1 Crónicas 15 - Biblia Dc en Mixe de Quetzaltepec

Ma ja David ojts tyajnëjkxyën ja Tios ja kyaaxë jam Jerusalén.

¹ David ojts tni'ënä'ämë ets tkojtëty ja tëjk ma ja David ja myëjkajpnën, ojts näjyëtu'un tni'ënä'ämë ets tkojtëty tu'uk ja wit tëjk ma ja Dios ja kyaaxë y'itëtyën.

² Ënet ja ënä'ämën ojts tyajwë'ëmy ets y'ënäny: Ka'ap tjëkyepy ni pën tonëty yë Wintsën yë kyaaxë, yi'iyë Leví jyä'äy patëtëp tontëty, jä'ä ko yë'ë kë'ëm yë Wintsën të wyin'ixëtë ets jam xëmë tyuntëty ma yë'ëjën.

³ Tä tyajtu'ukmujktaay ja Israel ja'ayëty jam Jerusalén ets tyajtsoona'antë ja Wintsën ja kyaaxë, tmënëjkxa'antë jam ma ënety të tnipëjktaakëtën.

⁴ Ojts tyajtu'ukmujkta'ay ja Aarón ja y'u'unk y'ok ets ja Leví ja jyä'äy.

⁵ Ja Quehat ja y'u'unk y'ok jä'ä myujktë niwinë, mëko'px ja i'px: Yë'ë Uriel nyiwintsën'ajtyp ja jyä'äy, aakmëët ja jyiiky myëku'ukëty.

⁶ Ja Merarí y'u'unk y'ok ja nyiwinë'ajtë, nimäjtsk mëko'px ja i'px: Jeséas yë'ë ja myëku'uk nyiwintsën'ajtyp ets aakmëët ja jyiiky myëku'ukëty.

⁷ Guersón jä'ä y'u'unk y'ok nyiwinë'atë, nimëko'px ja i'px majk: Joel yë'ë nyiwintsën'ajtyp ja myëku'uk ets aakmëët ja jyiiky myëku'ukëty.

⁸ Elisafán, jä'ä y'u'unk y'ok nyiwinë'atë, nimäjtsk mëko'px: Semaías yë'ë ja myëku'uk nyiwintsën'ajtyp ets aakmëët ja jyiiky myëku'ukëty.

⁹ Ja Hebrón jä'ä y'u'unk y'ok nyiwinë'ajtë, majkta'px: Eliel yë'ë ja myëku'uk nyiwintsën'ajtyp ets aakmëët ja jyiiky myëku'ukëty.

¹⁰ Uziel, jä'ä y'u'unk y'ok nyiwinë'ajtë, mëko'px ja majkmäjtsk: Aminadab yë'ë ja myëku'uk nyiwintsën'ajtyp ets aakmëët ja jyiiky myëku'ukëty.

¹¹ Tä ja David näjyëtu'un ojts tmëkäjpxy ja Sadoc ets ja Abiatar, mëti'ipë teety'ajtëpën, ojts tmëkäjpxy näjyëtu'un ja Leví ja'ayëty mëti'ipë txëëwajtëpën Uriel, mëti'ipë nyikopk'ajtypyën ja myëku'uk,

¹² tä t'ënëmaay: Miitsëty mëku'uktëjkëty ma xynyikopk'atën ja mnaax mkajpnëty, myajpëjktsowtë ets mnäpyuj mnäjyä'ätsëtëty, näjyëtu'un ja mjëëky mëku'ukëty ets tjëkyäpëty wi'ix ja Wintsën ja kyaaxë xyajtsoonëtëtyën ets yajmënëjkxëty ma të yajni''ixën;

¹³ jä'ä ko ojts tëkok jyayajmëtsoona'any, ka'ap myiitsëty xymyëtso'ontë, paaty yowë ojts yë Wintsën jyoot'anpëky ets ojts ja nmëku'uk'ajtëm y'o'knëtë jä'ä ko ka'ap ojts jëyëjp ja Wintsën yaj'amëtoy wi'ix yajtunëtyën.

¹⁴ Ënet ja teetytyëjkëty ets Leví ja'ayëty ojts nyäpyuj nyäjyä'ätsëtë ets jëtu'un tjëkyejpy ja Wintsën ja kyaaxë tyajtso'onëtëty.

¹⁵ Yë'ë kepy tyukpakëëytyë kyejkyijxyëty, jëtu'un tä ënety ja Moisés të tni'ënä'ämën ma ja Wintsën ojts myëkäjpxyën.

¹⁶ Ojts näjyëtu'un ja David tni'ënä'ämë ets twin'ixtëty ja ja'ay ma ja Levíjën mëti'ipë ëwtëp ya'axtëpën ets jä'ä xyu'uxtët wyoptëty, tpëjkta'aktëty ja mëto'owën mëti'ipë yajkëxë'ëktëpën ko jyam'aty ja jotkujk'ajtën.

¹⁷ Ja Leví ja'ayëty ojts tuknipëktë ja Hemán, yë Joel yë myaank; tääts yë Asaf, yë Berequías myaank, nän yë'ë myëku'uk yë Hemán; nän yë'ë Merarí jyä'äy ets aak tu'kmëku'uk y'ijtë, tääts ja Etán näjyëtu'un, ja Cusaías ja myaank;

¹⁸ ojts wiinkëtypë ja myëku'uktëjk yajtuknipëktë ja tuunk, mëti'ipë ja myëku'uk pyaye'eytyëpën, yë'ë ojts yajnikajpxpätë Zacarías, Jahaziel, Semiramot, Jehiel, Uni, Eliab, Benaías, Maaseías, Matatías, Elifelehu, Mecneías ets ja mëti'ipë ja tëjk'aaw y'ijx'ijtëpën, mëti'ipë txëëwajtëpën Obed-edom ets Jeiel.

¹⁹ Ja Hemán, Asaf ets Etán, yë'ë ojts yajtuknipëktë ets tyaj'ëna'antëty ja pujxn mëti'ipë yaj'akojxmujkpën.

²⁰ Yë Zacarías, Aziel, Semiramot, Jehiel, Uni Eliab, Maaseías ets Benaías yë'ë ijty yaj'ënantëp ja ak, jëtu'un tä ja Elam ja'ayëty tyaj'ëna'antën,

²¹ e ja Matatías, Elifelehu, Mecneías, Obed-edom, Jeiel ets Azazías jä'ä ja kow yaj'ënantëp, jëtu'un tä sunamja'ay kyowtën, jä'ä näjyëtu'un ja ëy yajtso'ontaktëp.

²² Ja Qunanías mëti'ipë nyikopk'ajtypyën ko muum tii yajmënëjkxa'any, yë'ë ënety yajtu'uye'epy ja tuunk, jä'ä ko oy winë tuny ets oy winë tja'akyukë.

²³ Ja mëti'ipë y'ijx'ijtëpën ja Wintsën ja kyaaxë jä'ä xyëëwajtëp: Berequías ets Elcana.

²⁴ E ja teetytyëjkëty Sebanías, Josafat, Natanael, Amasai, Zacarías, Benaías ets Eliézer, jä'ä nëjkxtëp jëjp'am xuxpë mëët ja pyujxn xuxnëty, ma jam yajmëye'eyën ja Wintsën ja kyaaxë. Yë Ebed-edom ets Jehías yë'ë y'ijx'ijtëp ja kaaxë.

²⁵ Ënet ja David, mëët ja mëjja'aytyëjk ets ja wintsëntëjkëty, mëti'ipë ja tsiptuunpëtëjk y'ënä'ämtëpën, ojts nyëjkxtë jam ma ja Obed-edom ja tyëjkën, ma ja Wintsën ja kyaaxë yajpaatyën ets tmëtsoona'antë mëët ja akujk'ajt jotkujk'ajtën,

²⁶ E ja Wintsën yë'ë kë'ëm tyimputëjkëp ja Leví ja'ayëty ma jam ja kaaxë tyajtu'uye'eytyën, paatykyëjxm ojts tyaj'ooktë wëxtujk ja tsajpkaa ets wëxtujk ja tsajpkaa u'unk ets jä'ä ja Wintsën tukwintsë'ëkëja'antë.

²⁷ David yë'ë ënety wyit'ajtyp ookwyit ets aakjëtu'un ja wyitëty ja Leví ja'ayëty mëti'ipë ja kaaxë pyakëëytyëpën, ja ëëpëty ets ja Quenaías mëti'ipë tu'uwinye'eypyën ma ja Wintsën ja kyaaxë yajmënëjkxyën; ëpëky ja David tniyä'äp'aty tu'uk ja mëjwit ookwyit.

²⁸ Tëkokyë ja Israel ja'ayëty ëëp yaxp nyëjkxtë mëët ja xoontakën jotkujk'ajtën tyajnëjkxtë ja Wintsën ja kyaaxë.

²⁹ Ko ja Wintsën jyajtë ma ja David ja kyajpnën, ënät ja Mical, ja Saúl ja nyëëx, y'ijxpëtsëëmy jam tëjkwinm; ko t'ijxpaty ja David jyänty y'etsy jyänty xyoontä'äky akujk jotkujk, ënätyë ja jyot wyinma'any myä'ty mëët yë'ë.