2 Crónicas 10 - Biblia Dc en Mixe de Quetzaltepec

Ma ja naax kajpn mäjtskpëky nyäwyä'kxyën

¹ Ja Roboam ojts jam nyijkxy Siquem, jä'ä ko jam ënety të nyëjkxta'atë ja Israel ja'ayëty ets tnikajpxpäta'antë ja Roboam ets yë'ë yajkutukëty.

² E ja Jeroboam, ja Nabat ja myaank, jap ënety tsyëënë Egiptë, mëti'ipë kyukäkën ja Salomón, ojts tnijawë ko ja Roboam yajnikajpxpäta'any ets yajkutukëty, ënät tsyo'ony jap Egiptë.

³ Ko yajyaxtsooy, ënät yë Jeroboam mëët yë Israel ja'ayëty ojts tninëjkxtë yë Roboam ets mëët myëtyaktë, jëtu'un t'ënëmaaytyë:

⁴ Yë mteety mëkës ojts xyajtuntë; tyam tun yë mëyajtën yajyu'unkë wäänë yë ntuunkëtyës mëti'ipë ojts yë'ë xymyo'otën, jëtu'unts mijts nmëtuntëty oy.

⁵ Tä ja Roboam y'ëtsooy: Tëkëm jatëkok mmintëty. Tä wyimpijtë,

⁶ ënät ja yajkutujkpë Roboam tyajtëëy ja mëjja'aytyëjk mëti'ipë ënety mëët të tyuntën ja tyeety Salomón, ko ënety jyuuky'ätynyëm. Jëtu'un tyajtëëy: Miitsëty ¿wi'ix m'ëna'antë, wi'ixës tyaapë ja'ay mëpaat n'ëtsoy?

⁷ Tä y'ëtsoowtë ja mëjja'aytyëjk: Pën mijts m'oyjya'ap ya'atë naax kajpn ets myajjotkujk'ajtyp ko xytyunëty mëti'ipë y'amëtoowtëpën, yë'ëjëty xëmë nëjkx oy tsuj mëtunëtë.

⁸ Je'eyëp ko Roboam ka'ap ojts jëtu'un t'ëktuunë tä ënety ja mëjja'aytyëjk të y'ënë'ëmxëtyën, yë'ë yajtëëw ja myë'ëna'ktëjk mëti'ipë ënety mëët të yeeky të pyetyën ets mëti'ipë mëët tyuunmukyën,

⁹ tä tyajtëëy: ¿Miitsëty wi'ix m'ëna'antë, wi'ix ya'atë ja'ay mëpaat n'ëtsowtës mëti'ipë ënantëpën koos ja tyuunk nyajyu'unkëtëty mëti'ipës ojts ja nteety tyuknipëkëtën?

¹⁰ Tä ja ëna'ktëjkëty y'ëtsoowtë, mëti'ipë ënety mëët tu'knax të yeeky të pyetyën: Ja ja'ayëty mëti'ipë ënantëpën ko xyajyu'unkëty ja tyuunk mëti'ipë ja mteety ojts tyuknipëkëtën, jëtu'un xy'ëtsowëty: Pën ja nteetyës mëk ojts mtuunkmo'ojëtë, ëjts wäänë ni'ikës yam miits mëk ntuunkmo'oja'antë;

¹¹ pën je'emty ojts winë mtuknitsëmëtë, ëjts wäänë je'emtyës yam miits ja tsëmy nmo'oja'antë; pën ojts mtukwopëtë yë tejpxy, ëjts yë'ëjës yam miitsëty ntukwoptëp yë po'otejpxy mëti'ipë jam jëjp'am pujxn myëët'ajtypyën.

¹² Kom tëkëëk xëëw ojts ja Jeroboam mëët tëkokyë ja Israel ja'ayëty tnimintë ja yajkutujkpë Roboam, jëtu'un tä ënety kë'ëm të t'awitsyën.

¹³ E ja Roboam mëk ja y'ëtsoowëtë, ka'ap ninu'un timyjä'äymyejtsy wi'ix ënety ja mëjja'aytyëjk të jya'ëna'antën,

¹⁴ jä'ä ojts ja ëna'ktëjk ja y'aaw y'ayuk tnikajpxë ets t'ënëmaay: Pën Je'emtyëty ojts ja tyeety winë tyuktsëëmë'ëkëtë, yë'ë wäänë je'emty winë tyuktsëëmë'ëka'anëtë ets pën tejpxy ojts ja tyeety tyukwopëtë, yë'ë po'otejpxy tukwopanëtëp mëti'ipë myëët'ajtypyën pujxn jam jëjp'am.

¹⁵ Jëtu'un'äämpy ja yajkutujkpë ka'ap ja naax kajpn tmëmëtooy, jä'ä ko Wintsënën ënety kë'ëm të tnipëjktaakë ets jëtu'un jyatëty kyëpätëty, jëtu'un'äämpy y'atëwëty ja Wintsën ja y'aaw y'ayuk mëti'ipë tyukwinwa'anëyën ja Jeroboam, Nabat yë myaank, mëët ja Ahías, jampë kyukajpnëtyën Siló.

¹⁶ Ko ja naax kajpn t'ijxy ko ka'ap ja yajkutujkpë të myëjpëjktä'äkyë, tä y'ëtsoowinpijtë: Ëëtsëty ka'ap kyopkpëkyëty nmëjwa'kpätëtyës yë David. Nitii näykyumayë ëëts nkajëjp'ixtë mëët yë Jesé myaank. Paaty tsojk ntimjya'amta'ayëmë ma ntëjk'ajtëmën Israel ja'ayëty. E yë David wä'än yi'iyë y'u'unk tyo'oxytyëjk t'ixy tuny. Ja Israel ja'ayëty ënety tsyo'ontaaytyë ets nyëjkxtaaytyë ma ja tyëjkëtyën.

¹⁷ E ma ja Israel ja'ayëtyën mëti'ipë jam tsënaaytyëpën ma ja Judá y'itjotmën, jam ja Roboam ojts jyaak'ëne'emy.

¹⁸ Ko yë Roboam tkejxy yë Adoram mëti'ipë ja tuunk nyikopk'ajtypyën ja atsipë, yë Israel ja'ayëty ënätyë Adoram tkuka'tstë. Ënet ja yajkutujkpë ënätyë tukpejty ja pyujxnwintëkäämpë ets kyeky, jamtsow Jerusalén kyäktsoky.

¹⁹ Jëtu'un'äämpy ja Israel ja'ayëty ojts tmëtsiptso'onëtë ja David ja kyutujktakn ets tyampaat jëtu'unyëm ka'ap oy mëët nyäyaj'itëtë.