2 Crónicas 30 - Biblia Dc en Mixe de Quetzaltepec

Ma ja Ezequías tnixëëwtunyën ja ëmaayxyëëw

¹ Ezequías ojts tuk'ëwa'anëtyä'äy ja naax kajpn mëti'ipë jam yajpatëpën Israel, Judá ets ma ja Efraín ja y'itjotmën ets ja Manasés ets myintëty ma ja tsajptëjkën ma yajnixëëwtuna'anyën ja ëmaayxyëëw, mëti'ipë ja Wintsën xyëëwajtypyën, Israel Tyiosëty.

² Ja yajkutujkpë ojts tuknija'awëtyä'äy ja mëjja'aytyëjk ets ja naax kajpn tnijawëtëty ko jää yajnixëëwtunëty ja ëmaayxyëëw ma ja mëmäjtskpo'opë y'änyën tääpë jëmëjtpë,

³ ka'ap tjëkyejpy yajnixëëwtunëty jää ma tnixëëw'atyën, jä'ä ko ka'ap ja teetytyëjk nyipatëtyë ets ja naax kajpn nän ka'ap ënety të nyänyi''ixëty jam Jerusalén.

⁴ Ja yajkutujkpë ets ja ja'ayëty oy tja'awëtyë ko ya'atë ja xëëw ënety yajtuknipëjktaakë, paaty ojts y'ëna'antë ko jam Jerusalén yajtunëty,

⁵ tä tkajpxwa'kxtaaytyë ja aaw ayuk, tyajtso'ontaktë jam Beerseba jampaat Dan, ma twoowtsowtën ja ja'ayëty ets myintëty jam Jerusalén xëëw'ajtpë, ma yajmëjjawëja'anyën ja ëmaayxyëëw mëti'ipë ja Wintsën jyä'ä'ajtypyën, mëti'ipë ja Israel ja'ayëty y'ëwtajtëpën. Jä'ä ko ka'ap ijty nëkooyë ja'ay jëtu'un ya'atë xëëw tnimintë, jëtu'un tä ënety jyaminyën kuja'ay.

⁶ Tä ja kukäjpxy ye'eywya'kxtaaytyë, jä'ä myënëjkxtëp ja yajkutujkpë ja y'aaw y'ayuk, ma ja ënä'ämën kuttujkën tpëjktäkyën: Miitsëty Israel ja'ayëty yajwinpitë jatëkok ja mjot mwinma'anyëty ma ja Wintsënën, mëti'ipë ja Abraham, Isaac ets ja Jacob Tyiosajtën ets yë'ë mnijootwinpitëtëty ets näjyëtu'un ja ja'ayëty mëti'ipë të tkukä'äktën ja Siria ja'ayëty, Sirië yajkutujkpëty.

⁷ Këtii mëpaat jëtu'un mja'ay'atë tä ja m'ap y'ok jyuukyajtën ets ja mjëëky mëku'ukëty mëti'ipë ojts ka'ap ja Wintsën tmëj'ijxtën ets kyë'ëyajkëtë, ma ëxëëk jyajtën kyëpäjtën.

⁸ Këtii mëpaat jëtu'un mjatë mkëpätë; xajë'ëktë ja mkë'ëjëty ets ëwtatë ja'amyätstë ja mWintsënëty; yaj'oyëtë ja mjot mwinma'anyëty, mintë ma ja tsyajptëjkën, mëti'ipë të tkënu'kxyën winë xëëw. Mëtuntë ja Wintsën ets ka'ap mtukjoot'anpëkëtëty.

⁹ Pën miitsëty mja'amyäjtstëp ja mWintsën Dios, mpa'ëyowanëtëp yë'ë ets tyuktëkëjäämpy ja yajkutujkpëtëjk mëti'ipë të tmatstën ja mjëëky mmëku'uk ets tnajtsmatsëtëty ets tpaatëty jatëkok ja nyaax kyajpnëty, jä'ä ko yë Wintsën pa'ëyoop najts'ëyo'owëp yë'ë, ka'ap jëtu'unyë mnajts'ixëja'anëtë pën myajwinpijtëp ja mjot mwinma'anyëty.

¹⁰ Ja yajkäjpxye'epyë wa'ats t'aye'eytyääytyë ja naax kajpn, ma Efraín ets ja Manasés tnitänëtën ja it naaxwiinyëtë, tyimjajtë jam ma Zabulón y'itjotmën. Je'eyëp ko ja ja'ayëty xi'iky ëwë'ëky ojts je'eyë tpëjkta'aktë.

¹¹ Pën ojts kyäjpxyjyä'äykyujkëtë, ma ja Aser, Manasés ets Zabulón ja jyä'äyën ets ja jyot wyinma'any tyaj'o'oyëtë, ojts nyëjkxtë jam Jerusalén.

¹² Wintsën kë'ëm yajkutujk ets ja ja'ay may tja'akyukëtëty ja aaw ayuk mëti'ipë ja yajkutujkpë ets ja kutuunktëjk nyi'ënä'ämëtën, mëti'ipë ja Wintsën ënety të tyuknipëkëtën.

¹³ Ënet ja mayjyä'äy myujky jam Jerusalén ma myäjtsk po'opetyën tääpë jëmëjt ets tmëjjawëja'antë ja ëmaayxyëëw ma ja tsajpkääky tkaytyën ka'apë tsyooymyëëtëtyën.

¹⁴ Wa'ats tjëpëjktaaytyë ja wintsë'këntyakn ets maajaty ja poom tyajtoytyën mëti'ipë jam Jerusalén yajpatpën. Jap tkujëpijpnajxtaaytyë wokjoty.

¹⁵ Ma myajkmajkts anyën ja mëmäjtskpo'opë, jää tyaj'o'ktë ja kupixyny, mëti'ipë tyukmëjja'awëtyën ja Wintsën ëmaay xyëëwjoty. Ja teetytyëjkëty ets ja Leví ja'ayëty, kë'ëm ojts tsëtyu'unjawëtë ko wiink ja'ay ja wintsë'kën jam yajktëp, ënät nyäpyuj nyäjyä'tsëtë ets ojts yë'ë tyaktë ja wintsë'kën mëti'ipë ja Wintsën yajmoopyën wino'oky winxämy.

¹⁶ Ja teetytyëjkëty kë'ëm ja tyuunk tpa'atwa'këtyë, mëti'ipë ja Moisés ojts tni'ënä'ämën, ja Wintsën ja tyuunpë. Ja teetytyëjkëty jä'ä ja jëyujk ne'pny xyijkxjëtijtëp, mëti'ipë ja Leví ja'ayëty yajktëpën.

¹⁷ E may ja ja'ay ka'ap ja näypyuj näjyä'ätsë tpatë, paatykyëjxm ja Leví ja'ayëty jä'ä ja wintsë'kën tyaj'o'ktë ma ja ëmaayxyëëwën ets ja ja'ayëty ja näkyënu'kxë tpata'atëty.

¹⁸ May ja Efraín, Manasés, Isacar ets Zabulón ja'ayëty tpatë ja ka'ayën ukën, mëti'ipë ënety të y'apaatën jä'ä xëëw ma ja ëmaayxyëëw yajmëjjawën, je'eyëp ko ka'ap yë'ë yajmooytyë mëti'ipë ënety të yajtuknipëjktaakën yajmo'otëty jä'ä ko ka'ap ojts ja näypyuj näjyä'ätsë jëyëjp tpaatë: Ja Ezequías ni'ëmukë ja ja'ay tkënu'kxtaay ets tuknimëpëjktso'owëtyääy ja Wintsën, t'ënëmaay ja Wintsën: Wintsën, pokymyä'kx yë ja'ay mëti'ipë mnimiinëpën winë aaw winëjot,

¹⁹ pokymyä'kx ya'atë ja'ayëty, oy jëtu'un tkapaatë ja näypyuj näjyä'ätsë tä ja ënä'ämën tëyajtën jyaminyën, japë tsajptëkoty y'ityën.

²⁰ Yë Wintsën myëtoow'ijt ja Ezequías ja wyaantso'ow pyëjktso'owën, paaty ja naax kajpn ojts tjanty pyokymye'kxy.

²¹ Wëxtujk xëëw ojts ja ja'ayëty xyëëwtuntë ets jëtu'un ja tsajpkääky tkaaytyë mëti'ipë ka'ap tsyooymyëëtëtyën. Ja teetytyëjkëty ets ja Leví ja'ayëty winjëpom ja xyuxtë wyojptë, twin'ëw twinya'axtë ja Wintsën.

²² Ezequías mëj këjää tkukajpxëy mëët ko ënety ja teetytyëjkëty ets ja Leví ja'ayëty të pyutëkëty winë aaw winëjot ma Wintsënën. Tëë ënety wëxtujk xëëw xyëëwtuntë ma të tyaktën ja wintsë'kën ma Wintsënën, ma t'ëëwkëjxy tkajpxkëjxtën ja pyoky ets ma të twin'ëw të twinya'axtën,

²³ ënät ja mayjyä'äy y'ënantë ko wëxtujk xëëw jyaak xëëwtuna'antë, jëtu'un'äämpy wëxtujk xëëw jyaak xëëwtuuntë akujk jotkujk;

²⁴ ja Ezequías mëti'ipë yajkutujkpën jam Judá, ojts tnayäky tu'uk mil ja tsajpkaa ëna'k ets wëxtujk mil ja kupixyny, näjyëtu'un ja kutuunktëjkëty ojts tnayaktë ma kajpnën tu'uk mil ja tsajpkaa ëna'k ets majk mil ja kupixyny. May ja teetytyëjkëty tpatë ja näypyuj näjyä'ätsë.

²⁵ Ja mayjyä'äy akujk jotkujk nyäjya'awëtë ets näjyëtu'un ja teetytyëjkëty, Leví ja'ayëty ets nitëkokyë ja Israel ja'ayëty mëti'ipë ënety të myintën, wä'än jaaypyaat jaaypyo'kxyëty ets wä'än tkukajpnëty.

²⁶ Ja ja'ayëty mëj ixy ojts t'ixtë jä'ä ko ka'ap ënety nijëna'a jëtu'un y'ëkyajtuunë ja xëëw, jää ojts jëtu'unpë jyaak yajxëëwtuny ma jyuuky'äjtyën ja David ets ja Salomón.

²⁷ Ko tyuuntaay jyajtaayë ja xëëw, ënät ja teetytyëjkëty ojts ja naax kajpn tkënu'kxtë, ja teetytyëjkëty ja wyaantak nyu'kxtakënëty jëkämpaat yajmëtooy.