1 Juan 5 - Biblia Dc en Mixe de Quetzaltepec

Ja mëpëjkën mëët yajmëët'aty ja tsojkën ja'awën

¹ Pën myëpëjkpy ko ja Jesús yë'ë mëti'ipë ënety yajjëjp'ijxpën, Dios ja u'unk'ajtëp; ets pën ja Dios Teety tsyojkpy, näjyëtu'un tsokëty ja Dios u'unk.

² Ko ntsojkmëty ja Dios ets ntu'unmëty mëti'ipë yë'ë tsyojkpyën, jëtu'un nija'awëmëty ko ënety ntsojkëm näjyëtu'un ja y'u'unk y'ëna'k.

³ Ko ja Dios ntsojkmëty, ja y'ënä'ämën ënety npatu'unëm ets ja y'ënä'ämën ka'ap tsyiptä'äky,

⁴ tëkokyë pën ja Dios u'unk'ajtëp myëmëtaktääpy ja naaxwiinypë. Ja nmëpëjkën'ajtëm yë'ë xyajmëtakëm naaxwiinyëtë.

⁵ Pën myëpëjkpy ko ja Jesús Dios y'U'unk'atyë, jä'ä myëmëtäkpy ja naaxwiinyëtë winma'any.

Ko ja Jesús yajnikäjpxy ko Tios y'U'unk'atyë

⁶ Ko ja Jesús myiiny yaa naaxwiiny, ijxwë'ëmy ojts wyi'imy mëët ja nëë ko ojts nyëëpety ets mëët ja ne'pyny ko ojts kyëruutspety; ka'ap yi'iyëty nëë, näjyëtu'un ja ne'pyny. Kënu'kxymyëk'ajtën ya'atë yajtëytyëjkëp, jä'ä ko yë Kënu'kxymyëk'ajtën mëtëy yë'ë.

⁷ Tëkëëkpëky nmëët'ajtëm mëti'ipë yajtëytyëjkëpën ko ja Dios t'U'unkëty ja Jesús.

⁸ Ja Kënu'kxymyëk'ajtën, ja nëë ets ja ne'pyny; jëtu'un nitëkëëk tyajtëytyëkëtë.

⁹ Tsojk nmëpëjkëm mëti'ipë nyikajpxpäjtëpën ko ja Jesús Dios y'U'unk'atyë. Ja ni'ik mëtëypyë mëti'ipë ja Dios Teety të tnikäjpxyën ko ja Jesús t'U'unkëty.

¹⁰ Pën myëpëjkpy ja Dios U'unk, jyotjoy wyinma'anyjoty ja y'ity ko ja Jesús Tyios y'U'unk'atyë. Pën ka'ap tmëpëky, jëtu'un ja Dios tyajnaxy ijxtëm jeexyë wyin'ëënyën; jä'ä ko ka'ap ja y'aaw y'ayuk tmëpëjkë ijxtëm ja y'U'unk tnimëtyä'äkyën.

¹¹ Ya'atë mëpëjkën yë'ë xytyuknija'awëm ko ja Dios të xymyo'oyëm ja juukyajtën xëmëkyëjxmëpë, ets ya'atë juukyajtën jam yajpaaty ma y'U'unkën.

¹² Pën ja Dios U'unk myëët'ajtyp, myëët'ajtyp ja juukyajtën xëmëkyëjxmëpë. Pën ka'ap tmëët'aty ja Dios U'unk, ka'ap ja juukyajtën tmëëtëty.

Ko ja Juan ja kajpxwijën ets ja kajpxpo'kxën t'ëkjaakyajknë

¹³ Tyam miits nnijäyëtë jënu'un ja Dios U'unk xymyëpëktë ets xynyijawëtëty ko xymyëët'atë ja juukyajtën xëmëkyëjxmëpë.

¹⁴ Yë'ë ja Dios ntuk'ijxpäjtëm, jä'ä ko nnija'awëm ko n'amëto'owmëty winë ijxtëm yë'ë tsokyën myëtoopy yë'ë.

¹⁵ Jëtu'un ijxtëm të nnija'awëm ko ja Dios tmëtoy ja nnu'kxtakën'ajtëm, näjyëtu'un ëëts nnija'awëmë ko nmëët'ajtëm ja mëti'ipës të n'amëto'owëmën.

¹⁶ Ko pën ja myëku'uk t'ixëty ko tam pyokytyuny ets jä'ä ja poky mëti'ipë ka'ap yaj'ookyën, tuknija'amyätsëtë ja Dios ets ja Dios yajjuuky'atëtëty, ënät jëtu'un pën jä'ä ja poky mëti'ipë ka'ap yaj'ookyën. Jä'ä ko tää poky mëti'ipë yaj'o'kpën, ko pën tääpë jëtu'unpë poky tuny, ka'ap tjëkyepy ja Dios yajtuknija'amyätsëty.

¹⁷ Aak tim poky yë'ë mëti'ipë tuuntëko'oyën'ajtpën; je'eyëp ko tää poky ka'apë yaj'ookyën.

¹⁸ Nnija'awëm pën ja Dios tyeety'äjtypyën, ka'ap ja pyokytyuny, jä'ä ko Dios U'unk këwent'ajtëp ets ka'ap ja ëxëëkpë pyäätyë.

¹⁹ Nnija'awëm ko ëëtsajtëm Dios xyjyä'ä''ajtëm, tu'kë'ëyë ja naaxwiinyëtë atsojkën ku'oypyë jä'ä'ajtëp.

²⁰ Nnija'awëm näjyëtu'un ko paaty ja Dios U'unk të xynyimi'inëmë ets nnija'awëmëty ja Dios tëyajtënpë. Yë'ë mëët njuuky'ajtëm mëti'ipë mëtëyën, jä'ä jëtu'un ja y'u'unk Jesukristë. Mëtëypyë ja Dios, mëti'ipë yäjkpyën ja juukyajtën xëmëkyëjxmëpë.

²¹ U'unk ëna'këty, näy'ijx'it näkyëwent'atëtë, këtiipë yë'ë xy'ëwtatëty mëti'ipë ka'ap Tyiosëtyën.