1 Crónicas 21 - Biblia Dc en Mixe de Quetzaltepec

Ma ja David tjaaymyukyën ja ja'ayxyëëw

¹ Ënet ja mëjku'u jam jyä'äjty ma ja Israel ja'ayëtyën ets mëktä'äky ja David tuktuuny ja mëti'ipë ka'ap y'oyëtyën ma ja Israel yajjaaymyuktën.

² Ënet ja David ojts t'ënëëmë ja Joab ets ja mëjja'aytyëjk: Nëjkxtë jaaymyujkta'atë ja'ay, xytyimyajtso'onta'aktëty jam Beerseba ets xyajja'tëty Dan ets xymyëmintëty ja noky tääts n'ixëtyës jënu'un ja ja'ay nyimay'atë.

³ E Joab tyaa y'ëtsooy: Wintsën tyunëp yë mëyajtën ets mëko'pxnaxy ja'ay jyaak nimayëty; ¿je'eyëp ko yë'ëjës oy ka'ap nijawë, wi'ixën ko xytsyojkpë ja'ay yajjaamyukëty pë aakmijts yë ja'ay mnitënääpy? ¿Tii ko nëkoo je'eyë mpoky xy'ixta'aja'any?

⁴ Ja yajkutujkpë ka'ap ojts jyä'äkyukë oy jëtu'un ja Joab jya'ënëmaayë, tä Joab ojts tsyoony, wa'ats t'aye'eytyääy ja Israel ja y'itjot nyaaxjot ets jatëkok wyimpijty jam Jerusalén ko tyaj'apatëtyääy ja tyuunk.

⁵ Ko ja Joab wyimpijty, ënät tukë'ëtëjkëy ja David ja mayjyä'äyxyëëw ets yaj'ijxpëtsëëmy ko jä'ä ënety ja Israel ja'ayëty nyimay'atë tu'kmillon ja tu'kmëko'px mil, aakyë'ë mëti'ipë maayëtëpën nyëjkxtëty tsiptuunpë. E jam Judá jä'ä yajmëtyoowpëtsëëmtë taxk mëko'px ja tëkë'px majk mil.

⁶ Je'eyëp ko ka'ap ojts yajmëtyowtë ja Leví ets ja Benjamín ja'ayëty, jä'ä ko ja Joab ka'ap jëtu'unpë ja winma'any oy t'ijxy mëti'ipë ja yajkutujkpë ënety të tuknipëjktaakën.

⁷ Yë Dios ka'ap tukjotkëtäky ya'atë jëtu'unpë winma'any, paaty tkexy ja ëyo'on ma Israel kajpnën.

⁸ David ko nyäjya'awëyë tëë tyëkoy, ënät tmaaywyäjtsy ja pyoky ma Wintsënën ets y'ënäny: Tëës ntëkoy mëjwiin këjää ko jëtu'unpë winma'any të npaatyës. E tyam n'amëtoy npëjktsoy ets xypyokymyä'kxëtyës, maajës winë të ntuuntëkoyën.

⁹ Tä ja Wintsën t'ënëmaay ja Gad, mëti'ipë wiinkajpxpën ma Wintsënën, jampë tyunyën ma David yajkutukyën.

¹⁰ Nëjkx yë David xy'ixy ets xy'ënëëmëty ko tëkëëkës yam nmo'oy winma'any ets twin'ixëty mëti'ipë tsyojkpy ntunëtyës.

¹¹ Ënet ja Gad ojts tninëjkxy ja David ets t'ënëmaay: Jëtu'un y'ënä'äny yë Wintsën: win'ix mëti'ipë mtsojkpy

¹² win'ix pën mtsojkpy tëkëëk jëmëjt ja yuu, ëkë tëkëëk po'o ma ja mëtsip mëët mtsiptunëty, ëkë tëkëëk xëëw ma ja pa'am ëyo'on yajpaatëty ma naax kajpnën mëti'ipë ja Wintsën yaj'itäämpyën ma mëët ja kyukäjpxy tyaj'ita'anyën ja ëyo'on jotmay. Mëmay mëtaj mëti'ipës ënät ntuk'ëwaanëpën mëti'ipës të xykyexyën.

¹³ Tä ja David t'ëtsooy ja Gad: Tyam mëj Jotmayjyotyës kë'ëm të nnäyajka'ayë, tii ënät tyam ntunëpës, ëjts jëtu'unës n'ëna'any ko nikë oy'ajtp koos yë Wintsën yë'ë xytyiytyunëty ets këtii ko yë nmëtsiptëjkës naaxwiinyëtë ja'ayëty.

¹⁴ Ënet ja Wintsën tkejxy ja pa'am ëyo'on jam ma Israel kajpnën ets mayjyä'äy y'o'ktë tyëkooytyë, jä'ä nyiwinë'ajtë ja o'kpëty tëkë'px majk mil.

¹⁵ Ja Wintsën ojts tuknikexy ja kyukäjpxy ets nëjkx tyajkutëkoy ja Jerusalén kajpn. E ko ënety jam jëtu'un ja Wintsën ja kyukäjpxy may yaja'ay'o'knë, mëk ja Wintsën ojts tjaja'awënë, ënät t'ënëmaay jatëkok ja kyukäjpxy: Wä'än yi'iyë, këtii m'ëk tuuntëkooynyëty. Ja Wintsën ja kyukäjpxy jam ënety yajpaaty ma tu'uk ja'ay nyaaxjotmën mëti'ipë txëëwajtpën Ornán, Jebús ja'ay, tsajpmok ënety jam yajmujkpy.

¹⁶ Ko ja David y'ijxë'ky, ënät t'ijxy ko tamtëm ja Wintsën ja kyukäjpxy yajpaaty, tam tkë'ëkë'ë'aty ja tyiypyujxn ets itkujky yajpaaty ma ja naaxwiinyëtë mëët ja tsajp nyäpyäätyë ets ja tyiypyujxn jamtëm tnajtstijë ma ja Jerusalén kajpnën. Ja David mëët ja mëjja'aytyëjk tëë ënety nyätyukxoxëtë wit këëtsëtypë ets twinkuxtënaaytyë ja Wintsën ja kyukäjpxy,

¹⁷ ets ja David t'ënëmaay ja Wintsën: Ëjts ojts nni'ënä'ämë ets yajjaaymyukëty tëkokyë ja ja'ayxyëëw ma kajpnën. Ëjts të ntëkoy, ëjts yë poky nmëët'ajtyp. ¿E ya'atë ja'ayëty ka'ap tii të tuuntëkoytyë? Wintsën mëti'ipës nTios'ajtypyën, tun mëyajtën tyam n'amëtoy npëjktsoy etsës ëjts xyaj'ookëty ets xyaj'o'kta'ajëty yë n'u'unk n'ëna'k n'u'unk nto'oxytyëjkës, je'eyëp ko ya'atë ja'ayëty ka'ap nëkoo xy'ëkyaj'o'knëty.

Ma ja David tyajpëtë'ëkyën tu'uk wintsë'këntyakn

¹⁸ Ënet ja Wintsën ja kyukäjpxy t'ënëmaay ja Gad ets nëjkx t'ënëëmë ja David wä'än tu'uk yë Wintsën yë wyintsë'këntyakn tyajkojy jam ma Ornán kyamjotmën ma ja tsyajpmok tyajpajk'atyën.

¹⁹ David jëtu'un tuuny jëtu'un tä ënety ja Gad të y'ënë'ëmxëtyën, mëët Wintsën xyëëwkyëjxm

²⁰ Ornán mëti'ipë ënety jam yajpajk'ajtypyën ja tsajpmok, ko y'ijxwinpijty ojts t'ixy ja Wintsën ja kyukäjpxy, e ja nimajktaxkpë ja y'ëna'k jampë jyämyëët'atyën, ënätyë nyäyu'tstaayëtë.

²¹ Ko ja David jam wyinkoony ma jam tyunyën ja Ornán, ënät näjyëtu'un y'ijxpatë ets nyimiinë, ko jam jyä'äjty ma David, tä wyintäky nyaaxkooy.

²² Ënet ja David t'ënëmaay ja Ornán: Mooykyës tääpë mnaax ma xyajpajk'atyën yë mtsajpmok etsës jam n'oytyunëty tu'uk yë Wintsën yë wyintsë'këntyakn. Tu'kmëto'kës jëtu'un ijxtëm tsyoowpaatyën, nëkoo ko Wintsën tjëpëky tjëtuny ya'atë pa'am ëyo'on ma naax kajpnën.

²³ Ets ja Ornán y'ëtsoowë: Tam yë naax kam, Wintsën, mijts ix wi'ix xyajtuna'any. Yë tsajpkaa oy nmo'ojëty wä'än yë'ë twintsë'kën'aty, e yë kepy mëti'ipës yë tsajpmok ntukyajpajk'ajtypyën wä'än yë'ë tja'axy'äty ets tsajpmok wä'än yë'ë Wintsën tyajtukwintsë'ëkë. Tëkokyë ya'atë mijts yam nmooytyääpy.

²⁴ E ja yajkutujkpë David tyaa y'ëtsooy: Nkukajpxëpës yam ko jëtu'un m'ëna'any, ëjts njuyäämpyës yam tä tsyoowpaatyën, jä'ä ko ka'ap njëkyepy tii npëjkëty etsës yë Wintsën nmo'ojëty ëkë ntukwintsë'ëkëtyës yë Wintsën mëti'ipës ka'ap xytsyoowpatën.

²⁵ Jëtu'un ja David tkujuuy ja Ornán ja nyaax, tëtujk käpy ojts aakyë'ë pu'ts pujxn tukkujuy,

²⁶ jam ojts tkojy tu'uk ja wintsë'këntyakn, ma tmooyën ja Wintsën ja wyintsë'kën nino'oky nixämpyë, ets ja nay'ëëw'oy näykyajpx'oyë ttuuny mëët ja Wintsën. Tä ja Wintsën tmënu'kxtäky ets y'ëtsoowë mëët mëj jëën, jam tsajpjotm tsyo'ony ets tukkëtäky ja jëyujk ooky nino'okpyë mëti'ipë ënety jamën ma wintsë'këntyaknën.

²⁷ Ënet ja Wintsën ojts tuk'ëne'emy ja kyukäjpxy ets jatëkok tpëjkë'ëkëty ja tyiypyujxn.

Ja naax ma ja tsajptëjk y'itëtyën

²⁸ Ja xëëw ko ja David t'ijxy tëë ja Wintsën y'ëtsoyë ets tëë myëtoow'ijtxëty ja jyiiytyakën nyu'kxtakën jam ma Ornán nyaaxjotmën, ma ënety ja tsajpmok jam tyajpajk'atyën, jam tmooy ja Wintsën ja wyintsë'kën.

²⁹ Oy ënety jyayajnijawë ko jam mëpaat yajyäky ja wintsë'kën ma ja Wintsën ja wyittëjkën mëti'ipë ja Moisés ojts tkojyën jam të'ëts'itjotm ets ja wintsë'këntyakn jampë yajpaatyën ma ja Gabaón y'itjotmën,

³⁰ David ka'ap jam nyëjkxany ets jeexyë ja Wintsën winëjaty tyajtëy, jä'ä ko tëë ënety mëj këjää y'ëtsë'ëkëty ja Wintsën ja kyukäjpxy mëti'ipë myëët'ajtypyën ja tëypyujxn.