1 Timoteo 1 - Biblia Dc en Mixe de Quetzaltepec

¹ Ëjts Pablo, Kristë Jesús ja y'ayuk kajpxwa'kxpë, mëti'ipës yë Dios Yajknitsokpë të xytyuk'ëne'emyën ets ja Kristë Jesús, mëti'ipë njëjp'ijxëmën,

² yajkajpxpo'kxy ja Timoteo mëti'ipë mëtëy yaj'u'unk'ajtpën ma mëpëjkënën. Wä'än ja Dios Teety ets ja Wintsën Jesukristë mmo'oyë ja kënu'kxën, pa'ëyo'owën ets ja jotkujk'ajtën.

Ma yajni'ënä'ämën ets ka'ap yajkupëkëty ja ijxpëjkën ka'apë myëtëyëtyën

³ Ijxtëm ojts mijts nnëëmën koos nnëjkxany jam Macedonia y'itjotm, wë'ëm jam Éfeso ets xy'akajpxtukëty yë ja'ayëty këtiipë tëkatsy yaj'ijxpëktëty ets wiink ja winma'any tmëtëkëtëty,

⁴ ets ka'ap tmëtoow'ittëty ja apmëtyä'äky tëëyëpë tyunyë jyätyën. Jëtu'unpë mëtyä'äky je'eyë nëkoo yajtsiptuny ets ka'ap pyutëkë ma ja Dios yajjot'atyën ko yajmëpëky.

⁵ Jä'äkyëjxm tääpë ënä'ämën jyääjëty ets winpity atëjy nnätsyojkëmëty nixim niyam mëët ja oyjyot oywyinma'any ets ja mëtëypyë ja mëpëjkën.

⁶ Tëë jënaakën t'ëxmajtsnëtë ja mëpëjkën ets të tpatëjkënëtë ja aaw ayuk ka'apë tsyoowpaatyën.

⁷ Jyatsojktëp ets jeexyë yaj'ixjpëktë ets nimëtya'aktë ja Dios ja y'ënä'ämën tyiyajtën, je'eyëp ko tkawinjawëtë yë'ëpaat ka'ap tukjotkujk'atë mëti'ipë nyimëtyaktëpën.

⁸ Nnija'awëm ko ja Dios ja y'ënä'ämën oy yë'ë, ko yajpatuny ijxtëm pyaat'atyën.

⁹ Näy nija'awëm ko ka'ap yë'ëjëty ja ënä'ämën të yajtuknipëjktaakëtë mëti'ipë ja oypyë tyuuntëpën. Yë'ë të yajtuknipëjktaakëtë mëti'ipë ëxëëk ja'ay'ajtëpën, mëti'ipë kakäjpxymyëtoowtëpën, mëti'ipë ja Dios kyamëjpëjktaktëpën, mëti'ipë pokyjyä'äyëtyën, mëti'ipë y'ëxëëk'ijxtëpën ja Dios ja jyä'ä, mëti'ipë ka'ap twintsë'ëkëtën ja Dios, mëti'ipë ja tyaak tyeety yaj'o'ktëpën, mëti'ipë yajja'ay'o'ktëpën,

¹⁰ mëti'ipë yajwintsë'këntëkooytyëpën ja pëjkën ukën, mëti'ipë ja myëye'etyëjk ëkë myëto'oxytyëjk myëët'ajtëpën, mëti'ipë ja'amyä'tstëp, mëti'ipë win'ë'ëntëp, mëti'ipë ja Dios yajkajpxtëpën mëët ja antakën, ni'ëmukë jënu'un tmëtsip'atën ja mëtëypyë ijxpëjkën.

¹¹ Ya'atë mëtëypyë ijxpëjkën yë'ë mëët nyäpyäätyë ja oy aaw oy ayuk mëti'ipës të xytyuknipëkyën ja Dios kënu'kxypyë.

Ko Pablo ja Tios të pya'ëyoyë

¹² Nkukajpxëpës ja nWintsën'ajtëm Jesukristë koos të xymyo'oy mëk'ajtën, yë'ëjës të xyajnaxy wa'ats ja'ay etsës të xywinwitsy etsës nmëtunëty,

¹³ oyës ënety ëxëëkjaty nnikäjpxy nimëtyä'äky ja Dios etsës n'ixjëtity npajëtity ja Jesús ja myëpëjkpëtëjk. E ojtsës ja Dios xypya'ëyoy, jä'ä ko ka'anëm ënety nmëpekyës ets ka'anëmës ënety nnijawë tiis ntuunpy.

¹⁴ Jëtu'un ja Wintsën ja mëjmëyajtën të tuny maas ëjtsën etsës të xymyo'oy ja mëpëjkën, tsojkën ja'awën mëti'ipë nmëët'ajtëmën ko tu'ukyë ja Kristë Jesús të nmëpëjkëmë.

¹⁵ Tëyajtën ya'atë, mëpëktë ni'ëmukë: Kristë Jesús yë'ë të myiny naaxwiiny ets të tyajtso'oky ja pokyjä'äytyëjk, maas ëjts jëyëjp ntuktso'ontä'äkyën.

¹⁶ Paaty ja Dios të xypya'ëyoyës ets ja Jesukristë tyaj'ixëtëty ma ëjtsën ja myä'kxtujkën. Jëtu'untsës nyajnikëxë'ëky ma ja mëpëjkpëtëjkëtyën ko yajpaata'any ja juukyajtën xëmëkyëjxmëpë.

¹⁷ Mëjjaw jaantyjawë ja Dios y'itëty, yë'ë tu'ukyë Tios'ajtp, mëti'ipë xëmëkyëjxm ijtpën, mëti'ipë ka'ap y'ookyën ets ka'ap yaj'ixyën. Oy jyëtu'un'atëty.

^18-19 Timoteo, u'unk maay; mijts yam ntuknipëjkpy ets ja tsip xy'atänëty mëët ja mëpëjkën ets ja jot winma'any, jëtu'un ijxtëm ojts ja käjpxynyajxpëtëjk mnimëtyä'äkyën. Jënaakën, mëti'ipë ojts ka'ap tja'akyukën ja jyot wyinma'any, tëë nyäyajtu'utëkoyëtë.

²⁰ Jëtu'un jyajtë ja Himeneo ets ja Alejandro, mëti'ipës të ntukë'ëtëkëtën ja mëjku'u ets tyukwij tyukäjëtëty ets ka'ap ja Dios tnäkymyëkajpxtëkoytyëty.