2 Crónicas 27 - Biblia Dc en Mixe de Quetzaltepec

Ma ja Jotam yajkutukyën

¹ I'px tu'uk ënety Jotam jyëmëjt ko tyëjkëy yajkutujkpë jam Jerusalén, majkmokx tu'uk jëmëjt ojts y'ëne'emy. Jä'ä ijty yë tyaak xyëëwajtyp Jerusá, Sadoc yë nyëëx.

² Jotam oy winë tuuny ma Wintsënën, jëtu'un tä Uzías ënety winë të tunyën mëti'ipë yë'ë tyeety'ajtën. Je'eyëp ko yë'ë ka'ap jap tsajptëkoty tyëjkëy. E oy jyajëtu'unëty ja naax kajpn je'eyëm ojts winë ëxëëk tuny tkäjpxy.

³ Jotam ojts tyajkojy ja tsajptëjk ja nyitëjk'aaw, ja anëkëjxytsyowpë wyi'imyën, ojts näjyëtu'un kanaak ja tëjk tkojy jam ma ja mëjpotsy nyäxyën mëti'ipë xyëëwajtypyën Ofel.

⁴ Ojts tyajkojy naax kajpn jam Judá, ojts tyajpëtë'ëky potsy mëjatyëtypë mëti'ipë ja naax kajpn tyukuwanën, kanaak ja potsy ojts tyajpëtë'ëky jam yukjotm ma ja'ay y'ijx'it kyëwent'atën.

⁵ Ojts tsyiptuny mëët ja yajkutujkpë mëti'ipë Amón ja'ayën ets ka'ap tyajmëtäky. Jä'ä jëmëjt ja Amón ja'ayëty xëmë ijty myeenyyaktë ma ja Jotamën, tëkëëk mil ja tëkëëk mëko'px tsim yë poop pujxn, mäjtsk millon ja mäjtsk mëko'px apëjkën ja tsajpmok ets ëpëky ja cebadë. Jëtu'un ijty tyaktë winjëmëjt.

⁶ Mëj'äämpy yë Jotam nyäjxy oymyaajëty, jä'ä ko ojts ja Wintsën oy tmëmëtoy.

⁷ Ja nyikäjpxy nyimëtyä'äky ja Jotam ets tëkokyë wi'ix tsyiptuunyën, jap myiinta'ay ma nokyën mëti'ipë jyä'ä'ajtëpën yë yajkutujkpëty jampë ojts y'ënä'ämtën Israel ets Judá.

⁸ I'px mëkoxk ënety Jotam jyëmëjt ko tyëjkëy yajkutujkpë jam Jerusalén ets majkmokx tu'uk jëmëjt ojts y'ëne'emy.

⁹ Ko y'o'knë, jam nyaaxtëjkë ma ja David ja kyajpnën, ma nyaaxtëjkëtyën ja y'aptëjk. Yë'ë kutëjkëyë ma ja kutujktaknën ja myaank Ahaz.