2 Crónicas 21 - Biblia Dc en Mixe de Quetzaltepec

Ma ja Joram yajkutukyën

¹ Yë Josafat ko ojts y'o'knë, jam nyaaxtëjkëy ma David ja kyajpnën, mëti'ipë y'ap'ajt y'ok'ajtën. Yë'ë kutëjkëyë myaank mëti'ipë xyëëwajtypyën Joram.

² Yë Joram tam ijty näjyëtu'un myëkä'äxtëjk, yë Josafat yë y'ëna'k, jä'ä xyëëwajtë: Azarías, Jehiel, Zacarías, Micael ets Sefatías. Tëkokyë tyaapë ja'ayëty aakyë'ë myaank'ajtyp yë Josafat.

³ Ojts tyeety may myo'oyë putspujxn, poop pujxn ets winëjaty mëti'ipë tsowëtyën. Ojts näjyëtu'un myo'oyë naax kajpn mëti'ipë ijx'ity këwent'atyën mëët yë tsiptuunpëtëjkëty jam Judá, Joram yajmooy jä'ä ko yë'ë kä'äxkopk.

⁴ E yë Joram tim je'eyë tyëjkëy yajkutujkpë, tääts tyaj'o'ktaay ja myëkä'äxtëjk ets mëjja'aytyëjk mëti'ipë nyikopk'ajtëpën ja myëku'uktëjkëty jam Israel.

⁵ I'px mäjtsk ënety jyëmëjt ko tyëjkëy ënä'ämpë, tuktujk jëmëjt ojts y'ëne'emy jam Jerusalén.

⁶ Je'eyëp tëy, ko yë'ë, jëtu'un ojts winë ëxëëk tuny tä ja yajkutujkpëtëjkën mëti'ipë jam ojts tyuntën Israel ets tä ja Ahab ja y'u'unk y'okën, jä'ä ko ja tyo'oxytyëjk jä'ä ënety mëët tyu'kmëku'ukëty ja Ahab, paatykyëjxm ojts winë tuny aak ëxëëk Wintsën wyintum.

⁷ Yë Wintsën ka'ap t'a'ijxëy ets tyajkutëkoyëty ja David ja y'u'unk y'ok, jä'ä ko tëë ënety mëët ja käjpxytyu'unën tuny ko ka'ap nijëna'a tyajkutëkoyä'äny ja tyikts y'aats ja David, jä'ä ko tyaa t'ënëmaay ko jëtu'un y'itëty xëmë tä yë të'kxën jajënën.

⁸ Ma ënety yë Joram yajkutukyën, ënät yë Edom tmëtsiptso'ony yë Judá kajpn ets tpëjktäky kë'ëm tu'uk yajkutujkpë.

⁹ Ënet ja Joram mëët ja tyuunpëtëjk ets ja may kepy wintëkäämpë tsyo'ontë ets tsyiptuna'antë; tsu'um tnitso'ontë ets tukjajtë jam ja Edom ja'ayëty mëti'ipë ënety të yajnatukëtën.

¹⁰ Edom ojts tukmay ja wyinma'any ets nyäy'apëkpyëjktakë ets tpuwa'ktuty ja Judá, ëpëky nyäpyëjktakë. Ja kajpn mëti'ipë txëëwajtpën Libná ojts nyäy'ëpëkpyëjktä'äkyë, jä'ä ko ja Joram ojts ja Wintsën tja'atyëkooynyë, mëti'ipë ja y'aptëjk y'ëwtajtën.

¹¹ Ojts tkojy tsajptëjk ma ja'ay t'ëwtatën wiink wintsën, jam muum kopkkëjxm; yë'ë ojts ja naax kajpn yajwinma'anytyëkoyë ets ka'ap t'ëkmëj'ijxnëtë ja Wintsën mëti'ipë jamën Jerusalén ets ja y'aaw jyot ojts tyajkëjxtëkooynyëtë.

¹² E tëkok yë Joram ojts yë noky nyija'tyë, yë käjpxynyajxpë Elías kyäjx, mëti'ipë ënaanpën: Yë Wintsën mëti'ipë David y'ëwtajtën; yë m'apteety, jëtu'un y'ënä'äny: Mijts ka'ap oy winë xy'ëktuunë tä ja mteetyën Josafat ets tä ja mtatwelën Asá, mëti'ipë ojts jam Jerusalén yajkutuktën,

¹³ ni'ikyë winë aakjëtu'un xytyuunë tä ja yajkutujkpë y'ijtën mëti'ipë jam ënä'ämtën Israel; tyam mijts ja poky mtuka'ajëp ko ja Jerusalén ja'ayëty aak je'eyë ja nëë poky tuunëtë tkajpxnëtë jëtu'un tä ja Ahab ja jyä'äy y'ëtëtstën. Mijts ni'ikyë ja mmëku'uk mmëkä'äx të xyaj'o'knë mëti'ipë oy të jyuuky'atën ets mijts ëxëëk ja winma'any të xyajpëtsëmy.

¹⁴ Paaty tyam yajkëta'akäämpy ja Wintsën ja ëyo'on jotmay ma mijts ja yë mkajpnën, ma ja m'u'unk m'ëna'kën, ma m'u'unk mto'oxytyëjkën ets ma mkam mtu'ujën.

¹⁵ Ma mijtsën minaanp ja yuu pa'am. Jotpa'am matsanëp mëkpë ets ka'ap tsyooymyäyä'äny, koonëm ja mjot mtiinty nya'tspëtsëmëty.

¹⁶ Ënet ja Wintsën kë'ëm t'ëwatsy ets ja filistejë ja'ayëty ets ja Árabe ja'ayëty jampë tsyëënëtën Cus tukjoot'anpëktëty ja Joram;

¹⁷ ënät tsyo'ontë ets tukjëtijtëtyääytyë ja naax kajpn ets tyajpëtsëëmtaaytyë jam winë mëti'ipë ja naax kajpn myëët'ajtypyën; wa'ats tyajpëtsëëmtaaytyë winë mëti'ipë jap yajpatpën akujktëkoty këmoontëkoty, ma ja yajkutujkpë y'ëne'emyën, ma ja jyëën tyëjkën ets ma ja y'u'unk y'ëna'k y'u'unk tyo'oxytyëjkën. Yi'iyë ojts wyi'imy yë Joacaz, ja mutskpë.

¹⁸ Ko jëtu'un y'ëktuun y'ëkjajtë, ënät ja Joram ojts mëkjotpa'am pyäätyë, mëti'ipë ka'ap tsyooymyäyën.

¹⁹ Mäjtsk jëmëjt ojts pyikyë, kommäjtsk jëmëjt tääts ojts pyutspëtsëëmnë ja tyiinty ets jëtu'un y'o'ky mëët ja pëjkën ijxën mëkpë. Ja nyaax kyajpn nitu'ukën ojts ja tsiin tkayajmëjjëtë ma jeexyë tnimon tnituktën ko ja Joram y'o'ky, jëtu'un tä ijty tu'unën'atën ja ja'ayëty ko pën yajkutujkpë y'ooky.

²⁰ I'px mäjtsk jëmëjt ënety jyëmëjt ko tyëjkëy yajkutujkpë jam Jerusalén ets tuktujk jëmëjt ojts y'ëne'emy. Ko y'o'ky ni pën kyanimiinë. Jam nyaaxtëjkëy ma ja David ja kyajpnën, je'eyëp ko jam jëkäm ma ijty nyaaxtëkëtën ja yajkutujkpë ja wyintsëntëjkëty.