2 Crónicas 17 - Biblia Dc en Mixe de Quetzaltepec

Ma ja Josafat y'ëne'emyën

¹ Ja Asá yë'ë ojts kyutëkëty ja myaank Josafat, mëti'ipë amëk jotmëk ënä'äm yajkutujkën.

² Ojts tpëjktä'äky këwent'ajtpë maajaty yë Judá tnitänën ets maajaty ja naax kajpnën mëkpë yajpaatën mëti'ipë naapotsyën; maajaty ja Efraín ja jyä'äy y'itë tsyëënëtën, wa'ats jam tyajwintujktaay mëët ja këwent'ajtpë.

³ Yë Josafat ojts Wintsën pyutëkëty jä'ä ko oy winë tuuny jëtu'un tä ijty ja David winë tunyën, mëti'ipë y'ap'ajt y'ok'ajtën; oy ojts tyuunk tyajtso'ontä'äky. Yë'ë ka'ap nëkoo tii t'ëwtajty ets ka'ap twinkoxtënaay awinax mëti'ipë Baal jyä'ä'ajtypyën,

⁴ yë'ë tu'ukyë tyuk'ijxpäjt ja Wintsën mëti'ipë ja tyeety y'ëwtajtën. Ojts tpatuny ja ënä'ämën tëyajtën; ka'ap ojts nëkoo tii winë tpa'ëtë'ëtsy tä ja Israel ja'ayëtyën.

⁵ Paatykyëjxm ja Wintsën t'ëwatsy ja ja'ay ja jyot wyinma'any ets tu'ukyë y'itëty ets t'oyjyawëtëty ja Josafat ma y'ëne'emyën ets ma yajkutukyën; tëkokyë yë Judá ja'ayëty winë ijty tjanty nyamo'otë ets mëj këjää ojts yë wit meeny tpaaty t'ixy ets mëj'äämpy ojts nyäxy.

⁶ Oy winë tuuny ets jä'ä ojts tpaye'ey ja në'ë tu'u oypyë mëti'ipë Wintsën tsyojkpyën, yajjëwa'ktaay tëkokyë ja tsajptëjk jampë muum tunkëjxm kopkkëjxm yajpaatyën ma ja Aserá ijty t'ëwtatën.

⁷ Kom tëkëëk jëmëjt ja tyuunpë tkejxy mëti'ipë txëëwajtëpën Ben-hail, Absadías, Zacarías, Natanael ets Micaías, jam Judá ets tukni''ixëja'any mëti'ipëjaty kajpn jamën,

⁸ ojts tukpakexy ja Leví ja'ayëty mëti'ipë txëëwajtëpën Semaías, Netanías, Zebadías, Asael, Semiramot, Jonatán, Adonías, Tobías ets Tobadonías. Yë'ë jämyëët'ajtëtëp ja teety Elisamá ets Joram.

⁹ Tä tukmëkäjxëy ja noky ma ja Wintsën ja y'ënä'ämën tyiyajtën myinyën këxja'ay ets ja ja'ay tuk'ijxpëktëty mëti'ipë jam tsënaaytyëpën Judá ets ma tëkokyë Judá kajpnën. Ojts jëtu'un tjantytyuntë ojts t'aye'eytya'atë ja naax kajpn.

¹⁰ E tyamts ja wiinkëtypë ja kuttujkën mëti'ipë myëwinkon'ajtëpën ja Judá kajpn tsyë'këtyëp ja Wintsën, paaty ka'ap nëkoo tmëmayëtë ja Josafat.

¹¹ Ni'ikyënëm ja filistejë ja'ayëty tmëmiintë winë tä apëjk atu'unënyën, tä pu'ts pujxnën, poop pujxnën ets näynyamo'ojë. Näyjyëtu'un ja Árabe ja'ayëty ojts tmëmintë wëxtujk mil ja wëxtujk mëko'px yë kupixyny ets näjyëtu'un ja tsajppax.

¹² Jëtu'un'äämpy ja Josafat ojts myëktä'äky ets wyimpejty ja y'ënä'ämën kyutujkën. Koj yë tëjk kanaakpëky jam Judá ma yajpëjkë'ëkëtyën ja aaypyajk ujtspajk mëti'ipë ijty jyë'kxtëpën,

¹³ May tmëët'ajty naax kam jam Judá. Myëët'ajtyp ijty näjyëtu'un jam Jerusalén ja'ay mëti'ipë jotmëkëtyën, mëti'ipë yajtsiptuumpyën,

¹⁴ e tsyaats ja xyëëw yajnikajpxa'antë: Jam Judá yë'ë ijty tsiptuunpë wintsën ja Adná ets tëkëëk mëko'px twintënaay ja tsiptuunpëtëjk.

¹⁵ Ojts pyutëkëty yë Johanán, nimäjtsk mëko'px ja majkta'px ja tsiptuunpë twinkuwa'këy.

¹⁶ Ojts pyutëkëty yë Amasías, yë myaank yë Zicri, mëti'ipë ënety kë'ëm të nyäy'ëwaanëtyën ko pyutëkëja'any ma ja Wintsënën; nimäjtsk mëko'px mil ja tsiptuunpë twinkuwa'këy.

¹⁷ Jam ma ja Benjamín ja y'itjotmën, yë'ë ojts jam wyi'imy tniwintsën'atëty ja tsiptuunpë yë Eliadë, tyaapë ja'ay yajxon ijty jyotmëkëty ets tsip'ixy, nimäjtsk mëko'px twinkuwa'këy ja ja'ay. Aaktam yë tyi'pxnëty ets kyu'umënëty ets akëëytyuk mëti'ipë myëtsiptuuntëpën,

¹⁸ ojts pyutëkëty yë Jozabad mëët nitu'kmëko'px ja majkta'px mil ja ja'ay mëti'ipë tsiptuuntëpën.

¹⁹ Ya'atë ja'ayëty yë'ë ojts tputëkëtë ja yajkutujkpë, ko ja tsip tyuunë; ëpëky ja ja'ayëty mëti'ipë jam kajpntum këwent'ajtëpën.