2 Crónicas 20 - Biblia Dc en Mixe de Quetzaltepec

Ma ja tsip tyunyën mëët ja Moab ets Amón

¹ Tu'kxëëw tu'kjëmëjt ojts yë Moab ja'ayëty ets Amón ja'ayëty nyäpyëk nyämyatsëtë mëët yë Meunim ja'ayëty ets tukmujktë yë Josafat;

² ënät tu'uk mäjtsk ja'ay nyimiinë ets y'ënëmaayë: Jam Edom, mëjmejy awinaxy, ma yajtijyën Mar Muerto; tëë jam nimay ja'ay mnitsoonyë, mëti'ipë mnipëtë'ëkanëpën. Tam tyam yajpaatë ma txëëwatyën ja itjot Hazezón-tamar. Ma näjyëtu'un yajtijyën En-gadi.

³ Josafat ojts tsë'ëkë tyuktëkëty ets tuk'ëwa'anëy ënätyë ja Wintsën, tääts tni'ënä'ämëy ets nitëkokyë ja'ayëty jam ayuu y'itëty,

⁴ tä ja ja'ay myujktaaytyë jam Judá ets t'amëtoowtë ja putëjk pupäjtën ma Wintsënën. Ojts ja'ay myiinta'atë jampë tsyëënëtën kajpntum maajaty ja Judá ja jyä'äy yajpaatën.

⁵ Tä ja Josafat tyëjkëy jam kajpxpë ja'ay'itkujky, ma ja Judá ja'ayëty të nyiye'eypyätën jam Jerusalén tsajptëjk ëkë'ëm,

⁶ ets ja Wintsën ojts tmëkäjpxy ets y'ënäny: Wintsën ma mijts mTiosatyën, mëti'ipës ja nteety n'ap y'ëwtajtën, mijts ma m'ityën tsajpjotm, mëti'ipë ja naax kajpn y'ënä'ämtääpyën. Jam ma mijtsën jam yajpaaty ja mëk'ajtën; ni pën tkajëkyepy mjëjpkuwa'akëtëty ëkë m'awa'ktukëtëty.

⁷ Wintsën, mëti'ipës n'ëwtajtëpën, m'ëxwojptaay ja ja'ayëty yaa, ma tyam tsyëënëtën ja Israel ja'ayëty ets yë'ë xykyë'ëmooy xëmëkyëjxm ja Abraham ja y'u'unk y'ok, mëti'ipë oy mëët mnäjya'awëyën.

⁸ Ko yaa tsyënaaytyaknpëjktë, ënät ojts tu'uk ja tsajptëjk tkojtë ets y'ënantë:

⁹ Pën jää ëëts mpaatë n'ixtë ja yuu xëëw, jëën tsip, ëkë ja pa'am ëyo'on, mëët ko ënety ëëts të mpokytyuntë, ënätyë nmina'antës ma ya'atë tsajptëjkën, jä'ä ko nija'awëtyëpës ko yaa myajpaaty mijts Wintsën. E jää ma ënety jëtu'un o'ktëy ëëts njajnëtë nkëpäjnëtë jää nmëkajpxa'antë ets nëjkxëp xymyëtoy ja n'amëto'ow mpëjktso'owënëty ets nëjkxëpës xyajtso'oktë.

¹⁰ E tyam, ja Amón ja'ayëty, ja Moab ja'ayëty ets mëti'ipë jam tso'ontëpën ma y'itjotëtyën ja Seir ja'ayëty, ma ojts xynyikäjpxyën ko ka'ap jam ja Israel ja'ayëty nyëjkxtëty ko jap tsyo'ontë Egiptë, je'eyë ojts tnaye'eytyë ets ka'ap wi'ix tuuntë.

¹¹ E yë'ëjëty jëtu'unts ënät tyajwinpitë, tyam je'eyë xynyipëtë'knëtës ets xypyëjkëjanëtës ja naax kam mëti'ipë mijts xymooytyënës etsës njä'ä'atëty.

¹² Wintsën ma mijts myaj'ëwtatyën, ¿tii këtiijën xytyukkëpäta'any ko ëxëëk xytyuntësë? Ëëtsëty ka'apës näy'a'ixëtë mëët ntsiptuntëty jä'ä ko nimay yë'ëjëty. Ka'apës nijawëtë tiijës ntuntëp paaty mijts tu'ukyë myajtuk'ijxpety.

¹³ Ja mayjyä'äyëty mëti'ipë jam tso'ontëpën ma Judá y'itjotmën aak tänë ënety jam yajpaatë Dios wintum, tam ja to'oxytyëjkëty, mëët yë y'u'unk y'ëna'këty ets mëxu'unktëjkëty.

¹⁴ Tam ënety ja mayjyä'äy yajpaatë ko tu'uk ja ja'ay ojts kyajpxë'ëky, yë Wintsën yë myëk'ajtën y'oyajtën ojts tyuktëkëty, jä'ä xyëëwajtyp Jahaziel, Zacarías myaank ets Benaías y'ok'u'unk, Jeiel myaank, Matanías y'ok'u'unk, Leví ja'ay, Asaf y'u'unk y'ok ets y'ënäny:

¹⁵ Mëtoow'itë ya'atë aaw ayuk mëti'ipës yam nikajpxäämpyën ma miitsëtyën Judá ja'ayëty, mëti'ipë yaa ijtëpën tsënaaytyëpën Jerusalén ets näjyëtu'un mijts Josafat. Jëtu'un m'ënë'ëmxëtë yë Wintsën: Këtii ninu'un mtimtsyë'ëkëtëty ma tääpë maymyëtsipën, jä'ä ko ma ya'atë tsip tyuna'anyën ka'ap myiitsëty mtsiptuna'antë, yë Wintsën yë'ë tsiptunaanp.

¹⁶ Jopynyëm xynyinëjkxtëty ets mëët mtsiptuntëty. Tyam tamnëm ja kyu'ta'antë Sis, e miitsëty jäätsow xy'aye'eytyuktëty ma wokpa'ajën mëti'ipë jam yajpatpën ma ja të'ëts'itjot txëëwatyën Jeruel.

¹⁷ Ma ya'atë tsip tyuna'anyën ka'ap myiitsëty mtsiptuna'antë. Miitsëty je'eyëp ko mnëjkxtë ets jam mna'ix mnawoontëty, je'eyëp ko ënät xy'ixtëty wi'ix ja Wintsën tuna'anyën ya'atë kajpn ets wi'ix myajtso'oka'anëtën. Miitsëty Jerusalén ja'ayëty ets miitsëty Judá ja'ayëty, këtii ninu'un mtsë'ëkëtëty; nëjkxtë jopy wiinkuwa'akëtë tääpë mëtsip, yë Wintsën yë'ë mëët myajpaata'antë.

¹⁸ Ënet ja Josafat nyäkyoxtënaaytyakë ets nyaax'ijxy nyaaxkooy ets ja Jerusalén ja'ayëty, Judá ja'ayëty näjyëtu'un, t'ëwtajtë tmënu'kxtaktë ja Wintsën.

¹⁹ Yë Leví ja'ayëty, Quehat y'u'unk y'ok ets Coré y'u'unk y'ok, ënätyë tyëjkëtyë ëëwpë yaxpë ets tukxoontaktë ja Wintsën, mëti'ipë ja Israel ja'ayëty y'ëwtajtëpën.

²⁰ Komjëpom, jopyëp ojts pyëtë'kojtë ets tyu'utëkëja'antë, nyëjkxa'antë jam Tecoa, jam të'ëts'itjotm. Ka'anëm ënety tyu'utëkëtë ko ja Josafat y'ënëmaayëtë: Mëtoow'itë ya'atë aaw ayuk miitsëty Jerusalén ja'ayëty ets Judá ja'ayëty: Yë Wintsën yë'ë mëpaat tu'ukyë xytyuk'ijxpätë ets akujk jotkujk m'itëty, tuk'ijxpätë ijxtëm ja tyuunpëtëjk y'ëna'antën ets xy'ëk'ixtëty ko aak'oy winë mwinpëtsëma'anxëtë.

²¹ Ko ja naax kajpn tukmëmëtyaktaay ja aaw ayuk, ënät tnikajpxpejty ja ja'ay mëti'ipë ëwtëpën mëët wyitëty tyujkxyëty kënu'kxypyë ets yë'ë jëyëjp nëjkxtëp, twinye'eytyëty ja ja'ay mëti'ipë nëjkxtëpën tsiptuunpë ma ja mëtsip yajwinkuwa'akëja'anyën ets y'ëwtëty: Kukajpxëtë ja'awëkyëta'aktë ja Wintsën xëmë, jä'ä ko ja tsyojkën jya'awën ijtëëp yë xëmë.

²² Ko tyëjkëtyë ëëwpë yaxpë, ja Wintsën yë'ë ojts kë'ëm tuknipëjktaakë ets ja Moab ja'ayëty ets ja Seir ja'ayëty mëti'ipë jam tso'ontëpën, tsuu poj jyajta'atëty, jëtu'un ojts ka'ap y'ëkmëtaknëtë ma ënety të tjanimintën ets ëxëëk tuna'antë ja Judá ja'ayëty.

²³ Jä'ä ko ja Moab ja'ayëty ets ja Amón ja'ayëty ni'ikyë ojts tnipëtë'knëtë ja Seir ja'ayëty, mëti'ipë jam tso'ontëpën, ko tyaj'o'ktaaytyë tääts aakyë'ë nyänyiwa'këtyë ets nyäyaj'o'këtë jaxim jayam.

²⁴ Ko ja Judá ja'ayëty jam jyajtë ma ënety jam tsyiptuna'antën të'ëts'itjotm, ënät t'ijxtë ko tëëtëm nya'o'ktaaynyëtë ja myëtsipëty, je'eyë kujy ye'epy ja o'kpë yaj'ijxnëtë naaxkëjxy; ma jëtu'un ja mëtsip y'o'ktaaytyën ni pën ojts tka'ëkjëkyäjpnë kyä'äktëty.

²⁵ Ënet ja Josafat mëët ja jyä'äy myiintë ets tpëjkmujktaaytyë winë mëti'ipë ënety ja mëtsip të tyajwë'ëmtën, mëti'ipë të tni'o'ktu'utën. Ojts tpaatë may ja jëyujk, tsajpkaa, may ja tsaa, pujxn mëti'ipë myëtsiptuuntëpën, may ja wit tujkxy ets winëjaty mëti'ipë tsowëtyën. May jam winë t'ëxmajtstën ja mëtsip, tëkëëk xëëw pyoxtë ja Josafat mëët ja jyä'äy ets tpëjkmujktaaytyë winë.

²⁶ Kom taxk xëëw jam myujktë mëj joyjotm ma txëëwatyën Beracá ets jam t'ëwtajtë ja Wintsën. Paaty tyajxëëwpäjtë tampë ja it naaxwiinyëtë Beracá, tyampaat je'eyëm jëtu'un yajtijy.

²⁷ Tä ja Judá ja'ayëty ets ja Jerusalén ja'ayëty, ojts wyimpijnëtë; Josafat ojts tyu'uwinye'eyëtë, akujk jotkujk ojts wyimpijnëtë jam Jerusalén, jä'ä ko ojts ja Wintsën ja xoontakën myo'ojëtë mëët ko ënety ja myëtsip ëxëëk të jyat të kyëpätë.

²⁸ Ko jyajtë jam Jerusalén, aakjam nyëjkxtaaytyë ma tsajptëjkën ëëwpë yaxpë mëët ja xuxpë wojpë.

²⁹ Ko yajnija'awëy ko ja Wintsën tëë tyaj'o'kta'ay ja mëtsip mëti'ipë ja Israel ja'ayëty tsyip'ijxtëpën, ënät ja wiinkëtypë ja naax kajpn tyuktëjkëtyë ma Wintsënën.

³⁰ Jëtu'un'äämpy ja Josafat ojts akujk jotkujk tyuny kyäjpxy ma ojts y'ëne'emyën, jä'ä ko ja Wintsën tëë ënety myo'ojëtë ja akujkajtën jotkujk'ajtën mëët ja naax kajpn mëti'ipë mëët nyäpyaatëtën.

Wi'ix ja Josafat yajkutujkyën

³¹ Josafat ko ojts tyëkë yajkutujkpë jam Judá, jä'ä ënety jyëmëjt i'px majkmokx; i'px mëkoxk jëmëjt tyuuny jam Jerusalén. Jä'ä ijty tyaak txëëwaty Azubá, yë'ë nyëëx yë Silhí.

³² Josafat oy winë tuuny, jëtu'un tä ja tyeetyën Asá. Ja tyu'unën kyajpxën oy ja Wintsën t'ijxy.

³³ Je'eyëp tëy ko ka'ap jyëwa'ktaay ja tsajptëjk ma ijty ja ja'ayëty t'ëwtatën winë mëti'ipë ka'ap ja Wintsën oy t'ixyën. Ja ja'ayëty ja y'aaw jyotëty ka'ap winë aaw winëjot tkë'ëyajktë ma ja Wintsënën mëti'ipë y'aptëjk y'ëwtajtën.

³⁴ Ma ja Josafat yajnimëtyä'äkyën wi'ix tyuuntso'onyën ets wi'ix tyuunkëjxyën, jap ja myiny këxja'ay ma ja nokyën mëti'ipë Jehú jyä'ä'ajtypyën, Hananí myaank ets jap näjyëtu'un yajkajpxpaaty ma nokyën mëti'ipë jyä'ä'ajtëpën ja ja'ayëty mëti'ipë yajkutujktën jam Israel.

³⁵ Yë Josafat mëti'ipë ënety jam yajkutujkpën Judá, ojts ok mëët oy nyäjyawëty yë Ocozías, jampë yajkutukyën Israel, mëti'ipë ënety ka'ap oy jyä'äy'ätyën.

³⁶ Tëkok ojts nyäkyajpxëtë ko tyajkoja'antë tu'uk yë kepy nëëwinye'epyë mëti'ipë tyuknëjkxtëpën jam Tarsis. Jam tuunk'ajtë Ezión-géber.

³⁷ Ënet yë Eliézer, jampë kyukajpnëtyën Maresá, yë myaank yë Dodavahu, ojts tukmëkäjpxy yë Josafat ets t'ënëmaay: Yë Wintsën yë'ë tyunäämpy piw nuuk mëti'ipë të xyajkojyën, mëët ko oy mëët të mnäjyawëty yë Ocozías. Ja kepy nëëwinye'epyë piw nuuk jyänty jya'ajtaay, jëtu'un ojts ka'ap nyëjkxnëtëpë jam Tarsis.