2 Crónicas 24 - Biblia Dc en Mixe de Quetzaltepec

Ma ja Joás yajkutukyën

¹ Joás wëxtujk ënety jyëmëjt ko tyëjkëy yajkutujkpë ets jä'ä ojts yajkutuky jam Jerusalén wëxtyikxy jëmëjt. Jä'ä tyaak xyëëwajtyp Sibiá, jam Beerseba kyukajpnëty.

² Joás aak'oy ojts winë tuny jëtu'un tä ënety ja Wintsën oy tukjotkëtä'äkyën, jäpaat ma jyuuky'äjtyën ja teety Joiadá.

³ Yë Joiadá ojts yajpëkyë, mäjtsk ja tyo'oxytyëjk tyukpëjkë, mëti'ipë mëët ja u'unk maay tmëët'ajtyën ye'etyëjkpë to'oxytyëjkpë.

⁴ Tu'kxëëw tu'kjëmëjt ojts ja Joás tuknipëjktaakë ets ja tsajptëjk tkoj'oyëjä'äny,

⁵ ënät tyajmujky ja teetytyëjkëty ets ja Leví ja'ayëty ets t'ënëmaay: Ëjts mëyajtënës n'amëtowäämpy ma miitsëtyën ets nëjkx mjëtitë winnaax wiinkajpn ets xyajmuktëty yë wit meeny, wä'än yë Wintsën yë tsyajptëjk nkoj'o'oy mpëjk'o'oyëmë winjëmëjt. Tyaapë oy kyopkpëkyëty ets xytyukjotëkoytyëty. E ja Leví ja'ayëty ka'ap nëkooyë tukjotëkooytyë.

⁶ Ënet ja yajkutujkpë ojts tmëkäjpxy ja teety Joiadá ets t'ënëmaay: ¿Wi'ix ko ka'ap mëktä'äky xytyuk'ëne'emy yë Leví ja'ayëty ets tyajmuktëty ja këpäjtën jam Judá ets Jerusalén mëti'ipë ja Moisés ojts tni'ënä'ämën ets mëti'ipë ja naax kajpn ojts tni'ënä'ämën mëti'ipë jap tunëpën ma ja wit tëjkën ma ja näpyaatë y'ityën?

⁷ Jä'ä ko ja Atalía mëti'ipë ja ëxëëkpë myëtëjkëpën mëët ja jyä'äy, yë'ë jap ma Dios yë tyëjkën yajpëtsëëmtaaytyë winë ets tukwintsë'këtyë ja y'awinax.

⁸ Paatykyëjxm ja yajkutujkpë ojts tu'uk ja kaaxë t'oytyuny ets ojts jam yajnajtskëyë tsajptëjk wintum.

⁹ Ënet tyajwa'kxtaaytyë ja ayuk ma naax kajpnën, ko tëkokyë ja Israel ja'ayëty kopkpëky ko ja y'ayajk y'ako'onën tyaktëty mëti'ipë ojts tni'ënä'ämën ja Moisés, ja Wintsën ja tyuunpë ets tuknipëjky tpatuntëty ja Israel ja'ayëty.

¹⁰ Jëtu'unkyëjxm ja kopktëjkëty ets ja naax kajpn ojts tnija'awëtya'atë, ojts tmëmintë ja y'ayajk y'ako'onënëty winë aaw winëjot, koonëm tyaj'ujtstë ja kaaxë.

¹¹ Ja Leví ja'ay ijty myënëjkxtëp ja kaaxë ma ja yajkutujkpën ko y'utsy ets t'ixëty; ko y'utsy ja kaaxë tä ijty tu'uk ja yajkutujkpë tuknipëky ja jyääpyë ets tu'uk ja meenykëwent'ajtpë mëti'ipë yë teety kopk nyikajpxpejtypyën, ënät tukko'owtu'utë ja kaaxë, tääts jatëkok jam tpëjkta'aktë ma ja tsajptëjk'aawën. Winjëpom ijty jëtu'un tuntë, jëtu'un winjëpom ja meeny nyipety.

¹² Ja yajkutujkpë mëët ja Joiadá jä'ä myooytyëp ja ja'ay mëti'ipë ja tuunk nyikopk'ajtëpën ets yë'ë tmëjuytyë ja pojtspë ets ja tsäjtspë mëti'ipë y'ajiix y'aka'ayëtëpën ja tsajptëjk. Näyjyëtu'un yë'ë pyaatëtë tmëjuytyëty ja ja'ay mëti'ipë ja pujxn ets ja kepy y'atsaaymyujktëpën jampë tyuntën ma ja Wintsën ja tsyajptëjkën.

¹³ Ja ja'ayëty ënätyë tyuuntëjkëtyë ets mëk tukjotëkooytyë, je'eyëm jatëkok ojts tyajwë'ëmtë ja tsajptëjk tä ënety të jyemy'ätyën.

¹⁴ Ko tyaj'o'oyëtyääytyë ënät ja meeny ojts tmënëjkxtë ma ja yajkutujkpën mëti'ipë ënety të nyatëkën, ja mëti'ipë ënety të nyatëkën yë'ë ojts mëët tyajkojtë ja apëjk atu'unën mëti'ipë jap itëpën ma Wintsën ja tsyajptëjkën, mëti'ipë tunëpën ko ënety ja kajpxta'ak y'ity ets ko ënety ja wintsë'kën yajyäky mëti'ipë no'oky xämyën, ojts tyajkojtë ja mëj jä'pn ets ja wiinkëtypë ja apëjk atu'unën. Ja wintsë'kën no'okpyë xämpyë xëmë ijty tyaktë mapaat jyuuky'äjtyën ja Joiadá.

¹⁵ E ja Joiadá ojts ja myëjja'ayënë, tëë ënety yajxon myëjja'ayënë ko ojts y'o'knë, jä'ä ënety yë jyëmëjt mëko'px ja i'px majktu'uk;

¹⁶ ko y'o'ky jam nyaaxtëjkëy ma ja nyaax kyajpnën ja David, jä'ä ko oy ënety të tmëtuny ja nyaax kyajpn, ja Wyintsën ets ja tsajptëjk.

¹⁷ Tëë ënety y'o'knë tyëkooynyë ja Joiadá, ko myiintë ja wintsëntëjkëty jampë tsyoontën Judá ets tnixëëwtuuntë ja yajkutujkpë Joás. Ja yajkutujkpë Joás yë'ë ojts ni'ik nyätyuk'ënä'ämënë,

¹⁸ ets yë'ëjëty ojts t'ëxmajtsnëtë ja tsyajptëjkëty, ma yajpaatyën ja Wyintsën Tyiosëty, mëti'ipë y'ëwtajtën ja y'ap y'okëty; wiink tios ojts tpanëjkxtëjkënyëtë; ja Aserá jä'ä ojts t'ëwtajtnëtë. Paatykyëjxm ja Wintsën mëk jyoot'anpëjky, tyukjoot'anpëjk ja Judá ja'ayëty ets ja Jerusalén ja'ayëty,

¹⁹ yë Wintsën ojts tyuunpëtëjk tjakexy mëti'ipë ja ënëmaayëtën ets jyotwinpitëty, yë'ëjëty ka'ap kyäjpxyjyä'äykyujkëtyë.

²⁰ Ënet ja Zacarías, yë teety Joiadá myaank, tyuktëjkëyë ja Wintsën ja myëk'ajtën y'oyajtën ets jam këjxm kyuwa'këy, jamts t'ënëmaay ja naax kajpn: Jëtu'un ja Wintsën y'ënä'äny: ¿Tii ko miits yë Wintsën xykyapatuntë ja y'ënä'ämën tyiyajtën? ¿Wi'ix ko miitsëty ni'ikyë ja m'ëyo'on mjotmay xy'ëxkukëtë? Mëët ko miitsëty kë'ëm të xy'ëxmatstës, ëjts näjyëtu'unës yam n'ëna'any ko miitsëty n'ëxmatsa'antë.

²¹ E ja ja'ayëty wiink tja'akyujkëtë, paaty ojts nyäkyajpxëtë ets jäpyë tsajptëkoty tyaj'o'ktë, ja yajkutujkpë Joás yë'ë ojts kë'ëm tni'ënä'ämë.

²² Ja Joás ojts tja'atyëkooynyë ja oypyë ja tu'unën kajpxën mëti'ipë ënety ja teety Joiadá të tnajtstunën, ja Zacarías ja tyeety, mëti'ipë ojts kyäjpxyën ko y'o'këtäky ets y'ënäny: Yë Wintsën yë'ë yam y'ijxyp winë ets yë'ë nyija'ap wi'ix winë tnipaye'ey.

²³ Ma xyëkopk'atyën jää ojts yë Siria ja'ayëty tukja'të yë Joás, mëët yë mayjyä'äy aakpujxn mëët mëti'ipë tsip'ixyëtyën, ko jam jyajtë Judá ets Jerusalén wa'ats tyaj'o'ktaaytyë ja mëjja'aytyëjk, ixpëkyjyä'äytyëjk ets ja wintsëntëjk, yajpëtsëëmtaaytyë winë tiijaty ënety jamën ets tuknikäjxtë ja yajkutujkpë jam Damaskë.

²⁴ Ka'ap ënety nëkooyë nyimay'atë ja Sirië tsiptuunpëtëjkëty, je'eyëp ko Wintsën ojts kë'ëm tyajkutuky ets myëta'aktëty, mëët ko ënety ja Israel ja'ayëty të tkäjpxykyumëtoownaxtë ja Wintsën, mëti'ipë ja y'aptëjk y'ëwtajtën. Jëtu'un'äämpy ja Joás ojts tkëpety ja y'ëxëëkjot y'ëxëëk winma'any.

²⁵ Ënet ja Siria ja'ayëty ojts wyimpijnëtë, tëë ënety je'eyë tyajtsëtyutë ja Joás, nän jämyë ojts ja Joás kë'ëm ja tyuunpëtëjk nyikäjpxytyunëty ets yaj o'kë myaapäjnkëjxy jëtu'un tkumëtooy ja pyoky mëët ko ënety ja Zacarías të tyaj'ooky ja teety Joiadá ja myaank. Jam ojts tyajnaaxtëkëtë ma ja David ja kyajpnën, je'eyëp ko jëkäm, ka'ap jyamëty ma ja wintsëntëjk nyaaxtëjkëtën.

²⁶ Ja ja'ayëty mëti'ipë ojts nyikäjpxytyunëtyën jä'ä xyëëwajtë: Zabad yë Simat yë myaank, tu'uk Amón ja'ay ets Jozabad, Simrit myaank, Moab ja'ay.

²⁷ Ja y'u'unk y'ëna'k ja Joás ets ja tyu'unën kyajpxën ets wi'ix ojts ja käjpxynyajxpëtëjk tnimëtya'aktën ja Wintsën ko ënety ja tsajptëjk tkoj'oyëjä'äny, jap myiinta'ay kuja'ay ma ja nokyën mëti'ipë ja yajkutujkpëtëjk jyä'ä'ajtëpën. Ok ojts kyutëkëty ja myaank Amasías ma ja kutujktaknën.