1 Crónicas 29 - Biblia Dc en Mixe de Quetzaltepec

¹ Ok ja yajkutujkpë t'ënëmaay ja mayjyä'äy: Yë n'u'unkës Salomoon, ja tu'ukyëpë ja Wintsën të twin'ixyën, mutsknëm yë oy, e ja tuunk mëti'ipë të tyuka'ayën mëjwiin këjää yë'ë, jä'ä ko ka'ap jyëtu'unëty tä ja'ay kutujkëntëjk je'eyë tkoyën, yë'ë Wintsën jyëën tyëjk kyojanëp.

² Ëjts tëëjës yajxon mëk nyajnimëjaawtä'äky ets të mpata'ayës winë mëti'ipëjaty tunaanpën ma kyoja'anyën ja Wintsën ja jyëën tyëjk: Pu'tspujxn, poop pujxn, tsuxkpujxn, juunpujxn, kepy, tsaa. Tëës näjyëtu'un npaaty oytsyaa mëti'ipë tsuxk, tsapts ets mëti'ipë tunaanpën ma mëët wiinkëtypë yajxëpina'anyën.

³ E ëpëky ma winë të nyajmujkpyësën mëti'ipëjaty tunaanpën ma ja Dios ja jyëën tyëjk kyoja'anyën ets mëët ko oyës ntsoky ets ja jyëën tyëjk kyojëty; tyamës ëpëky nyajkpë mëti'ipës kë'ëm ntimyjä'ä'ajtypyën ya'atë pu'ts pujxn ets ya'atë poop pujxn:

⁴ Mëko'px mil tsim jye'emtyëty wa'ats pu'ts pujxn, mäjtsk mëko'px ja i'px majk tsim yë poop pujxn, mëti'ipë yajtukwinkoyëpën yë potsy.

⁵ Tu'kë'ëyë yë pu'ts pujxn ets poop pujxn tyam nyäkyës ets jam tyunëty maajaty winë yaj'oytyuna'anyën mëti'ipë pujxnën ets ma tu'kë'ëyë winë t'oytyuna'antën yë wijjyä'äyëty mëti'ipë nyija'awëtyëpën jëtu'unpë tuunk. E tyam, ¿jam pën jëtu'un ja jyot wyinma'any kë'ëm tpatpë ets wäänë näjyëtu'un tyakaanpë tiijë?

⁶ Ënet ja u'u'unkteety u'uunktaakëty ja mëti'ipë nyikopk'ajtëpën ja Israel ja'ayëty, tsiptuunpë wintsënëty, mëjja'aytyëjk, kutuunktëjkëty mëti'ipë nyi'ënä'ämëtyëpën ja tuunk maajaty ja kajpnëty, yajktaaytyë näjyëtu'un ja y'ayajk y'ako'onënëty,

⁷ jä'ä y'akoonmujkëtyëp ma ja Wintsën ja jyëën tyëjk ënety kyoja'anyën ets nyipejty mëko'px ja tëkë'px mëkoxk mil tsim, ëpëky ja majk mil ja meenywyä'kxy aakyë'ë pu'ts pujxn; ojts näjyëtu'un myuk tëkëëk mëko'px ja i'px majk mil tsim yë poop pujxn ets jawäänë kyatëtujk mëko'px mil tsimëty yë tsuxkpujxn ets tëkëëk mil ja tëkëëk mëko'px yë juunpujxn.

⁸ Näyjyëtu'un mëti'ipë ënety myëët'ajtëpën ja oyjyätyëtypë tsaa ojts tkë'ëyaktë ma ja ja'ay jam tnikoonpät tnipëjkpätën winë ma Wintsën ja jyëën tyëjk kyoja'anyën, yë'ë ojts yajtuknipëky tyajmukëty yë Jehiel, Guersón yë jyä'äy.

⁹ Ja ja'ay ojts mëk tukxoonta'aktë, ko ja yajkpë këpäjtpë tmëmintë ja y'ayajk y'ako'onënëty winë aaw winëjot, tukmëyoxtë ja Wintsën. Ja yajkutujkpë David janty jotkujk nyäjya'awëyë.

¹⁰ Ënet ja David ojts tkënu'kxy ja Wintsën ja xyëëw, ma ënety ja mayjyä'äy jam yajpaatën ni'amukë ets y'ënäny: Mëjwiin këjää xëmë nyaxëty ja Wintsën ja myëjxëëw, ja Dios mëti'ipë y'ëwtajtën ja n'ap'ajtëmë Israel.

¹¹ Wintsën, mijts mjä'ä'ajtyp ja mëj'ajtën kuttujkën, ja mëj'ajt oyajtën, ja ënä'ämën kuttujkën ets ja mëjwinma'anypë këjääwinma'anypë. Jä'ä ko tëkokyë jënu'un winë y'ityën ets yajpaatyën tsajpjotm ets naaxwiiny mijts mjä'ä'ajtääpy, näjyëtu'un tëkokyë ja ënä'ämtakn kutujktakn mijts yë mjä'ä, jä'ä ko mijts ni'ik mëj'ajtën kuttujkën xymyëëtëty këtiinëm oy pën naaxwiinyëtë ja'ay yaapë y'ëne'emy yajkutukyën.

¹² Ma mijtsën jam tsyoony ja kumeeny'at ets ja oypyë tu'unën kajpxën. Mijts m'ënä'ämtääpy tëkokyë winë. Ja mëk'ajtën ets ja kuttujkën kë'ëjootjotm jam xytyimëëtëty ets mkë'ëjotm jam xymyëët'aty ko pën ja ënä'ämën kuttujkën xymyo'oja'anëty.

¹³ E paaty, Wintsën, mëjwiin këjää ëëts yam yë kukkajpxën ja'awëkyëtakkën nyajnaxtë ets nwin'ëw nwinya'axtës yë mkënu'kxy xyëëw;

¹⁴ jää ko ëjts ets nnaax nkajpnës nitiijës nkakëjxm'atë ets mijts tii nmo'o nkäxtëty mëjwiin këjää. Aakmijts winë mjä'ä'ajtääpy, mëti'ipës yam wäänë nyajktëpën yë'ë mëti'ipës mijts të xymyo'otën.

¹⁵ Mijts mwintuuy aak jaaypyo'kxyjyä'äy ëëts nyajpaatë, nnë'ëye'ey ntu'uye'eytyës, näjyëtu'un tä jyuukyajtën ëëts ja n'aptëjkëty nän timjëtu'un ëëts ja n'ap n'okëty y'ijtë, ëëts ja njuukyajtënëty yaa naaxwiiny naaxkëjxy jëtu'un ja je'eyë nyajxkojy tu'ktsojkyë tä tii y'a'äpkën tu'ktsojkyë ko xëëw'an nyäxy, tiis n'ëkjaaktimy'ëwxitëp.

¹⁶ Paaty Wintsën mijts mëti'ipë myaj'ëwtajtpën, ëëts ja nTiosëty, mijts ya'atë mjä'ä ets jam të tsyoony ma mijtsën tëkokyë ya'atë wit meeny mëti'ipë të yajnipëjkpetyën ets ja mjëën mtëjk yajtukoja'any; ma ja mxëëw ja oypyë tsujpë yaj'ëwtat yajja'amyätsëtyën.

¹⁷ Ëjts nija'apës Wintsën, ko mijts wa'ats jot winma'any xy'ixy xynyijawë, yë'ë mtsojkën'ajtyp ets ja'ay winë tëyajtën tunëty. Paaty yam nmo'oy tëkokyë ya'atë winë aaw winëjot. Tyam n'ijxypyës ko yë mnaax mkajpn tyampë yaa yajpaatyën tu'ukmukyë mëët ja jot winma'any oy tsujpë, tëë mtukë'ëtëkëty tëkokyë ya'atë ayajk ako'onën.

¹⁸ Wintsën, Dios mëti'ipë y'ëwtajtën ja Abraham, Isaac ets Israel, ëëts ja n'apteetyëty. Mmëët'atëp xëmë jëtu'unpë jot winma'any oypyë tsujpë ets xoontä'äkpyë ma ja mnaax mkajpnën, ets ja jyot wyinma'any jam xëmë tyaj'itëty ma mijtsën.

¹⁹ Tun yë mëyajtën, mo'o yë n'u'unk nmaayës Salomón ja oypyë ma'ayën tajën ets ja oypyë jot winma'any, wä'än tyajtu'uye'ey oy tsuj yë tyuunk ma tpatunëtyën ja m'ënä'ämën mtëyajtën, mnë'ë mtu'u ets ja m'aaw m'ayuk ets yë'ë tkuuytyunëty, tkojëty ja mjëën mtëjk mëti'ipës të nitun të niye'eyën.

²⁰ Ok ja David ojts wiinkpë ja aaw ayuk t'ëxmatsy ma ja mayjyä'äy jam yajpaatën ets t'ënëmaay: Tyam win'ëw winya'axtë ja mWintsën Tiosëty. Ënet ja mayjyä'äy tu'ukmukyë tyëjkëtyë ëëpë xoontakpë ma ja Wintsënën, mëti'ipë ja y'aptëjk y'ëwtajtën, jëtu'un nyäkyoxtënaaytyakëtë ma ja Wintsënën ets ma ja yajkutujkpën.

²¹ Komjëpom ojts ja Wintsën tmo'otë wintsë'kën nino'oky nixämpyë: Tu'k mil ja tsajpkaa ëna'k, tu'uk mil ja tsajppax ets tu'uk mil ja kupixyny, mëët ja nyi'uuky nyinëë ets may'äämpy tyajktë ja wintsë'kën.

²² Janty xoontä'äky ojts kyäytyë y'uuktë jam Wintsën wyintum. Ënet ja Salomón, David ja myaank, mëmäjtsk'ok nikajpxpäjtë ets yë'ë y'ënä'äm yajkutukëty ets ojts tkënu'kxtë jam Wintsën wyintum. Jëtu'un ojts wyi'imy yajkutujkpë ja Salomón ets Sadoc jä'ä ojts yajtuknipëky ets yë'ë tyeety'atëty.

²³ Ja Salomón ojts tmëwë'ëmy ja kutujktakn, mëti'ipë ja Wintsën jyä'ä'ajtypyën, tkutëjkënë ja tyeety David, oy tyuuntso'ony ets ojts wyimpäjtkojy ma ja kyutujkënën. Aak mëmëtoowëp ijty ja Israel ja'ay.

²⁴ Tu'kë'ëyë ja ja'ayëty mëti'ipë nyiwintsën'ajtën ja tsiptuunpëtëjk ets mëti'ipë kopk ijtëpën, yë'ëpaat ja yajkutujkpë ja y'u'unk y'ëna'k aak mëk'äämpy tputëjkëtyë ja Salomón ets kyutujkën oy tyajtu'uye'eyëty.

²⁵ Yë Wintsën yë'ë ojts kë'ëm tyajkutuky ets ja Salomón mëj'äämpy nyaxëty ma tu'kë'ëyë ja Israel ja'ayëty ja nyaax kyajpnën, akäjpxy ojts y'ity mëjwiin këjää këtiinëm jyëtu'unëty ja wiinkëtypë ja yajkutujkpë mëti'ipë të tyuntën ma ja Israel kajpnën.

Ma ja David y'o'knën

²⁶ David, yë Jesé myaank, ojts këjääpaat yë y'ënä'ämën kyutujkën y'ity, mapaat tnitänën yë naax kajpn yë Israel ja'ayëty.

²⁷ Wëxtyikxy jëmëjt ojts y'ëne'emy, wëxtujk jëmëjt jam Hebrón ets i'px majktëkëëk jëmëjt jam Jerusalén.

²⁸ Mëjja'ay ënätynyë ko ojts y'o'knë, jeky jyuuky'äjty, ojts ja wit meeny may tmëët'aty, tyuun kyajpx winë mëjwiin këjää, akäjpxy oymyaajëty y'ijty. Ko ojts y'o'knë yë myaank Salomón, yë'ë kutëjkëyë ma kutujktaknën.

²⁹ Yë nyikäjpxy nyimëtyä'äky yë David ma yajkutujkyën, wi'ix tsyo'onë'ky tsyo'ontäkyën ets wi'ix jyëjpkëjxyën, jap kuja'ay myiinta'ay ma ja nokyën mëti'ipë jyä'ä'ajtëpën yë käjpxynyajxpë Samuel, yë käjpxynyajxpë Natán ets mëti'ipë jyä'ä'ajtypyën yë käjpxynyajxpë Gad,

³⁰ jap myiinta'ay tëkokyë wi'ix yajkutujkyën ets wi'ix ja ënä'ämën mëk'ajtën ojts tmëët'atyën. Tu'kë'ëyë wi'ix tyuunën jyajtën jä'ä xëëw jä'ä jëmëjt ets wi'ix yë'ë jyäjtyën kyëpejtyën, wi'ix jyäjtyën kyëpejtyën ja Israel kajpn ets wiinkëtypë mëj naax mëj kajpn.