1 Crónicas 27 - Biblia Dc en Mixe de Quetzaltepec

Wi'ix ojts ja tsiptuunpëtëjk yajma'kxtën ets ja mayjyä'äyëty

¹ Ma ya'atën, yë'ë yajnimëtya'akaanp ja ja'ayëty mëti'ipë ojts tnikopk'atën ja y'u'unk y'ëna'këty, y'u'unk tyo'oxytyëjkëty; mëti'ipë nyiwintsën'ajtën ja tsiptuunpëtëjkëty, tuunpëtëjkëty ets mëti'ipë mëët tyuunmujktën ja yajkutujkpë; mëti'ipë yajtijtëpën wintsëntëjkëty ets tu'kë'ëyë mëti'ipë ënety tyu'uwinwoowtëpën ja tsiptuunpëtëjkëty; winpo'ojëty ojts tyuka'ajëtë ets nyäxy jëtu'un ja xëëw jëmëjt. Ja tu'kpëkyjyätypë ja këwent'ajtpëty, i'px majktaxk miljaty ijty yajpëjkta'aktë.

² Mëti'ipë ojts ëka'any tyuka'ajëtën ja tu'u ënyääyk, yë'ë ojts jam tnikopk'aty ja tsiptuunpëtëjk ja Jasobeam, Zabdiel myaank,

³ yë'ë jyä'äy Fares ets yë'ë ojts tnikopk'aty ja tsiptuunpë wintsënëty, mëti'ipë tuuntën ma ja yajkutujkpë yajmëtunyën, ma ja mëtu'kpo'opën.

⁴ Ma mëmäjtskpo'opën, jä'ä ja tsiptuunpë wintsën xyëëwajtyp Dodai, ahohitë.

⁵ Ma mëtëkëëkpo'opën: jä'ä ja tsiptuunpë wintsën xyëëwajtyp Benaías, yë'ë myaank ja teety kyopk Joiadá,

⁶ jä'ä ja ni''ipxmajkpë ja jotmëkja'aytyëjkëty, mëti'ipë nyiwintsën'ajtën ja tsiptuunpëtëjkëty. Je'eyëp ko jä'ä ja myaank ja Amizabad ijty tu'uwinye'epy ma ya'atë ja tsiptuunpëtëjkëtyën.

⁷ Ma ja mëmajktaxk po'opën: Jä'ä ja tsiptuunpë wintsën xyëëwajtyp Asael, yë'ë y'uty yë Joab. Yë'ë ijty myaank kutuunëp.

⁸ Ma ja mëmëkoxkpë po'opën: Jä'ä ja tsiptuunpë wintsën xyëëwajtyp Samhut, izraíta ja'ay.

⁹ Ma ja mëtëtujk po'opën: Jä'ä ja tsiptuunpë wintsën xyëëwajtyp Irá, Iqués myaank, jam kyukajpnëty Tecoa.

¹⁰ Ma ja mëwëxtujk po'opën: Jä'ä ja tsiptuunpu wintsën xyëëwajtyp Heles, paltitëja'ay, Efraín y'u'unk y'ok.

¹¹ Ma ja mëtuktujk po'opën: Jä'ä ja tsiptuunpë wintsën xyëëwajtyp Sibecai jam kyukajpnëty Husá, Zérah y'u'unk y'ok.

¹² Ma ja mëtaxtujk po'opën: Jä'ä ja tsiptuunpë wintsën xyëëwajtyp Ebiézer, jam kyukajpnëty Anatot, Benjamín y'u'unk y'ok.

¹³ Ma ja mëmajkpo'opën: Jä'ä ja tsiptuunpë wintsën xyëëwajtyp Maharai jam Netofá kyukajpnëty, Zérah y'u'unk y'ok.

¹⁴ Ma ja mëmajktu'uk po'opën: Jä'ä ja tsiptuunpë wintsën xyëëwajtyp Benaías jampë Piratón kyukajpnëty, Efraín y'u'unk y'ok.

¹⁵ Ma ja mëmajkmäjtsk po'opën: Jä'ä ja tsiptuunpë wintsën xyëëwajtyp Heldai, Netofá kyukajpnëty, Otoniel y'u'unk y'ok.

¹⁶ Ja ja'ayëty mëti'ipë ënety ja myëku'uktëjk nyikopk'ajtëpën jam ma ja Israel kajpnën, jä'ä xyëëwajtëp: ma ja Rubén jyä'äyën, yë Eliézer, Zicri myaank; ma ja Simeón jyä'äyën yë'ë jam nyikopk'ajt yë myëku'uk yë Sefatías, Maacá myaank;

¹⁷ ma ja Leví jyä'äyën, yë jam nyikopk'ajt yë myëku'uk yë Hasabías, Quemuel myaank; ma ja Aarón jyä'äyën, yë'ë jam nyikopk'ajt yë myëku'uk yë Sadoc;

¹⁸ ma ja Judá jyä'äyën, yë'ë jam nyikopk'aj yë myëku'uk yë Elihú, David myëkä'äx; ma ja Isacar jyä'äyën, yë'ë jam nyikopk'aj yë myëku'uk yë Omri, Micael myaank;

¹⁹ ma ja Zabulón jyä'äyën, yë'ë jam nyikopk'aj yë myëku'uk yë Ismaías, myaank yë Abdías; ma Neftalí jyä'äyën yë'ë jam nyikopk'aj yë myëku'uk yë Jerimot, myaank yë Azriel;

²⁰ ma ja Efraín jyä'äyën, yë'ë jam nyikopk'aj yë myëku'uk yë Oseas, Azazías myaank; ma ja nikujkwä'kxypyë ja Manasés jyä'äyën, yë'ë jam nyikopk'aj yë myëku'uk yë Joel, myaank yë Pedaías;

²¹ e ma ja nikujkwä'kxyën ja Manasés ja jyä'äy jyaak yajpaatyën, jampë ënety y'itën Galaad, yë'ë jam nyikopk'aj yë myëku'uk yë Idó, Zacarías myaank; ma ja Benjamín jyä'äyën, yë'ë jam nyikopk'aj yë myëku'uk yë Jaasiel, myaank yë Abner;

²² ma Dan jyä'äyën, yë'ë Azarel, Jeroham myaank. Ya'atë jëtu'un ja'ayëty ojts tnikëpajk'atë myëku'uktëjkëty ma ja Israel ja'ayëty.

²³ David ka'ap ojts tyajnokytyëkë ëna'këty mëti'ipë ënety ka'ap jyëmëjt tpaatynyëmën i'px, jä'ä ko tëë ënety Wintsën y'ënä'äny ko yajmayëjäämpy ja'ay jëtu'un tä jam tsajpwinm kyëxë'ëkyën yë mëtsa'a.

²⁴ Ënet ja Joab tyajtso'ontäky ja tuunk ma ënety tjaaymyuka'anyën ja ja'ay, je'eyëp ko ka'ap tyajwintu'upëjky, jä'ä ko tääpë jëtu'unpë, ojts ëyo'on jam tyajkëtä'äky ma Israel ja'ayëtyën. Paatykyëjxm ka'ap y'akëxë'ëkë ninaak ja ja'ay nyimay'atën ma ja nokyën mëti'ipë ojts kyojyën ko ja yajkutujkpë David ojts y'ëne'emy.

²⁵ Mëti'ipë ojts myeenypyëjkë'ëkyën jam ma ja yajkutujktaknën, yë'ë ja Azmávet, Adiel myaank. E ja mëti'ipë ojts yajtuknipëkyën tniwintsën'atëty winë ma yajpëjkë'ëky yajtunë'ëkyën winë, jam kamwinm tu'uwinm ets jam ma nyämyëtsëpa'an'atëtën, jä'ä ja Jonatán, myaank yë Uzías.

²⁶ Ma ja ja'ayëtyën mëti'ipë naaxtuuntëpën, yë'ë ojts jam yajtuknipëky tnikopk'atëty ja tuunk yë Ezrí, Quelub myaank.

²⁷ E ma ja tsatsymkyam ets ujts tëëmkam yajtuunk'atyën, yë'ë ojts jam yajtuknipëky tnikopk'atëty ja tuunk yë Simí, jam tsyoony Ramat; mëti'ipë nyikopk'ajtypyën ja tuunk ma ja tsatym nyëë yajpëjkmukyën, yë'ë jam yajtuknipëjk yë Zabdí, jam tsyoony Sefam.

²⁸ Ja ja'ay mëti'ipë ojts yajtuknipëkyën ets ja tuunk tnikopk'atëty ma jam ja aay kepyën mëti'ipë yajjë'kxpën ets mëti'ipë tuunpën jampë yajpaatyën Baal-hanán joyjyotm, tsyo'ontä'äky jam Guederá; e ma ja onkepy yajpaatën Joás ojts yajtuknipëky.

²⁹ Sitrai ojts yajtuknipëky tnikopk'atëty ja tuunk, ma ja ja'ayëtyën mëti'ipë y'ijx'ijtëpën kyëwent'ajtëpën ja tsajpkaa jam Sarón, e ja mëti'ipë jam joyjotm yajpatëpën ja tsajpkaa yë Safat, myaank yë Adlai ets tnikopk'atëty ja tuunk ma ja'ayëtyën mëti'ipë jam tuuntëpën.

³⁰ Ma ja'ayëtyën mëti'ipë jëyujk jëku'ux kyëwent'ajtëpën, yë'ë jam yajpëjktak tnikopk'atëty ja tuunk yë Obil, Ismael ja'ay; e ma ja kruktsëtyën yë'ë jam yajtuknipëjk tnikopk'atëty ja tuunk yë Jehedías, jam Meronot tsyoony;

³¹ e ja mëti'ipë nyikopk'ajtypyën ja tuunk ma ja kupixynyën yë'ë Jaziz yajtuknipëjk, Agar ja'ay. Tëkokyë ya'atë ja'ayëty yë'ë ojts jam t'ixtë tuntë ja tuunk wi'ix tyu'uye'eyën, mëti'ipë ja yajkutujkpë David jyä'ä'ajtypyën.

³² Yë Jonatán, David yë jyämy, tu'uk ja ja'ay mëti'ipë janty wijyën ets oy ja ma'ayën tajën tmëët'aty, najtskajpxëpë ets kajpxwijpë ijty y'ity. E yë Jehiel, Hacmoni myaank, yë'ë ijty nyatënääpy xëmë ja yajkutujkpë ja y'u'unk y'ëna'k.

³³ Näyjyëtu'un ja Ahitófel, nän wiinkajpxpë kajpxwijpë ijty tyuunk'ajtyp ma ja yajkutujkpë tyuuntaknën; e yë Husai, Arquit ja'ay, yë'ë ijty ja yajkutujkpë pyutëjkëp.

³⁴ Ahitófel yë'ë ojts kyutëkëty yë Joiadá, myaank yë Benaías ets Abiatar. Mëti'ipë ojts tëkokyë ja tsiptuunpëtëjk tniwintsën'atën mëti'ipë ja yajkutujkpë David myëët'ajtypyën, jä'ä xyëëwajt ja nyikopk, Joab.