2 Crónicas 32 - Biblia Dc en Mixe de Quetzaltepec

Ma ja Senaquerib tjanitëkëjanyën ja Judá kajpn

¹ Ko jëtu'un nyäjxy ma ja Ezequías tyajnikëxë'kyën wi'ix ja Wintsën oy tmëmëtoyën ets wi'ix tmëjpëjktä'äkyën, ënät ja Senaquerib, Asiria ja'ay yajnatujkë ets tyajnatujktaay ja naax kajpn mëti'ipë nyiwa'anäämpyën.

² Ko ja Ezequías t'ijxy ko tëë ja Senaquerib tuknipëjktaakë ko nyitëkëja'anyë,

³ ënät twoowmujky ja mëjja'aytyëjk ets ja wijytyëjk ets tmëmay tmëtajtëty pën oy'ajtp ko tyaj'atujkta'atëty ja nëëjut maajaty ja ja'ay nyëkontën ets tyajnëkutëëtsëja'antë ja mëtsip; ja ja'ayëty ojts tkupëktë, ka'ap wi'ix y'ënantë.

⁴ Ënet ja ja'ay myäymyujktë ets tyaj'ëtujktaaytyë ja nëëjut, yë'ëpaat mëti'ipë muum mu'tpën ets mëti'ipë naaxpa'atye'epyën, këtiipë nyëëpaatëty ja Asiria ja'ayëty ko ënety jyamëwinkonëtë.

⁵ Ezequías ni'ikyë jyotmëkpëjky ets tnakojtaay ja nyaax kyajpn mëët mëjëtypë potsy, ojts mëjpotsy tkojy këjxmëtypë ma ja naax kajpn yajkëwent'atëtyën. Ojts yajxon tyajta'tspëky ja David ja nyaax kyajpn ets t'oytyuuny oyëtypë ti'pxn ets ku'umën.

⁶ Tääts tuknipëjky ja ja'ay mëti'ipë tyu'uwinwowtëpën ja myëku'uktëjk ets jam tyajmujky kajpn itkujky ets t'ënëmaay:

⁷ Amëk jotmëk mtimyajpaatëty ets këtii ninu'un mtsë'ëkëtëty ma Asiria ja'ayëtyën, ni yë'ë mëti'ipë ënä'ämtëpën yajkutujktëpën, ëëts'ajtëmë jaaknimay ni'ik nyajpatëmë.

⁸ Yë'ëjëty yi'iyë tyukjotmëk'ajtëp ko nyimay'atë, ëëts'ajtëmë yë'ë ntukjotkujk'ajtëm yë Wintsën, jä'ä ko yë'ë xypyutëkëja'anëmë ko pën mëët ntsiptu'unmëty. Ko ja ja'ay jëtu'un tmëtoowtë ja aaw ayuk tkäjpxy ja yajkutujkpë Ezequías, ënät jyotmëkpëjktë.

⁹ Tä ja Senaquerib, mëti'ipë jam yajkutujkpën Asiria, tuknikejxy ja noky ja yajkutujkpë Ezequías, jampë yajkutukyën Judá ets ja Jerusalén ja'ayëty, mëët ya'atë ja aaw ayuk:

¹⁰ Jëtu'un ja Senaquerib m'ënë'ëmxëty: ¿Tiitën miitsëty mtimtyukjotkujk'ajtëp, tii këtiijën mëj xytyim'ixtë ko tëë mnatuktë?

¹¹ Pën Ezequías mnëmaayëtëp ko yë mWintsën Dios yë'ë mkuwa'ananëtëp, nëkoopë mwin'ëënëtë, yë'ë jä'ä tyuunpy ets miitsëty m'ëk o'ktaaynyëtëty mëët ja yuu nëëtëëtsë.

¹² ¿Ti këtii xynyijawëtë ko yë Ezequías tëë tyajma'ta'ay ja tsajptëjk ma ijty miits mtios ëwtatën ets wintsë'këntyakn ets të tni'ënä'ämë ko yë Judá ja'ayëty ets Jerusalén ja'ayëty je'eyë tu'uk yë wintsë'këntyakn tyajwë'ëmtëty ma t'ëwtatëty ja Tyios ets maa tyajtoytyëty ja poomë?

¹³ ¿Këtii xynyijawëtë wi'ix ëëtsëty ëxëëk ja naax kajpn wiinkëtypë të ntuntënë? ¿Pën muum të y'ëk'ëna'any ko jä'ä ja Wyintsënëty të yajtso'okëtë?

¹⁴ ¿Pën tëë pyutëkëty yë Wyintsën koos ja nteety n'apëty mëët tsyiptuuntë? ¿Tyam wi'ix ënät jëtu'unpë winma'any xypyatëpë ko yë mTios yë'ë myajtso'okanëtëp?

¹⁵ Këtii xymyëpëktë ijxtëm yë Ezequías m'ënë'ëmxëtën, këtii myajwin'ëëntë, nitu'uk yë naax kajpn të kyamayëtë nyäyajtso'okëtëty mëët ëëtsëty ets mëët ja n'ap n'okëtyës, ni yë'ë miitsëty yë mTios kyamayëtëty etsës xy'awa'ktuktëty.

¹⁶ Jëtu'un ja Asiria ja'ayëty y'ënantë ets ni'ikyë ojts ëxëëkjaty jyaak timy kyajpxtë, tijnëtë këxëty këpätëty ja Wintsën ets ja Ezequías.

¹⁷ Ojts ja Senaquerib, näjyëtu'un tuknikexy yë noky yë Ezequías, ma wiinkjaty ojts tijyën ja Wintsën ets ma y'ënänyën: Jëtu'un tä ja tiosën mëti'ipë wiinkëtypë ja naax kajpn y'ëwtajtëpën ka'apës të xymyëmëta'aktën; yë Ezequías yë Tyios ka'ap tii tuna'any ma ëëtsëtyën ets Ezequías ja nyaax kyajpn tkuwa'anëty.

¹⁸ Ja Senaquerib ja jyä'äyëty nëkooyë janty mëk y'ënaankëtaktë ets nyätyijyë ja ja'ay t'ëtsë'ëkëja'antë mëti'ipë jam këwent'ajtëpën potsykyëpajkm, hebreo ayuk ojts tukmëkajpxtë ets jeexyë ja ja'ay tsyë'ëkëtë.

¹⁹ Jëtu'un ja Jerusalén ja'ay ja Tyios yajtijtë ets yajpëjkta'aktë tä jeexyë oy nyapën Wintsënëty mëti'ipë ja wiinkëtypë kajpn y'ëwtajtëpën.

²⁰ Paaty ja Ezequías ets ja Jeséas, yë Amós myaank, tyëjkëtyë kajpxtakpë ma Wintsënën ets putëjkën t'amëtoowtë.

²¹ Ënet ja Wintsën tkexy ja kyukäjpxy ets tyaj'o'ktaay ja Asiria ja'ayëty ja wyintsëntëjkëty ets ja ja'ayëty mëti'ipë ënety tsip'ixyëtyën ets ja kopktëjkëty mëti'ipë ja myëku'ukëty tyu'uwinye'eytyëpën. Tä ja Senaquerib ojts wyimpijnë wintsëtyu'un jëjptsëtyu'un ma kyajpnën, jam jyäjty ma ja tsajptëjkën ma jap tmëët'atyën ja tyios, ka'apë Tiosëtyën, e wäänë y'ijty tä jäpyë kyë'ëm u'unk yaj'o'kë.

²² Jëtu'un'äämpy ja Wintsën ojts tyajtso'oky ja Ezequías ets ja Jerusalén ja'ayëty, ma ënety ja Senaquerib y'ëxjëtit pyajëtitëtën ets ma ënety wiinkëtypë ja yajkutujkpë nëkoo myëtsip'atëtën, tä ja naax kajpn akujk jotkujk y'awinpity.

²³ Ënet ja mayjyä'äy tmëja'awëtyë ja Wintsën ets ojts tmënëjkxtë may'äämpy ja näy'nyamo'ojë, näjyëtu'un ja Ezequías may ja ja'ay winë nyamooyë, mëët ko ënety ja Wintsën të pyutëkëty, mëti'ipë jam Judá ënä'ämpën yajkutujkpën. Ko jyëtu'un'ajty yë Ezequías mëj'äämpy yë ja'ay yajnajxë oymyaajëty.

Ma ja Ezequías pya'ampetyën ets wi'ix tsyoky y'akëtäkyën

²⁴ Ojts Ezequías jatëkok mëk pya'ampety, je'eyëp ko yë'ë, ënätyë Wintsën tmëpëjktsooy ets y'ëtsoowinpijtë mëët ja mëj'ajtën.

²⁵ Ko tsyoky y'akëtäky, ka'ap tkukajpxëy ko ënety ja Wintsën të yajtso'okyë, ni'ikyë amëj akëjxm nyäjya'awëyë, paaty yë Wintsën tyukjoot'anpëjkë ets Wintsën näy tyukjoot'anpëjk yë Judá ja'ayëty ets Jerusalén ja'ayëty.

²⁶ E yë'ëjëty oy jëtu'un y'ëktëkooytyë, ojts jatëkok ja Wintsën tmëpëjktsowtë ets ojts pyokymyä'kxëtë ets ka'ap wi'ix tyuunëtë, mapaat ja Ezequías jyuuky'äjtyën.

Ma ja Ezequías mëj këjää winë tpaty t'ijxyën

²⁷ Ezequías may wit meeny tmëët'ajty, may ojts tmëët'aty yë poop pujxn, pu'ts pujxn, tsaa mëti'ipë tsowëtyën, nëë mëti'ipë pa'akxu'kpën, ku'umënëty ti'pxnëty ets may winë mëti'ipë tsowëtyën.

²⁸ Ojts tkojy may ja tëjk, ma aaypyajk ujtspajk tpëjkë'kyën, ma tpëkë'kyën ja jë'kxy pëky. May näjyëtu'un tmëët'ajty jëyujk tënaaytyakn, tsajpkaatënaaytyakn.

²⁹ Ojts ja naax kajpn may tkoy, myëët'ajt may jëyujk tsajpkaa, jä'ä ko mëjwiin yë Wintsën ojts pyutëkëty.

³⁰ Yë'ë yaj'atujktaay ja nëëjut mëti'ipë ënety jam kajpnpë'am yajpatëpën ets naaxjoty tyajnajxy jëtu'un tyajajty jam kajpnjotm, jam tyajtso'ony Guihón ets naaxpa'tkë'p tyajnajxy, tyajajty ma ja David ja kyajpnën. Jëtu'un ja Ezequías ojts tyuny, aak'oy winë tuuny ets oy ojts wyimpëtsë'ëmxëty wä'än tiijëty timnyipëjktakëy.

Ma ja Ezequías t'ëxajën ja Babilonyë ja'ayëty

³¹ Jëtu'un jyäjty kyëpejty tëkok, ko ja Babilonyë ja'ayëty ja kyutuunkëty tkäjxtë jam ma ja Ezequías ja kyajpnën ets tyajtëwa'antë wi'ixën ja Wintsën ënety ja naax kajpn të tputëkë. Yë Wintsën atu'uk t'ëxmajtsy yë Ezequías ets twinma'any'ixa'any wi'ix myäy tyäjyën.

Ma ja Ezequías y'ooky tyëkooyën

³² Yë Ezequías yë jyuukyajtën ets ma oypyë ja tuunk ojts tyajtu'uye'eyën, jap myiny kuja'ay ma ja nokyën mëti'ipë ja Dios mëtuunpë Jeséas jyääyën, yë Amós myaank ets ma ja nokyën mëti'ipë ja yajkutujkpë jyä'ä'ajtëpën mëti'ipë jam Judá ets Jerusalén ënä'ämtën.

³³ Ko ja Ezequías ojts y'o'knë jam tyajnaaxtëjkëtyë winkon ma ja David ojts nyaaxtëkën. Tëkokyë ja Judá ja'ayëty ets ja Jerusalén ja'ayëty ojts mëj'äämpy tyajnaxtë ja Ezequías ja jyuukyajtën.