ma ja wintsë'këntyaknën ka'apë y'oyëtyën, oy ënety ja Wintsën jä'ä tjatukwintsë'ëkëtë winë.

¹⁸ Ja Manasés ja nyimëtyä'äky ets wi'ix ja Wintsën tmëpëjktsooyën ets wi'ix ja käjpxynyajxpëtëjk y'ënëmaayën mëët ja Dios ja xyëëwkyëjxm, jampë Israel yajpaatyën, jap myiinta'ay ma ja yajkutujkpë ja nyokyëtyën mëti'ipë jam ënä'ämtën Israel.

¹⁹ Ja wyaantak nyu'kxtakën ma Wintsënën, wi'ix ja Wintsën y'ëtsoowën; ja nyëë pyoky ets wi'ix ojts tkojyën kanaak ja awinax; ja naaxpotsy ets ma tnikojyën ja ëxëëkpë; ma tpëjktäkyën ja Aserá y'awinax, ma ënety ka'ap jyotwinpitynyëmën; jap myiinta'ay kuja'ay ma ja nyokyëtyën ja ja'ayëty mëti'ipë ja Wintsën myëtuuntën.

²⁰ Ko y'o'ky jap tyajnaaxtëjkëtyë tëja'p ma ja kyutujktaknën, ma ijty tyaj'ityën pëjykyam. Tääts kyutëjkëyë ja myaank Amón ma kutujktaknën.

Ma Amón yajkutukyën

²¹ I'px mäjtsk ënety Amón jyëmëjt ko tyëjkëy ënä'ämpë, mäjtsk jëmëjt ojts y'ëne'emy jam Jerusalén.

²² Ka'ap ojts winë oy tuny ma Wintsënën, nän timjëtu'un y'ëtitsy tä tyeetyën Manasés. Myooy ja wyintsë'kën ka'apë Wyintsënëtyën ets y'ëwtajt ja ëxëëkpë ka'oypyë mëti'ipë ënety ja tyeety Manasés të tyajkojyën.

²³ Je'eyëp ko yë'ë ka'ap jyotwinpijty ma Tiosën, jëtu'un tä ja tyeetyën Manasés, ni'ikyë ojts ja pyoky tyajmayë.

²⁴ Ja tyuunpë ojts kë'ëm nyikäjpxytyunëty ets yaj'o'kë jap ma kyutujktaknën.

²⁵ E ja naax kajpn ojts näjyëtu'un tyaj'ooky ja ja'ayëty mëti'ipë ënety të tyaj'ooktën ja yajkutujkpë Manasés ets nikajpxpäjtë ja Manasés ja myaank ets yë'ë yajkutukëty, Josías xyëëwajtyp.