2 Crónicas 16 - Biblia Dc en Mixe de Quetzaltepec

Ma ja Asá tunyën ja käjpxtyu'unën mëët yë Ben-adad

¹ Ma ënety i'px majkmokx tu'uk jëmëjt y'apetyën, ma ja Asá yajkutukyën, jam Israel, yë Baasá jää jëmëjt ojts tnitëkë yë Judá kajpn ets tyajnatujky yë Ramá këtiipë ni pën mëët oy nyäyaj'itëtëty yë Judá yajkutujkpë.

² Asá wa'ats tju'taay ja pu'ts pujxn ets ja poop pujxn japë yajpaatyën tsajptëkoty ets ma kutujkëntëjkën, tääts tuknikejxy ja Ben-adad, jampë Sirië yajkutukyën, mëti'ipë jam Damaskë tsënääpyën. Ojts tuknikexy ya'atë aaw ayuk:

³ Tsojk tu'uk käjpxytyu'unën nyaj'apatëmë, jëtu'un tä ojts tyaj'apaatëtën ja n'ap'ajtëmë. Tyam ntuknikexy ya'atë pu'ts pujxn ets ya'atë poop pujxn. Kajpxtuk yë käjpxtyu'unën mëti'ipë mmëët'ajtypyën mëët yë Baasá yajkutujkpë, jampë y'ëne'emyën Israel, këtiipës nëkoo xyajjotkëxëty.

⁴ Ben-adad y'oymëtoow ijxtëm ja Asá y'ënë'ëmxëtyën, paaty tkejxy ja tyuunpëtëjk mëti'ipë tsiptuuntëpën ets tnitëkëtëty ja Israel ja'ayëty ma kyajpnëtyën. Jëtu'un tjä'äpëjktë ja Iión, Dan, Abel-maim ets tëkokyë ja naax kajpn mëti'ipë jamën ma ja Neftalí jyä'äyëty jyi'kxy pyiky tpëjkë'ëktën.

⁵ Ko yë Baasá tnija'awëy, ënät t'ëxmajtsy yë Ramá kajpn ma ënety jam tnakoj'ëwtityën ets ja tuunk jyëjpwa'ktuty.

⁶ Tä ja yajkutujkpë Asá tniwa'ktaay ja naax kam mëti'ipë ënety jamën ma Judá y'itjotmën, yajtso'ontaay jam Ramá ja tsaa ets ja kepy mëti'ipë ja Baasá ënety të tyajtunyën ma ja Gueba ets ja Mispá të tkojyën.

⁷ Jä'ä xëëw jä'ä jëmëjt ojts ja Wintsën ja kyäjpxynyajxpë Hananí nyijkxy ma ja Asá yajpaatyën ets t'ënëëmëja'any: Yë Siria ja'ayëty yë tsyiptuunpëtëjk tëë ja m'ëxmatsyë, jä'ä ko mijts yë'ë të xytyuk'ijxpety ets ka'ap yë'ëjëty yë mWintsën ja myëk'ajtën të xymyëmay të xymyëtajy.

⁸ ¿Këtii xyjyä'ämyetsyë ko yë Etiopíë ja'ayëty ets Libië ja'ayëty nimay yë'ëjëty mëti'ipë tsip'ixyëtyënë? Oy jeexyë jyanimay'atë, mëët ja pyujxnëty, jyëyujkëty, kyëwaayëty mijts ka'ap xytsyë'këy ets ka'ap xyajmëtaky mëët ko ja mjot mwinma'any jam xypyëjktäky ma ja mWintsënën.

⁹ E Wintsën yë'ë wa'ats nyija'awëtyääpy tiijaty tuunëp jajtëp muum naaxwiinyëtë apëtsëmy ets tjotmëkmo'oy ja ja'ay mëti'ipë winë aaw winëjot tuk'ijxpäjtëpën. Mijts tëë jëtu'un mwinma'anytyëkoy, paaty winë të xytyuny tä tu'uk ja'ayën mëti'ipë winma'anytyukën. Jä'ä ko tyam wäänëni'ik yë tsip käjpxy xymyëtata'any.

¹⁰ Ënet ja Asá yajxon tukjoot'anpëjky ja Wintsën ja kyäjpxynyajxpë, ojts tsumy tmatsy. Näy jä'ä xëëw ojts jam ëxëëk yë ja'ay tuny t'ënëëmë.

Ma ja Asá y'ookyën

¹¹ Ja nyikäjpxy nyimëtyä'äky ja Asá, wi'ix tsyo'otäkyën ets wi'ix jyëjpkëjxyën, jap myiinta'ay kuja'ay ma ja nokyën mëti'ipë jyä'ä'ajtëpën ja yajkutujkpëtëjk jampë ojts y'ënä'ämtën Judá ets Israel.

¹² Ma y'i'px majkmokx majktaxk anyën jajëmëjt ma ënety yë'ë yajkutukyën, jää ojts mëk pa'am pyäätyë tyekykyijxy; ko ya'atë pa'am myajtsë ka'ap timyjä'ämyejtsy ninu'un yë Wyintsën, yë'ë yajmëj'ajt yë tsooyëpëtëjk.

¹³ Jää ojts y'o'knë ma wëxtyikxy tyu'uk jëmëjtpetyën ja kyutujkën,

¹⁴ ets jam nyaaxtëjkëy ma y'o'kpëjutën mëti'ipë nyipëjktakëyën ma ja David ja kyajpnën. Jam yajkëxko'ky ma tu'uk ja maapäjnën oypyë y'oytyunyëtyën mëët ja tsooy ets ja nëë mëti'ipë pa'akxu'kpën. Ets tyajmëjjëtyë tu'uk ja mëj jëën, mëti'ipë yë'ë yajtukmëjja'awëyën.