1 Crónicas 19 - Biblia Dc en Mixe de Quetzaltepec

Ma ja David ka'ap tyajmëtä'äkyën ja Siria ja'ayëty ets Amón ja'ayëty

¹ Ënet ojts ja Nahas y'o'knë, mëti'ipë ënety jam yajkutujkpën ma ja Amón ja'ayëtyën, e ja myaank jä'ä ojts kyutëkëty.

² Tä ja David ojts myäy tyäjy, ko kopkpëky ko oy tjawëty ja Hanún, ja Nahas ja myaank jä'ä ko ja mëjja'ay Nahas oy ënety ja David të tjawë, paaty ja David ojts tkexy ja kyutënääpyë jam ma ënety ja Hanún yajkutukyën, e ko jyajtë ja David ja kyutënääpyë jam ma Amón ja'ayëtyën,

³ tä ja mëjja'aytyëjk mëti'ipë Amón ja'ayëtyën t'ënëmaaytyë ja Hanún, mijts yajkutujkpë David ka'ap yë'ëkyëjxmëty të tkexy yë jyä'äy ko tmëkjawë ko ja mteety të y'ooky, yë'ë tap wiinkpë wyinma'any tmëëtëty, je'eyë myintë ijxpë tuunpë ets tnijawëja'antë tii n'ëkmëët'ajtëm ets tii nkamëët'ajtëm.

⁴ Ënet ja Hanún ni'ënä'ämëy ets ja David ja jyä'äy yatsumtëty, tääts t'ënëmaay ja tyuunpëtëjk ets ja y'awaay tjäjpëtëty ets tkë'tsëtëty ja wyit jampaat tkë'tskëtakëtëty ma ja y'ixtuuntyën. Tääts jatëkok t'ëxmajtsy.

⁵ Ko ja David yajtuknija'awëy wi'ix ënety ja myëku'uktëjk të yajtun të yaj'ënëëmëtën, ënät ja wiinkpë ja jyä'äy tuknikejxy ets t'ënëmaay ko wä'än jam t'ëwxitë Jericó, koonëm ja y'awaay jatëkok yontëty, täänëm jya'tëty ma nyaax kyajpnëtyën.

⁶ Jëtu'un'äämpy ja Amón ja'ayëty ojts mëtsip y'awinpitë mëët ja David, ko ënety ëxëëk ja jyä'äy të tuunëtë, paaty ja Hanún ets ja Amón ja'ayëty may tyajmujktë ja poop pujxn ets tjuuytyë pujxnwintëkäämpë mëti'ipë myëtsiptuunantëpën ets tmëjuuytyë näjyëtu'un may ja tsiptuunpë mëti'ipë tso'ontëpën jam Mesopotamia, Sirië, Maacá ets Sobá,

⁷ ëpëky ojts i'px majkmäjtsk pujxnwintëkäämpë t'ajuuytyujktëpë mëti'ipë yajmëtsiptuunpën ets näjyëtu'un ja yajkutujkpë mëti'ipë jam ënä'ämpën Maacá mëët ja jyä'äy. Tä tsyo'ontë ets jam nyäpyëjktakëtë Medebá y'itjotm. Ojts ja Amón ja'ayëty tsyo'ontëpë ets tsyiptuna'antë.

⁸ E ja David ënätyë tnija'awëy, tä tkejxy ja Joab mëët ja myäytsyiptuunpë.

⁹ Ja Amón ja'ayëty ojts nyäjyëjp'ixëtë yajxon ets jam ma kyajpnpa'ajëtyën tsyiptuna'antë. Ja yajkutujkpë mëti'ipë të yajmëjuytyën jam ojts ujtsjotm wyë'ëmtë.

¹⁰ Ko ja Joab t'ijxy ko wintuuytsyow yajnimina'any ets jëxkë'ptsow, ënät poj'am twin'ijxy ja jotmëkëtypë ja tsiptuunpëtëjkëty ets yajxon nyänyipëjktakëtë ets tsyiptuna'antë mëët ja sirië ja'ayëty.

¹¹ E jä'ä ko tam ënety näjyëtu'un ja Amón ja'ayëty, tä ja y'uty Abisai jä'ä tuknipëjky ets twinkuwa'akëty,

¹² ets t'ënëmaay: Pën yë sirië ja'ayëty ka'ap xyajmëtä'äkyës mijts ënät xynyiminëpës ets xynyiwaantu'utëtyës, e pën mijts ka'ap yë Amón ja'ayëty myajmëtä'äkyë ënätyë ninëjkxëty ets niwaantu'utëty.

¹³ Amëk jotmëk timyajpaat, tsojk nitsiptu'unëm yë naax'ajt nkajpn'ajtëm ets ja Dios ja nyaax kyajpn. Tyam tsojk nätyukë'ëwa'anëm yë Wintsën, yë'ë nyija'ap wi'ix winë tuna'any.

¹⁴ Tä ja Joab tnitso'ontë ja sirië ja'ayëty ets tnipëtë'ktë, e ja sirië ja'ayëty ënätyë kyäktaaytyë.

¹⁵ E ko ja Amón ja'ayëty t'ijxtë ko tëë ja sirië ja'ayëty kyäkta'atë, ënätyë ja Amón ja'ayëty näjyëtu'un tkukäktääytyë ja Abisai, Joab ja y'uty, jap kajpnjoty ojts jyaakukääkëtë. Tä ja Joab jatëkok wyimpijnë jam Jerusalén.

¹⁶ Ko ja sirië ja'ayëty nyäjya'awëtë ko ka'ap ja Israel ja'ay të yajmëta'akëtë, ënät tkäjpxynyikäjxtë ja myëku'uktëjkëty sirië ja'ayëty jampë ënety yajpaatën ma ja Éufrates mëjnëëjën ets myintëty. Yë'ë jam tu'uwyiin'ajtp ja Sofac, mëti'ipë ja tsiptuunpëja'ay nyiwintsën'ajtypyën jampë tsyoontën Hadad-ézer.

¹⁷ E ja David ojts ënätyë yajtuk'ëwaanë, paaty tnipëjktakëy ja jyä'äy, ja Israel ja'ayëty ets tsyo'ontëty, tyuknajxtë ja Jordán mëjnëë ets jam nyäpyëjktakëtë ma mëët tsyiptuna'antën ja myëtsipëty. David yajxon tuknima'kxëy ja jyä'äy wi'ix ja sirië ja'ay twinkuwa'akëja'antë, ënät ja tsip tyajpëtë'ktë ets yajxon mëët tsyiptuuntë,

¹⁸ ja sirië ja'ayëty koonëm yajkäkëtë ja Israel ja'ayëty, jä'ä ko may ojts y'o'knëtë, niwëxtyikxy mil ja sirië ja'ayëty y'o'ktë mëti'ipë tekyye'epy tsiptuuntëpën ets niwëxtujk mil ja pujxnwintëkäämpë yajpëjkyëtyë mëti'ipë myëtsiptuuntëpën, ëpëky ja David ojts tyaj'o'kpë ja Sofac, mëti'ipë nyikopk'ajtypyën ja sirië ja'ayëty ja tsyiptuunpë.

¹⁹ Ko ja Hadad-ézer jyä'äy t'ixjtë ko ka'ap ja Israel ja'ayëty të yajmëta'akëtë, ënät tkajpx'o'oyëtë mëët ja David ets jä'ä ojts ja David tu'ukyë tim myëtuunëtë. Jä'ä xëëw ojts ja sirië ja'ayëty y'ënanëtë ko ka'ap nijëna'a ja Amón ja'ay t'ëkputëkëjanëtë.