2 Crónicas 23 - Biblia Dc en Mixe de Quetzaltepec

¹ Kom wëxtujk jëmëjt ja Joiadá twoowmujky yë wintsëntëjk mëti'ipë xyëëwajtëpën: Azarías, Jeroham myaank; Ismael, Johanán myaank; Azarías, Obed myaank; Maaseías Adaías myaank ets Elisafat, Zicri myaank ets t'ënëmaay ko tu'ukyë nyäyaj'itëtëty.

² Ets tyu'utëjkëtyë, ojts t'aye'eytya'atë ja naax kajpn maajaty ja Judá tnitänën; wyoowmujktaaytyë ja Leví ja'ayëty, ja teetytyëjkëty ets ja kopktëjkëty mëti'ipë Judá ja'ayëtyën, Israel ja'ayëty ets ojts nyëjkxtë jam Jerusalén.

³ Tëkokyë mëti'ipë ënety të myuktën ojts tuntë tu'uk ja käjpxytyu'unën mëët ja yajkutujkpë jam tsajptëkotm ma ja Wintsën ja jyëën tyëjkën. Tä ja Joiadá y'ënëmaayëtë: Ya'atë ënät miits mtuntëp: Tyaa xymyëët'atë ja yajkutujkpë ja myaank. Yë'ë patëp y'ënä'ämëty yajkutukëty, jëtu'un tä Wintsën ojts tnimëtyä'äkyën ja David ja y'u'unk y'ok.

⁴ Jëtu'un xytyuntëty: yë Leví ja'ayëty ets teetytyëjkëty, nitëkëëkpëky mnäyajwa'kxëtëty; tu'kpëky jam wyë'ëmtëty ma tsajptëjkën mëti'ipë tuuntëpën ko po'kxënxëëw, yë'ëts kyëwent'atëp ja tsajptëjk'aaw;

⁵ jatu'kpëky yë'ë jam wyë'ëmtëty ets yë'ë tkëwent'atëty akujktëjk kutujkëntëjk; jatu'kpëky jam wyë'ëmtëty ma ja kajpnpa'a kajpnuxën. E ja nimayjyä'äy jam yajpata'atëty ma ja tsajptëjkën.

⁶ Je'eyëp ko këtii nëkoo pën tyëkëty, yi'iyë teetyëjk tëkëtëp ets Leví ja'ayëty mëti'ipë tuunk të nyika'ajëtën. Yë'ë jyëkyäptëp tyëkëtëty jä'ä ko yë'ë të yajkënu'kxtë; yë mayjyä'äy jää tëjk ëkë'ëy y'ëwxitëty ets jää ja Wintsën ja xyëëw tyajmëjnajxëtëty.

⁷ Yë Leví ja'ayëty yë'ë nyapikëtëp yë yajkutujkpë, nitu'ukjaty ja ja'ayëty aak myëët'atëp ja tyi'pxn ets ja kyu'umën; pën nëkoo ajotkumonë tëkëjaanp tsajptëkoty nëjkxëp y'ooky. Xëmë tkëwent'atëty yë yajkutujkpë oy maa tyimnëjkxëty.

⁸ Yë Leví ja'ayëty ets Judá ja'ayëty ojts jëtu'un tuntë tä ënety ja teety Joiadá të tni'ënä'ämën. Nitu'ukjaty ojts twinkuwa'akëtë ja jyä'äyëty ets t'ijxtë tuuntë yajxon pënjaty tëjkëp ets pënjaty pëtsëëmp mëti'ipë ijx'ijtëpën ma ja po'kxënxëëwën, jä'ä ko ja teety Joiadá jëtu'un ënety të y'ënä'äny ko ka'ap tjëkyepy pën tjëjpwa'ktu'utëty ja tyuunk.

⁹ Tä ja Joiadá tmooytyääy ja tsiptuunpë wintsën ja ku'umën ets ja pujxn mëti'ipë ja David ënety të tyajtunyën, japë yajpaatyën tsajptëkoty.

¹⁰ Tääts twaatswijtstaay ja mayjyä'äy ma ja tsajptëjk'aawën, a'oytsyow ets anajnytsyow, winkon ma ja wintsë'këntyaknën, jëtu'unts tkëwent'atëty ja yajkutujkpë.

¹¹ Ënet ja teety Joiadá mëët ja y'u'unk y'ëna'k tyajpëtsëëmtë ja yajkutujkpë ja myaank ets tukukëëytyë ja kyujän ets tukuja'axtë ja kënu'kxy y'on. Ko tukuja'axtaaytyë ja on mëti'ipë ijty yajtukuja'axtëpën ja yajkutujkpëtëjk tääts ojts yajkënu'kxy ets nikajpxpäjtë yë'ë y'ënä'ämëty ets yajkutukëty. Tääts tyëjkëtyë yaxpë jojkpë, Wä'än yë'ë tuny.

¹² Ko ja Atalía tmëtooy ja ja'ay ya'axtë jyoktë ets tnikajpxpätë ja yajkutujkpë, ënät ojts pëyi'ikyë nyijkxy ma ja tsajptëjkën, ma ja mayjyä'äy jam yajpaatën.

¹³ Ets t'ijxy ko tamtëm tyänë ja yajkutujkpë potsywinm, ma ja tëjkëtyaknën. Jam pyë'am tam yajpaatë ja tsiptuunpë wintsëntëjkëty, xuxpëtëjkëty ets ja mayjyä'äy mëti'ipë xoontaktëpën mëët ja xuxpë wojpë, ëëpë yaxpë ets koopë. Ënet ja Atalía tkë'tstëëy ja wyit ets mëk yujk'ënany: pën të xykyë'ëyäkyës.

¹⁴ E ja teety Joiadá, ko jëtu'un t'ijxy, ënätyë tmëkajpxpëtsëëmtaay ja tsiptuunpë wintsëntëjk ets t'ënëmaay: Yajpëtsëmtë yë Atalía ma mayjyä'äyën ets pën panëjkxëp tukyo'kmëkonëtë tsujkn. Tä tyajpëtsëëmtë, jä'ä ko tëë ënety ja teety Joiadá tnikäjpxy ko këtii jap tsajptëkoty tyaj'ooktëty.

¹⁵ Ënet tmajtstë ets tyajpëtsëëmtë jamtsow ma ja nyitëjkëtyaknën ja kwaay mëti'ipë yajkutujkpë jyä'ä'ajtypyën, jam tyaj'o'ktë.

¹⁶ Ok ja Joiadá tuuny ja käjpxytyu'unën mëët ja naax kajpn ets ja yajkutujkpë, ojts nikajpxtë ko yë'ë xyëëwajtëp Wintsën ja nyaax kyajpn.

¹⁷ Tääts nyëjkxtaaytyë ma ja Baal ja nyitsajptëjkën ets ja wintsë'këntyakn tkujijnajxtë, wa'ats tukpu'ujëtyääytyë, piw nuuk tuuntaaytyë. Ja teety mëti'ipë nyiteety'äjtypyën ja Baal jämyë tyo'kpujxtë ma ja Baal ja wyintsë'këntyaknën.

¹⁸ Joiadá ojts tpëjktä'äky ijx'ijtpë këwent'ajtpë ma ja Wintsën ja tsyajptëjkën, yë'ë tyuknipëjk ja teetytyëjkëty ets ja Leví ja'ayëty, mëti'ipë ja David ënety tnikäjpxyën jam tyuntëty ma ja tsajptëjkën, tyaktëty ja wintsë'kën ja nino'oky nixämpyë Wintsën wyintuuy; jëtu'un y'ëwtëty ya'axtëty tä jap myinyën ma ja ënä'ämën tëyajtënën mëti'ipë ja Moisés jyääyën, mëti'ipë ja David tyuknipëjktakëyën.

¹⁹ Ojts tuknipëky ja ja'ay mëti'ipë y'atänëtëpën ja Wintsën ja tsyajptëjk'aaw, këtiipë pën tyëkëty ajotkumonë mëti'ipë ka'ap pyäätyën.

²⁰ Ënet tyajmujktaay ja ja'ay mëj'äämpyë y'itën tä ja wintsëntëjkëty, yajkutujkpëtëjk, kopktëjkëty, mëj tuunpëtëjkëty ets nitëkokyë ja mayjyä'äy. Tääts tyajtso'ontë ja yajkutujkpë jam ma ja tsajptëjkën ets ojts tyajnëjkxtë ma ja kutujktaknën; jamtsow tyëjkëtyë ma ja mëj tëjkëtyaknën jampë këjxm yajpaatyën. Judu'un tyajnaaxwä'tstë ja yajkutujkpë ma ja y'ënyääytyaknën,

²¹ ja mayjyä'äy janty jotkujk ojts nyäyjyawëtë. E mëët ko ja Atalía tëë ënety y'o'knë, ja naax kajpn jotkujk ojts wyi'imy.