1 Crónicas 24 - Biblia Dc en Mixe de Quetzaltepec

¹ Yë Aarón y'u'unk y'ok aak ojts yajtuknija'awëtya'atë jëna'a tyuka'ajëtën ja tuunk nitu'ukjaty. Aarón jä'ä y'u'unk y'ëna'k xyëëwajtë: Nadab, Abihú, Eleazar ets Itamar.

² E jä'ä ko Nadab ets Abihú ojts y'ooktë tyëkoytyë, jëyëjp ma ka'anëm ja tyeetyëty ënety y'ookynyëmën, paaty yë Eleazar ets Itamar ojts jä'ä tmëwë'ëmtë ja tuunk ma ja teety'ajtkën.

³ Paatykyëjxm ja David ojts tpëjkwä'kxy ja ja'ayëty ets tuk'ëwa'anëtyääy tiijaty tyuntëpën, yë'ë mëët nyäpyutëjkëyë Sadoc, Eleazar y'u'unk y'ok ets Ahimélec, Itamar y'u'unk y'ok,

⁴ E ojts t'ixtë ko Eleazar y'u'unk y'ok may ënety ni'ik këtiinëm jyëtu'unëty yë Itamar y'u'unk y'ok, paaty ojts tpëjkwa'kxtë ja Eleazar ja jyä'äy ets ojts wyë'ëmtë nimajkmokx tu'uk mëti'ipë nyiwintsën'ajtën ja myëku'uktëjk ets nituktujk ja Itamar ja jyä'äy.

⁵ Ja tuunk mëti'ipë ojts nyikääkëtën këëkjä'ä, aak ijxpëtsëmy tnija'awëtyë, jam ma ënety jëtu'un të yajma'kxtën tam ja ja'ayëty mëti'ipë ja ëmaaytyuunk të yajtuknipëktën ma ja Dios tmëtuntëtyën.

⁶ Ja Semaías, mëti'ipë nokyjyääpyën ets tu'uk yë Leví ja'ay, ojts tyajnokpyäjta'ay ja ja'ayxyëëw, ma ënety jam yajpaatën ja yajkutujkpë, ja wintsëntëjkëty, ja teetyëty mëti'ipë txëëwajtëpën Sadoc ets Ahimélec, Abiatar myaank, ets ja myëku'uktëjkëty ja ja'ayëty mëti'ipë nyikopk'ajtëpën ja jyiiky myëku'ukëty, y'u'unk y'ëna'këty ets ja teetytyëjkëty mëti'ipë Leví ja'ayëtyën. Tii xëëw ja tuunk tyuka'aja'anëtën, aak ijxpëtsëmy ma ja nija'awënën ojts tpëktën. Nimäjtskpëky ja Eleazar ja jyä'äy ojts tyuka'ajëtë, e ja Itamar tu'kpëkyjyäty.

^7-18 Ko t'ijxpëtsëëmtë, jëtu'un ojts tyuka'ajëtë tä yam ja xyëëw yajnikajpxa'antën, jëtu'un tsyo'ontä'äky ma mëtu'ukpën ets jyëjpkëxy ma ja i'px majktaxkpën: Joiarib, Jedaías, Harim, Seorim, Malquías, Mijamín, Cos, Abías, Jesús, Secanías, Eliasib, Jaquim, Hupá, Jesebab, Bilgá, Imer, Hezir, Afses, Pedaías, Hezequiel, Jaquín, Gamul, Delaías, Maazías.

¹⁹ Jëtu'un ojts ja tuunk yajtuknikäkëtya'atë ets jap tsajptëkoty tyuntëty, jëtu'un tä ënety ja Wintsën mëti'ipë Israel Tios'ajtypyën ja ënä'ämën të tyajwë'ëmyën mëët ja Aarón, mëti'ipë yë'ëjëty y'ap'ajt y'ok'ajtëpën.

²⁰ Ja Leví ja'ayëty mëti'ipë ënety të nyiwë'ëmtën, jä'ä xyëëwajtë: Subael, yë Amram y'u'unk y'ok; Jehedías, Subael y'u'unk y'ok; Rehabías;

²¹ Isías, mëti'ipë kä'äxkopkën;

²² Selomot, Ishar jyä'äy; Jáhat, Selomot jyä'äy;

²³ ma ja Hebrón y'u'unk y'okën, jä'ä xyëëwajtë: Jerías, ja mëtu'ukpë; Amarías, ja mëmäjtskpë; Jahaziel ja mëtëkëëkpë; ets Jecamán, ja mëmajktaxkpë.

²⁴ Tam ënety näjyëtu'un ja Micaías, myaank yë Uziel; Samir, myaank yë Micaías;

²⁵ Isías, Micaías y'uty; Zacarías, myaank yë Isías;

²⁶ Mahli ets Musi, myaank yë Merarí; ja y'u'unk y'ëna'k yë Jaazías, yë'ë myaank näjyëtu'un Merarí.

²⁷ Ma ja Merarí y'u'unk y'okën, tam'ajtëp ënety ja mëti'ipë xyëëwajtëpën: ma ja Jaazías ja y'ëna'kën, ja myaank Soham, Zacur ets Ibrí;

²⁸ e ma Mahli y'ëna'kën tam mëti'ipë xyëëwajtëpën: Eleazar, mëti'ipë ka'ap y'ijty yë myaankëty,

²⁹ ets Quis; Jerahmeel, myaank yë Quis;

³⁰ ja Musi y'ëna'k, mëti'ipë xyëëwajtëpën: Mahli, Edar ets Jerimot. Ya'atë ja Leví ja'ay'ayëty, aakmëët ja y'u'unk y'ëna'këty, y'u'unk tyo'oxytyëjkëty.

³¹ Näyjyëtu'un yë'ëjëty ojts nyäyyajwa'kxëtë, aak ijxpëtsëmy ojts nyikääkëtë ja tuunk, ëpëky ja mëj ëna'ktëjkëty ets ëpëky ja mutsk ëna'ktëjkëty, jëtu'un tä myëku'ukëtyën ja Aarón ja y'u'unk y'ok, ko ojts nyäyyajwa'kxëtë nän tam'ajtëp ënety ja yajkutujkpë David, teety Sadoc, teety Ahimélec ets ja mëti'ipë ja jyiiky myëku'uk nyikopk'ajtëpën, ja jyëën tyëjkëty ets ja Leví ja'ayëty.