1 Crónicas 17 - Biblia Dc en Mixe de Quetzaltepec

Ja Tios ja kyäjpxytyu'unën mëët ja David

¹ Ko ja David ënety të tpatnë ja kyutujktakn, ënät t'ënëmaay ja Natán, ja käjpxynyajxpë: Ëk'ix, ëjts tëkotyës n'ity ets janty'oy ja jëën tëjk maas nyajpaatyën, e yë Wintsën ja jyëën tyëjk je'eyë ja oywyi'ix wyitnitëyëty.

² Ets ja Natán y'ëtsooy: Mijts mnija'ap tii mtunäämpy, yi'iyë ko xytyuknipëjktaakëty, yë Wintsën mputëkëtëp yë'ë.

³ E jä'ä tsu'um ja Wintsën ojts tmëkäjpxy ja Natán kuma'ayjoty ets t'ënëmaay:

⁴ Nëjkx ma David ets xy'ënëëmëty, ko ëjts, mëti'ipë Wintsën'ajtpën, jëtu'unës n'ëna'an: Ka'ap myijts'atëty xykyojëty tu'uk ja tëjk maas ëjts n'itëtyën.

⁵ Maju'unëm jap mtso'ontën Egiptë, ëjts ka'apës nijëna'a muum tsajptëkoty të n'ity, je'eyës ja ntëjk witnikemyë muum yajpëjktakojy ets janaam jatsojk muum yajmënëjkxy.

⁶ Ix nu'unës mëët jeky të njëtitë, nitu'ukën ojts pën nka''amëtoyës mëti'ipë ojts tu'uwinye'eytyën ja nnaax nkajpnës ets tkojtëty ja ntsajptëjkës mëët yë oy kepy oytsyaa.

⁷ E paaty yam n'ënëëmë ets xy'ënëëmëty yë ntuunpës David, ko ëjts, ja Wintsën mëti'ipë maaytyääyëpën winë, jëtu'unës n'ëna'any: Ëjts ojts mijts njuuty ma ënety myajpaatyën jëtu'un tä muum yë pax jëtyu'u majts'ity y'itën ets ma ënety je'eyë mkupixyny këwent'atyën ets mijts ja naaxës nkajpnës xynyikopk'ajtëty;

⁸ ëjts xëmës mijts të njämyëët'aty oy maa të mtimnyijkxy, tëë ja mmëtsip nyajkutëkooytyä'äyës ets mijts mëj'äämpy të nyajnaxy, jëtu'un tä ja'ayëtyën mëti'ipë mëj'äämpy ijtëpën yaa naaxwiiny naaxkëjxy.

⁹ Tëës ëpëky tu'uk naax nwin'ixy ma Israel ja'ayëtyën ets jam të naaxmo'otës, jëtu'un kyë'ëm naaxjoty y'itëty, ma ka'ap ni pën myëmayëtëty ets ni'ëxëëkja'aytyëjk kyayajtsipkä'äxëtëty tä ijty tëëyëpën.

¹⁰ Koos mpëjktäky yë ja'ayëty mëti'ipë tsip'ixyëtyën ets yë'ë nnaax nkajpnës tu'uwinye'eytyëty. Ëjts jëtu'unyës nëjkx ja mëtsip njaamteeny naaxteeny. Ets tyam ntuk'ëwaanë koos nyajmayëjäämpyës yë m'u'unk m'ëna'k,

¹¹ e ko ënety mijts m'o'knë mtëkooynyë, m'u'unk m'ok nëjkx tu'uk mpëjktä'äkyës ma kutujktaknën ets näjyëtu'un ja y'u'unk y'ok nëjkxëpës nyajkutujkpë'aty.

¹² Yë'ës nëjkx ja ntëjkës tkojy ets nyajmëktakëtyës ja kyutujktakn xëmëkyëjxm.

¹³ Jëtu'unës näjyawëja'anyë tääjës jeexyë xytyeety'ätyën ets yë'ë jëtu'unës njawëja'any tääjës jeexyë n'u'unk'atyën. Yë'ë ka'apës nijëna'a nmëtsiptsona'any ijxtëmës nmëtsiptso'onyën ja mëti'ipë ojts mijts xykyutëkën,

¹⁴ ni'ikyënëmës ja kyutujktakn nmo'oja'any maas ja njëën ntëjkën ets maas ja nkutujktaknën. Ja y'ënyääytyakn ma yajkutukyën xëmëkyëjxm ja y'ita'any.

¹⁵ Natán ojts ja David tukmëmëtyä'äky, ijxtëm ja Wintsën ënety të y'ënë'ëmxëtyën ets ijxtëm ënety të t'ixyën.

¹⁶ Ënet ja David ojts tmënpëjktsoy ja Wintsën ets t'ënëmaay: Wintsën, ¿tim pën ëjtsnë ets tim pën ja n'u'unk n'ëna'kës, nto'oxytyëjkës ets xymyo'ojëtyës ya'atë oyajtënë?

¹⁷ Mëët mijts wäänë jëtää xy'ixy ko winë xymyo'oyës, ix tëë yë'ëpaat xytyukwinwa'anënyës wi'ixës nëjkx ja n'u'unk y'ok yajkutuktë ma ja mnaax mkajpnën ets xypyëjktä'äkyës tä jeexyë nëkooyë mëj'ajtën këjxm'ajtën nmëët'ajtnës.

¹⁸ ¿Ëjts tii ayukës n'ëkjaakpaatëp, mëët mëti'ipë ja mtuunpë mmoopyën mëjwiin këjää, mijts wa'ats xynyijawë wi'ix ya'atë mtuunpë yajpaatyën?

¹⁹ Wintsën, tëkokyë ya'atë xytyuuntä'äky xykyajpxtä'äkyën mëët ëjtskyëjxm xytyuny xykyäjpxy, jëtu'un tä mijts të xytyuknipëjktaakën ets tyam kë'ëm xytyimnikäjpxy.

²⁰ Wintsën, kamaa jëtu'unpë Wintsën muum kyayajpaatëty tä mijts mTios'atyën ets ka'ap ma wiinkpë tios jëtu'unpë winë janty'oy tuny tkäjpxyën, tä ja mëti'ipë ëëtsëty kë'ëm të ntimy'ixtën

²¹ E mëëtpë ënät ja mkajpn, ja Israel kajpn, ka'ap ma wiinkpë jëtu'unpë tä yë'ëjën, ka'ap ma wiinkpë kajpn jëtu'unpë tä yë'ë myëjkajpnëtyën, tu'ukyë je'eyë yajpaaty yaa naaxwiiny naaxkëjxy. Mijts, Dios, mijts të xyaj'ëwaatsëpëtsëmy ets yë'ë xykyajpn'atëty ets ojts mëj'äämpy mijts m'awinpity mëët ko winë xytyuuny xykyäjpxy mëjwiinpë këjääpë. Mijts wa'ats ja naax kajpn xyajkutëkooytyääy maajaty nyajxtën ets ja mnaax mkajpn yë'ë xyajmëtaky, mëti'ipë jap mju'tën Egiptë,

²² jä'ä ko mijts yë Israel kajpn të xyjyä'äniwa'any xëmëkyëjxm ets mijts mWintsën'atëty.

²³ E paaty yam n'ënëëmë mijts Wintsën ets tu'ukyë jëtu'unpë ja winma'any xymyajts'itëty ma ëjtsën, ja tyampë të xynyikäjpxyën ets maas ja n'u'unk n'ëna'k näjyëtu'un yajkutuktën ets xyaj'atëwëty jëtu'un ijxtëm të m'ëna'anyën.

²⁴ Wä'än ja m'aaw m'ayuk t'atëy xëmë ets wä'än ja mxëëw tnaxy mëj'äämpy ets käjpxy y'ëna'anëty yë Wintsën yë'ë maaytyääyëp winë, mëti'ipë y'ëwtajtëpën ja Israel. Ko yë David ja kyutujktakn xëmëkyëjxm y'ijtëwëty ma y'u'unk y'ëna'kën ets mijts kë'ëm mëk mtimpyëjk'it mtimyajts'itëp.

²⁵ Mijts Dios, tëëjës yajxon xytyimtukwinjawë ko ja nkutujktaknës xëmëkyëjxm xyaj'ita'any maas ja n'u'unk n'okën; e paaty yam mpëjktsowa'anyës ma mijtsën tu'uk ja mëyajtën, oy je'eyë xy'ëktuunpë'atyës.

²⁶ Mijts Wintsën, mijts mTios'ajtp ets mëj këjää ja mtuunpë oyajtën të xytyukwinwanë;

²⁷ ets mëj këjää ja mëyajtën të xytyuny ko të xykyënu'kxy ëjts ja nkutujktakn, näjyëtu'un maas ja n'u'unk n'okën mëti'ipë yajkutukantëpën ets ko m'ëna'any ko winë xëëw xyaj'ita'any ets xykyuwa'ana'any. Mijts Wintsën mijts kë'ëm të xytyimkënu'kxy ets kënu'kxy xëmë y'itëty.