2 Crónicas 12 - Biblia Dc en Mixe de Quetzaltepec

Ma ja Sisac tnitëkën ja Judá y'itjot

¹ Ko Roboam nyäjya'awëyë tëë jyotkujkë ma ja kyutujktaknën ets amëk jotmëk yajpaaty, ënät ojts ka'ap t'ëkpatuunë ja Wintsën ja y'ënä'ämën tyiyajtën ets ja Israel ja'ayëty aakjëtu'un ojts y'ëtëtstaknëtë.

² E jää ma myëmëkoxk jëmëjtpejtyën, ma ënety ja Roboam yajkutukyën jää ojts ka'ap ja Wintsën t'ëkmëj'ijxnëtë. Ënet ja Sisac nyijajtëtë, mëti'ipë ënety jap yajkutujkpën Egiptë ets tnitëjkëy ja Jerusalén kajpn,

³ ja Sisac jä'ä ja jyä'äy nyimayëty mëti'ipë kepy wintëkäämpëjoty miintën nitu'kmil ja mäjtsk mëko'px, nitëkë'px mil jëyujkëjxy, ets ëpëky nimay jyaak miintë: Libië ja'ayëty, suquien ja'ayëty, ets Etiopíë ja'ayëty.

⁴ Ojts tnitsiptuny ja ta'tspëkyëtypë ja kajpn mëti'ipë ënety jam yajpatëpën ma Judá y'itjotmën ets jëtu'un tyimja'ajty jam Jerusalén, aak jyä'äniwaantaay ja naax kajpn mëti'ipë ënety të tmëmëtä'äkyën.

⁵ Ënet ja Wintsën ja myëtuunpë Semaías ojts nyäwya'këxë'ëkyë ma ja Roboam yajkutujkpën ets ma ja mëjja'aytyëjkën, Judá ja'ayëty mëti'ipë ënety jam Jerusalén të tyu'ukmuktën, mëët ko ja Sisac jää tyu'uye'ey ets t'ënëmaay: Jëtu'un yë Wintsën y'ënä'äny ko miitsëty tëë ja mWintsën xy'ëxmajtsnëtë, paatykyëjxm të m'ëxmatsëtë ets o'ktëy mtuna'anëtë ja Sisac.

⁶ Ja Israel mëjja'aytyëjkëty ets ja yajkutujkpë ojts kë'ëm tjanty ja'awëy'itë mëët ja yu'unk'aaw yu'unkjot ko tëë jyänty tyëkoytyë, tääts y'ënantë: Yë Wintsën tëy jyänty y'ënä'äny.

⁷ Ko ja Wintsën t'ijxy ko tëë ja yu'unk'aaw yu'unkjot tpaatë, ënät t'ënëmaay ja Semaías: Mëët ko tëë ja yu'unk aaw yu'unkjot tpaatë, ëjts ka'apës nyajkutëkoya'antë, ni'ikyës nyajtso'oka'antë, këtiipë yë Sisac ëxëëk tyunëtëty, ka'ap yë Sisac yam nyajtuna'anyës jam Jerusalén maas yë ntsip n'äkë nkayajnaxyën;

⁸ je'eyëp tëy ko yë'ëjëty kopkpëky ko tmëmëtowtëty tääpë yajkutujkpë, jää nëjkx tnijawëtë wi'ix tyëkatsyëtyën, ko jeexyë ëjts xymyëtuntë ka'ap jeexyë jëtu'un jyatë.

⁹ Sisac, mëti'ipë jap yajkutujkpën Egiptë, mëti'ipë ja Jerusalén kajpn nyitëjkëyën ets tmä'tstaay tëkokyë ja wit meeny mëti'ipë jap tsajptëkotyën ets ma këmoontëjkën. Tu'kë'ëyë tyajnëjkxtaay, ojts tmënëjkxy ja akëëytyuk pu'ts pujxnëmpë mëti'ipë ja Salomón yajkojën.

¹⁰ Yë Roboam mëti'ipë yajkutujkpën ojts kë'ëm t'oytyuny ja pujxn'akëëytyuk, aak tsuxkpujxn yajtuun ets yë'ë tyuknipëjk tkëwent'atëty mëti'ipë ja kutujkëntëjk'aaw y'ijx'ijtëpën.

¹¹ Jëtu'un ko ijty ja yajkutujkpë jap nyijkxy tsajptëkoty, patso'onëtëp ja këwent'ajtpë ets myënëjkxtëp ja pujxn'akëëtyuk. Näy yë'ë jatëkok myëwinpijtëp ets jap tpëjkta'aktë ma ja tyëjkën ja këwent'ajtpëtëjk.

¹² Jëtu'un ja Wintsën ojts pyokymyä'kxëtë, mëët ko jyotwinpijtë ëmuumtu'ukjot ets ka'ap yajkutëkooyëtë. Oy ënety mëk të jyatëkoytyë ja Israel ja'ayëty, ojts oypyë ja winma'any tjaakmëët'atë jam Judá.

¹³ Roboam ojts tyajmëktä'äky ja kyutujktakn ets yi'iyëm ojts jam y'ëne'emy. Wixtyikxytyu'ukt ënety ja jyëmëjt ko tyëjkëy yajkutujkpë, majkmokx mäjtsk jëmëjt jam yajkutujky Jerusalén. Ja kajpn mëti'ipë ja Wintsën wyin'ijxën ets yë'ë tkajpn'ata'any ma tu'kë'ëyë yë Israel kajpnën. Jä'ä ijty yë Roboam yë tyaak xyëëwajtyp Naamá, jam Amón kyukajpnëty.

¹⁴ Ka'ap ojts oy winë tuny, jä'ä ko ka'ap ja Wintsën ojts ëmuumtu'ukjot ja pyutëjkën t'ijxtaayë.

¹⁵ Ja Roboam ja nyimëtyä'äky wi'ix tsyo'ontä'äkyën ets wi'ix jyëjpkëjxyën, jap myiinta'ay kuja'ay ma ja Semaías ja nyokyën ets ma Iddo nyokyën, ma yajnimëtya'aktën mëët ja y'u'unk y'ëna'këty y'u'unk tyo'oxytyëjkëty.

¹⁶ Roboam xëmë ojts mëët tsyiptuny yë Jeroboam.

¹⁷ Ko Roboam ojts y'o'knë, jam nyaaxtëjkëy ma David ja kyajpnën. Yë'ë kutëjkëyë ma ja kyutujktaknën yë myaank Abiam.