1 Crónicas 10 - Biblia Dc en Mixe de Quetzaltepec

Ma y'o'kyën ja Saúl mëët ja y'u'unk y'ëna'k jam tsipjotm

¹ Ënet ja filistejë ja'ayëty ojts tëkok tnipëtë'ëktë ja Israel ja'ayëty, e ja Israel ja'ayëty ënätyë kyäktaaytyë, jä'ä ko ja filistejë ja'ayëty may ojts ënätyë tyaj'o'kojtë ja Israel ja'ayëty jam ma Guilboa kopkën.

² Saúl mëët ja myaank'ëna'k ojts jyakäknëtë, filistejë ja'ayëty ënätyë pyatso'onëtë, tääts tyaj'oktë ja Jonatán, Abinadab ets ja Malquisúa, nitëkëëk aakyë'ë Saúl y'ëna'k.

³ Ko tyaapë ëna'k y'ëk'o'ktaaytyë, tääts yi'iyë ja Saúl ojts yajtukwa'kmuky, ja ti'pxpëty jä'ä ojts myëmëta'akëtë ets ja Saúl tsyëtyujty.

⁴ Ënet ja Saúl ojts ënätyë tjamëkäjpxy ja tyuunpë mëti'ipë myëët'ajtypyën ja akëëytyujkën ets t'ënëmaay: Yaj'o'kës mëët yë mtëypyujxn, këtiipë tääpë mëtsip xytyukxi'iktëtyës. E ja tyuunpë ka'ap nye'a'ijxëy tyaj'ookëty ja wyintsën mëët ja mëktsë'ëkë. Ënet ja Saúl ojts kë'ëm tkajpë'ëky ja tyiypyujxn ets tkukëtaawë'ky, jëtu'un kë'ëm nyäyaj'o'kë.

⁵ E ko ja tyuunpë y'ijxë ko tëë kë'ëm ja Saúl nyäyaj'ookyë, ënät näjyëtu'un tkukëtaawë'ky ja tyiypyujxn kë'ëm ets y'oky.

⁶ Jëtu'un'äämpy y'oky yë Saúl, mëët nitëkëëk ja myaank ets tëkokyë ja jyiiky myëku'uk jä'ä xëëw.

⁷ Ja Israel ja'ayëty mëti'ipë jam tsënaaytyëpën joyjotm, ko t'ijxtë tëë ja Saúl y'ooky mëët ja y'u'unk y'ëna'k, ënät ënätyë kyäktë ma ënety jam yajpaatën ets nyëjkxtaaytyë. Tä ja filistejë ja'ayëty ojts yë'ë jam myiinëtë tsënääpyë ets ja kajpn tniwa'ktaaytyë.

⁸ Komjëpom ja filistejë ja'ayëty nyëjkxtaaytyë ma jam ja o'kpëtyën ets tpëjkmujkta'aja'antë winë, ënät tukye'eypyäjtë jam ja Saúl ja nyini'kx mëët ja y'u'unk y'ëna'k, tëë y'o'ktaaynyëtë jam ma ja Guilboa kopkën.

⁹ Tääts tpëjkëtyääytyë ja wyit ets ja mëti'ipë myëtsiptuunpyën; ojts ja kyëpajk tnëtsujkëtë tääts tmënëjkxtaaytyë, ko jëtu'un jyäjty, ënätyë tkäjpxynyikäjxtë ja naax kajpn ets ja wyintsënëty mëti'ipë y'ëwtajtëpën.

¹⁰ Ja Saúl ja kyu'umën jam ojts yajpëjktä'äky ma ja wyintsën ja tsyajptëjkën, e ja kyëpajk jam ojts yajpëjktä'äky ma ja Dagón ja tsyajptëjkën.

¹¹ Ko ja Jabés ja'ayëty mëti'ipë jam tsënaaytyëpën Galaad tnija'awëtyë wi'ix ënety ja filistejë ja'ayëty ja Saúl të tuntën,

¹² ënät ojts aakyë'ë nyäkyajpxëtë ja ja'ayëty mëti'ipë jotmëkëtyën, tääts jam tmëkäktë ja Saúl ja nyini'kx ets ja y'u'unk y'ëna'k ja jyä'äjëty ets tmënëjkxtë jam Jabés. Jamts tyajnaaxtëjkëtyë ma jam tu'uk ja xoj kepy tyänën. Ko tyajnaaxtëjkëtyääytyë, wëxtujk xëëw y'ayuu'ajtë.

¹³ Jëtu'un ojts ja Saúl y'ooky tyëkoy, mëët ko ënety ka'ap oy winë të tuny, jä'ä ko myëtëjkëy ja poky, mëët ko tkamëmëtooy ja Wintsën ja y'ënä'ämën tyiyajtën ets mëët ko ojts ja najtsja'apë winë tyajtëëwnë

¹⁴ ijxtëm jeexyë jam tyajtëyën winë ma ja Wintsënën. Paatykyëjxm pyëjkëyë ja kuttujkën ets jä'ä yajmooy ja David, Jesé ja myaank.