1 Crónicas 23 - Biblia Dc en Mixe de Quetzaltepec

Ja Leví ja'ayëty ets mëti'ipë tyuunk'ajtëpën

¹ Yë David tëë ënety myëjja'ayënë ko ojts tuknipëky ja myaank Salomón ets yë'ë yajkutukëty ma ja Israel kajpnën,

² tä tyajmujktaay ja mëjja'aytyëjk jampë yajpaatën ma ja Israel kajpnën, mëti'ipë mëj'äämpy ijtëpën ets ja teetytyëjkëty ets ja Leví ja'ayëty.

³ Yë'ë ojts tmëtyowtë ja Leví ja'ayëty mëti'ipë naxyëty ja jyëmëjtëtyën i'px majk, ko tmëtyoowtaaytyë tä t'ijxtë ko jä'ä nyiwinë'atë ni''i'px majkmokx tëkëëk mil ye'etyëjktëjk.

⁴ Jamts yajmëtyoowpëtsëëmtë ni''i'px taxk mil mëti'ipë wyintänëtëpën ja tuunk ma ja tsajptëjk kyoja'anyën, tëtujk mil mëti'ipë nyipaye'eytyëpën ets nyiwintsën'atëpën.

⁵ Nimajktaxk mil mëti'ipë kyëwent'atëpën ja tëjk'aaw ets wiinkpë ja nimajktaxk mil mëti'ipë xëmë ja Wintsën wyin'ëw wyinya'axtëpën, tyaj'ëna'antëty ja xyuxnëty y'akëty tukwinxu'ux tukwinwoptëty ja Wintsën.

⁶ Ja David ojts tyajwa'kxta'ay ya'atë ja'ayëty aakjëtu'un tä ënety ja tyuunk të tyuka'ajëtën, aak tu'kja'ayjyäty, mëti'ipë ja Leví y'u'unk'ajtyp y'ëna'k'ajtypyën: Tä ja Guersón, Quehat ets Merarí.

⁷ E ja Guersón jä'ä y'ëna'k xyëëwajtë: Laadán ets Simí.

⁸ Ladán tëkëëk y'ëna'k y'ijtë, mëti'ipë xyëëwajtën: Jehiel, ja mëjpë, Zetam ets Joel.

⁹ Simí y'ëna'k nän nitëkëëk y'ijtë: Selomit, Haziel ets Harán. Ya'atë jëtu'un nyikopk'ajtë jyiiky myëku'ukëty ma ja Laadán y'u'unk y'okën.

¹⁰ Yë y'u'unk y'ëna'k Simí taxk y'ijtë: Jáhat, Zizá, Jeús ets Beriá.

¹¹ Ja Jáhat jä'ä kä'äxkopk, e ja mëmäjtskpë jä'ä xyëëwajtyp Zizá; e ja Jeús ets Beriá ka'ap nëkooyë tmëët'ajtë y'ëna'këty, paaty ojts tu'ukyë yajmëtyowtë nimäjtsk tä jeexyë tyu'kmëku'uk'atën.

¹² Quehat nimajktaxk yë y'u'unk y'ijtë: Amram, Ishar, Hebrón ets Uziel.

¹³ Amram jä'ä y'u'unk y'ëna'k xyëëwajtë: Aarón ets Moisés. Aarón yë'ë Dios win'ijxë ets yë'ë xëmë tyakëty ja wintsë'kën ëmaaypyë ma Wintsënën; yë'ë yajtoyëp ja poom, yë'ë kajpxta'akëp ma ja kënu'kxën xëmë t'amëtowëtyën, ja tuunk mëti'ipë ojts yajtukmëwë'ëmtën tuntëty xëmë mëët ja y'u'unk y'ëna'k.

¹⁴ Ja Moisés mëti'ipë oy myëtuunën ja Wintsën, tu'ukyë mëët ja y'u'unk y'ok yaj'amëtyoowmujktë ja Leví ja ja'ayëty.

¹⁵ Moisés jä'ä y'ëna'k xyëëwajtë: Guersón ets Eliézer.

¹⁶ Ja Guersón ja y'u'unk mëtu'ukpë jä'ä xyëëwajtyp Sebuel.

¹⁷ Ja myëtu'uk u'unk ja Eliézer jä'ä xyëëwajtyp: Rehabías ets yi'iyë tu'uk y'u'unk'ajt; e yë Rehabías nimay ojts y'u'unk y'ëna'k y'ity.

¹⁸ Yë mëtu'ukpë Ishar myaank jä'ä xyëëwajtyp Selomit.

¹⁹ Yë Hebrón y'ëna'k jä'ä xyëëwajtë: Jeraías, mëtu'ukpë; Amarías mëmäjtskpë, Jahaziel ja mëtëkëëkpë ets Jecamán ja mëmajktaxkpë.

²⁰ Uziel y'ëna'k jä'ä xyëëwajtë: Micaías ja mëtu'ukpë ets Isías ja mëmäjtskpë.

²¹ Yë Merarí y'u'unk y'ëna'k jä'ä xyëëwajtë: Mahli ets Musi. Yë Mahli y'u'unk y'ëna'k jä'ä xyëëwajtë: Eleazar ets Quis.

²² Eleazar ka'ap ënety nitu'uk y'u'unk ye'etyëjkpë ko y'o'ky: Yi'iyë ojts tmëët'aty nyëëxëty, mëti'ipë mëët ja jyämy pyëjktën y'uktën, jä'ä jëtu'un ja Quis ja y'ëna'këty.

²³ Yë Musi myaank nitëkëëk y'ijtë: Mahli, Edar ets Jeremot.

²⁴ Ya'atë jëtu'un y'u'unk'ajt y'ok'ajt yë Leví, jëtu'un tä ënety tyu'kjëëky'at tyu'kmëku'uk'atën, mëti'ipë ja xyëëw miintëpën këxja'ay ko yë'ë tnikopk'atë ja jyä'äyëty, naxy ja jyëmëjtëty i'px, aaktuunk mëët ënety yajpaatë ma ja tsajptëjkën.

²⁵ Tëë ënety ja David y'ënä'äny: Yë Wintsën, mëti'ipë y'ëwtajtëpën yë Israel ja'ayëty, tëë ja akujk'at jotkujk'ajtën tmo'oy ja nyaax kyajpn ets tëë kë'ëm ja tsyënaaytyakn twin'ixy ko jam y'ita'any Jerusalén.

²⁶ Paaty yë Leví ja'ayëty ka'ap nëjkx nëkoo y'ëknäytyukmëje'emty'o'kënëtë ja tsajptëjk witnikojpyë, ja kaaxë ets tëkokyë mëti'ipë tuunpën jap ko kajpxtakën y'ity.

²⁷ E jëtu'un ojts ja David tjaakni'ënä'ämë ets ja ja'ayëty yajkëxja'atëty ja xyëëwëty, mëti'ipë ja Leví jyä'äy'äjtypyën, naxypyë ja jyëmëjtën i'px,

²⁸ yë'ë myëwë'ëmtë ja teety'ajtk, mëti'ipë ja Aarón y'u'unk'ajtyp y'ok'ajtypyën, ma ja tuunk ënety tyu'uye'eyä'änyën jap tsajptëkoty, jap tëja'p, tëkoty ets ma yajpuja'anyën ja apëjk atu'unën kënu'kxypyë ets tëkokyë tiituunk jap yajpatpën.

²⁹ Yë'ë ojts yajtuknipëktë t'ixtëty tuntëty ja tsajpkääky mëti'ipë kënu'kxyën mëti'ipë janaam jatsojk tëkajtspën ja ma'kxtëypyë jam y'ityën ets t'ëxta'atëty ja tsajpmokway mëti'ipë yajyojxpën jap tsajptëkoty, ma ja tsajpkääky yaj'oytyunyën ka'apë tsyooymyëëtëtyën, ja yojxën japë y'oyën tu'tsjoty ets ja jëtsy ets tëkokyë winë mëti'ipë kijpxyjäty najxpën.

³⁰ Tyaapë ja'ayëty xëmë jap yajpaatëty tsajptëkoty jopy, ux ets tyajnaxtëty ja kukkajpxën ja'awëkyëtakkën, twin'ëw twinya'axtëty ja Wintsën,

³¹ ets ko yajyäky ja wintsë'kën jëpom, jëpom, ma xëëw tyunyën ets ma po'kxënxëëwën ets jënu'un ja xëëw tyimtuny tyimjatyën mëti'ipë, xëmë mëpaat tmëtuntë ja Wintsën jëtu'un tä ënety yë'ë të tyuka'ajëtën.

³² Yë'ë näjyëtu'un ijty y'ijx'ijtëp ja tëkot ma ja näpyaatë y'ityën mëët ja Dios ets ma ja tsajptëjk tëkotën, tyuntë jap jëtu'un mëët ja jyiiky myëku'ukëty, mëti'ipë ja Aarón y'u'unk'ajtyp y'ok'ajtypyën.