2 Crónicas 19 - Biblia Dc en Mixe de Quetzaltepec

Ma ja Jehú t'ojyën ja Josafat

¹ Josafat oy mëk wyimpijty ma kyutujktaknën jam Jerusalén.

² E yë Jehú, Hananí myaank, jam jyëjpaatë'kë tu'u'am ets yajtëëwë: ¿Wi'ix ko të xypyutëkë ja'ay mëti'ipë ëxëëk ja'ay'ajtpën ets mijts të mnäypyëjktä'äkyë tä jeexyë Wintsën xymyëtsip'atyën? Mëët ko jëtu'un të m'ëtë'ëtsy tëë Wintsën mtukjoot'anpëkyë.

³ Je'eyëp ko mijts tëë näjyëtu'un winë oy xytyuny, ko ojts xyajjëwa'kta'ay yë Aserá y'awinax mëti'ipë jää kajpnjoty may të yajpaatyën ets ja Wintsën jä'ä të xyajmëjnaxy.

Ma ja Josafat tnikajpxpetyën ja kutuunktëjk

⁴ Josafat jam ijty tsyëënë Jerusalén, je'eyëp ko xëmë nyijkxy jam ma kyajpnën, tsyoony jam Beerseba ets nyijkxy ma tunjotpë kopkjotpë ja itjotmën, mëti'ipë Efraín jyä'äy nyitënaaytyëpën, yë'ë tyuk'ëne'empy ja jyä'äy ets wyimpitëty ma ja Wintsënën.

⁵ Ojts ëpëky näjyëtu'un tnikajpxpety ja kutuunktëjk maajaty ja kajpnën mëti'ipë këwent'aty ijtëpën ets ta'tspëky mëët ja mëjnapotsy.

⁶ Jëtu'un t'ënëmaay ja kutuunktëjk: Yajxon winë oy xynyipaye'eytyëty, jä'ä ko miitsëty ka'ap yë'ë xyajtuna'antë mëti'ipë ja naaxwiinyëtë ja'ay wyinma'any'äjtypyën, yë'ë myajtuntëp mëti'ipë ja Wintsën nyikäjpxypën ko ja nëë poky xynyipaye'eytyëty.

⁷ Ets t'ënëmaay: Mwinkutsë'ëkëtëp yë Wintsën ets mëk xytyim'ixtëty wi'ix winë oy xytyuntëtyën, jä'ä ko Wintsën ka'ap jëtu'unyë tnani''ijxnaxa'any ja ka'apë myëtëyëtyën ja tu'unën kajpxën, ka'apë pën tii oy tnipaye'eyën, ëkë mëti'ipë ëxëëktu'un ëxëëkajpxën nyimeenypyijkpyën.

⁸ Josafat ojts näjyëtu'un tnikajpxpety Leví ja'ayëty maajaty ja kajpnën, ja teetytyëjkëty ets ja mëti'ipë ja jyiiky myëku'uk nyikopk'atëpën jam Israel, yë'ë nyipaye'eytyëp ja amay jotmay ma ja Wintsën yaj'ëwtatyën ets ma ja juukyajtën tyu'uye'eyën naaxjoty kajpnjoty jam Jerusalén.

⁹ Ets tuk'ënëmaay ya'atë tu'uwinwo'ow tu'uwinwijtsën: Miitsëty xëmë winë oy xytyuntëty, mëët ja tëyajtën ets oyjyot oywyinma'any ma Wintsënën.

¹⁰ Oy tyimmëti'ipë jotmayëty mëti'ipë ënety myëmiintëpën ja kunaax kukajpn, oy yë'ëjëty ja'ay wiink kajpnëpë muum tsyoontën, ko myintëty yaa ets myajtëwëtëty pën tu'uk ja o'kpë mëpaat yajnipaye'ey ëkë ka'ap ets pën mëpaat jëtu'un yajtëytyuny ja pokyjyä'äy ijxtëm ja tëyajtën, ënä'ämën, kuttujkën, kajpxwijën myinyën; jëtu'unpë jotmay jëyëjp xyajtëwtëty ja Wintsën, këtiipë nëjkx miits ja Wintsën mtukjoot'anpëkëtë ets këtiipë näjyëtu'un ja mëkunaax mëkukajpn yajtukjoot'anpëktëty.

¹¹ Yë teety Amarías, yë'ë nëjkx tnikopk'aty tëkokyë winë ma yajnipaye'eyä'änyën ja jotmay ma ja Wintsën yaj'ëwtatyën. Yë Zebadías, yë Ismael myaank, mëti'ipë Judá jyä'äy nyikopk'ajtypyën, yë'ë nyipaye'eyëp ja amay jotmay ma ja ja'ayëty tmëët'atën winë jotmay. Yë Leví ja'ayëty yë'ë nëjkx miitsëty m'apupätëtë. E amëk jotmëkts m'itëty. Yë Wintsën putëk pupätëtëp ja ja'ay mëti'ipë winë oy tyuuntëpën.