1 Corintios 7 - Biblia Dc en Mixe de Quetzaltepec

Kajpxwijën wi'ix ja ja'ay pëkpyë tsyëënëtëty

¹ Tyaas n'ëtsoowinpity mëti'ipë miits myajtëëwtën nokykyijxy, mëti'ipës ojts xytyuknikäxtën. Wäänë oy ja'ijty ko jeexyë ja ye'etyëjk ka'ap pyiky;

² je'eyëp ko jä'äkyëjxm ko ja ja'ay pyokytyuntë ko xim yam nyämyëëtsëënëtë, nikë oy ko ja ye'etyëjk tu'ukyë ja tyo'oxytyëjk tmëëtsëënëtëty ets ja to'oxytyëjk tu'ukyë ja ye'etyëjk tmëëtsëënëty.

³ Tim Kopkpëky ko ja ye'etyëjk tsyëënëty mëët ja tyo'oxytyëjk ijxtëm pyaat'atyën ets ja to'oxytyëjk näjyëtu'un.

⁴ Ni yë'ë to'oxytyëjk nätyu'uk tkajä'äjëty ja nyi'kx kyopk, tu'ukyë mëët tjä'ä'aty ja nyiye'etyëjk; ni yë'ë ye'etyëjk nätyu'uk tkajä'äjëty ja nyi'kx kyopk, jyä'ä'ajtyp näjyëtu'un ja tyo'oxytyëjk.

⁵ Paaty n'ënëëmëtë, këtii mnäy'ëxmatsëtëty, nätyookëtë nimäjtskëty; ënät tëy pën mkäjpxy'ajtëp ko mnäy'ëxmatsa'anëtë jä'ä ko ja Dios mëkajpxantëp. Ok jatëkok mnäpyuwa'akëtëty, këtiipë ja mëjku'u mëmëta'akëtëty ets myajpokytyunëtëty.

⁶ Ka'ap miits n'ënëëmëtë ko ka'ap mpëktëty, nyajkutujkpyës yë'ë.

⁷ Jëtu'unës njatsoky ets ni'ëmukë ja ja'ay jeexyë y'itë ijxtëm ëjtsën, je'eyëp ko ka'ap ja Dios tu'knax ja tuunk të xymyo'oyëmë.

⁸ Mëti'ipë nätyu'ukën ets mëti'ipë ku'ookyëtyën, oy ko jeexyë nätyu'uk y'itë ijxtëm ëjtsën.

⁹ E pën ka'ap tmëmëta'aka'antë ja nyi'kx kyopk, nikë wä'än timpyëktë ets këtiipë pyokytyuntëty ko tkamëmëta'aktëty ja nätyu'uk'at.

¹⁰ E mëti'ipë të pyëjknëtën, jëtu'unës ya'atë ënä'ämën njaakmo'otë; ka'ap ëjts njä'äjëty, Wintsën yë jyä'ä, ko ka'ap ja to'oxytyëjk nyiye'etyëjk t'ëxmatsëty.

¹¹ Pën y'ëxmajtsyp ja to'oxytyëjk ja nyiye'etyëjk, nätyu'uk jëtu'un y'itëty, ëkë nänyijootwinpitëtëp jatëkok, näjyëtu'un ja ye'etyëjk ka'ap pyaat'atyë ets ja tyo'oxytyëjk t'ëxmatsëty.

¹² Jëtu'unës n'ëna'any, oy ja Wintsën jëtu'un kya'ëna'any, pën jää ja ye'etyëjk mëpëjkpë tmëëtsëënë ja to'oxytyëjk mëti'ipë ka'ap myëpëkyën ets ja to'oxytyëjk y'a'ijxëp ets tmëëtsëënëja'any ja nyiye'etyëjk; ja ye'etyëjk ka'ap t'ëxmatsëty ja to'oxytyëjk.

¹³ Ets pën jää ja to'oxytyëjk mëpëjkpë tmëëtsëënë mëti'ipë ka'ap myëpëkyën ets pën y'a'ijxëp ja ye'etyëjk ko tmëëtsëënëja'any ja to'oxytyëjk; ka'ap ja to'oxytyëjk t'ëxmatsëty ja nyiye'etyëjk.

¹⁴ Ja ye'etyëjk mëti'ipë ja Jesukristë ka'ap tmëpëkyën, kënu'kxëtëp ja Dios ko ja tyo'oxytyëjk mëpëjkp; ets ja to'oxytyëjk mëti'ipë ja Jesukristë ka'ap tmëpëkyën, kënu'kxëtëp ja Dios ko ja nyiye'etyëjk mëpëjkp. Pën ka'ap jyëtu'unëty, jëtu'un jeexyë ja m'u'unk m'ëna'k y'itë ijxtëm mëti'ipë tyaak tyeety kamëpëjktëpën; je'eyëp ko ja m'u'unk m'ëna'këty, Dios ja kënu'kxëtëp.

¹⁵ E ko ja ja'ay mëti'ipë ka'ap myëpëkyën tnikä'äkëty ja tyo'oxytyëjk ëkë nyiye'etyëjk, jyëkyejpy nyëjkxëty, najtspëkë ja wyi'im mëti'ipë mëpëjkpën, jä'ä ko ja Dios të myaxtsowëtë ets akujk jotkujk mtsëënëtëty.

¹⁶ Mijts to'oxytyëjk, ¿mnija'ap ko jyëkyejpy mijtskyëjxm ja mniye'etyëjk Dios yajknitso'okëtëty? ets mijts, ye'etyëjk, ¿mnija'ap ko jyëkyejpy mijtskyëjxm ja mto'oxytyëjk Dios yajknitso'okëtëtyë?

¹⁷ Oy jyawi'ix'ajtpë, jëtu'un njuuky'ajtëmë ijxtëm ja Wintsën ja tuunk nitu'ukjaty të xymyo'oyëmën; jëtu'un ijxtëm ënety ja Dios të xyaxtso'owëmën. Jëtu'unës nnëëmë ja mëpëjkpëtëjkëty ni'ëmukë.

¹⁸ Pën ja Dios yaaxtsoopy ja ja'ay mëti'ipë ja ye'etyëjkajtën të yajnatsujk'ëwtityën, jëtu'un nyäpyëjkta'akëtëty ijxtëm jeexyë kyatsukyëtyën; e pën ja Dios të yaxtsoyë mëti'ipë ka'ap ye'etyëjkajtën nyatsujk'ëwtityëtyën, ka'ap atsip yajtsukëty.

¹⁹ Ka'ap maa tyuny pën tsuky katsuky, yë'ë tuunp pën pyatuumpy ja Dios ja y'ënä'ämën.

²⁰ Jëtu'un ja ja'ay mëpaat jyuuky'äty ijxtëm ënety ja Dios të yaxtsoyën.

²¹ Pën mëtuunpë nitookpyën ijty mijts ko ja Dios myaxtsoowë, ka'ap xymyëmay xymyëtajëty. Pën jyëkyejpy ëwaatsëtum mwë'ëmëty, ënätyë xy'ëxajëty.

²² Ja ja'ay mëti'ipë ijty mëtuunpën nitooky, najtspëkë ja tyam y'ity jä'ä ko jëtu'un ja Dios të tuknipëjktaakë; ets näjyëtu'un mëti'ipë ijty najtspëkë ijtpën ko ja Dios ojts yaaxtsoyë, Kristë ja tyam myëtuumpy ijxtëm mëtuunpë nitookpyën.

²³ Tëë miits ja Dios tsow mkujuyëtë, këtii mnäyakëtëty ets ja wiink ja'ay myajtunëtëty ijxtëm jeexyë m'itën mëtuunpë ëyoopë.

²⁴ Jëtu'un, mëku'uktëjkëty, juuky'atë ijxtëm ja Dios të myaxtsowëtën.

²⁵ Ka'apës tii ënä'ämën nmëët'aty etsës pën n'ënëëmëty ets ka'ap pyëkëty, ka'apës ja Wintsën tii të xytyuk'ëne'emy; ëjts jëtu'unës nnikäjpxyp ijxtëmës nja'akyukën, tä tu'uk yë ja'ayën mëti'ipë yë Wintsën oyjya'awëyëpën.

²⁶ Jëtu'unës n'ëna'any ets ja ja'ay jëtu'un jyuuky'atëty ijxtëm jam yajpaatyën, jä'ä ko tyam tsiptakp ja xëëw.

²⁷ Pën jam mto'oxytyëjk, ka'ap xy'ëxmatsëty; ets pën ka'ap pën, ka'ap xy'ixta'ajëty.

²⁸ E pën mpëjkp, ka'ap pyokyëty; ets pën pëjkp tu'uk ja to'oxy'ëna'k, nän ka'ap pyokyëty. E Mëti'ipë pëjktëp, myëët'atantëp ja jotmay yaa naaxwiiny, ets ka'apës ntsoky ets ja jotmay xymyëët'atëty.

²⁹ Mëku'uktëjkëty, yë'ëjës ya'atë njatijpy, yiin wäänë njaakjuuky'ata'anëmë yaa naaxwiiny. Paaty, mëti'ipë pëkyëtyën jëtu'un tsyëënëtë ijxtëm jeexyë ka'ap pyiky'atën, ja Dios jyä'ä tyukjotëkoytyëp.

³⁰ Pën jëëytyëp yaxtëp, jëtu'un jyuuky'atëty ijxtëm ja ja'ayëtyën mëti'ipë ijtëpën xoontëpën; mëti'ipë ijtëpën xoontëpën jëtu'un jyuuky'atëty ijxtëm ja ja'ayëtyën mëti'ipë maaytyëp tajtëpën; mëti'ipë juuytyëp to'ktëpën, jëtu'un jyuuky'atëty ijxtëm jeexyë ka'ap tii tjä'ä'atën.

³¹ Pën yajtuunpy ya'atë naaxwiinyëtë winma'any, jëtu'un jyuuky'atëty ijxtëm ja ja'ay mëti'ipë ka'ap tunyë këwentë ja naaxwiinyëtë winma'any; jä'ä ko ya'atë naaxwiinyëtë winma'any mëti'ipë tyam n'ijxëmën, tsojk kyutëkoyä'äny.

³² Yë'ës ntsojkpy ets ka'ap miits xymyëmay xymyëtajtëty ja naaxwiinyëtë winma'any. Mëti'ipë ja'ay nätyu'ukën, yë'ë myëmääpy myëtäjpy ja Wintsën ja jyä'ä ets tyajjotkujk'atëty ja Wintsën;

³³ e mëti'ipë ja'ay pëkyën, yë'ë myëmääpy myëtäjpy ja naaxwiinyëtë winma'any ets tyajjotkujk'aty ja tyo'oxytyëjk.

³⁴ Tëkajtsp ja winma'any, ja to'oxytyëjk mëti'ipë ka'ap pyikyëtyën, yë'ë myëmääpy myëtäjpy ja Wintsën ja jyä'ä, wi'ix mëpaat nyätyukë'ëtëkëtyën ja Dios wa'ats aaw wa'ats jot ets wi'ix mëpaat ja nyi'kx kyopk wa'ats tmëët'atyën ijxtëm ja jyot wyinma'anyën; je'eyëp ko ja to'oxytyëjk pëkpyë, yë'ë myëmaay myëtäjpy ja naaxwiinyëtë winma'any ets wi'ix tyajjotkujk'atëtyën ja nyiye'etyëjk.

³⁵ Ka'apës jëtu'un n'ëna'any ets miits ka'ap tii xy'ëktuunëtëty, paatyës jëtu'un n'ëna'any ets oy mtsëënëtëty ets oy xymyëtuntëty ja Wintsën.

³⁶ Pën jam pën myäy tyäjy ets ja nyëëx pyëka'any ko jyëmëjt të tpatnë; ko myäy tyäjy ko kyopkpëkyëty ets pyëkëty, wä'än tpëky, ka'ap yë pyokyëty.

³⁷ E pën jam pën myäy tyäjy ko ka'ap pyëkëka'any ets tuny mëti'ipë tyunäämpyën, ko ja y'aaw jyot y'ënä'äny ko ka'ap pyëka'any oy ënety ko kyapëky.

³⁸ Jëtu'unts, pën të pyikyën ijxtëm ënety të tuknipëjktaakën, oy jëtu'un; ets pën ka'ap të pyikyën, wäänë oy ënety tii tuny.

³⁹ Ja to'oxytyëjk pëkpyë myëëttsëënëp ja nyiye'etyëjk ko ënety ja nyiye'etyëjk jyuuky'äty; ets ko ja nyiye'etyëjk y'ookëty, najtspëkë ja to'oxytyëjk wyi'im ets jyëkyejpy jatëkok pyëjktëkatsëty mëët ja wiinkpë ja ye'etyëjk, nëkoo ko ënety myëpëky.

⁴⁰ Ëjts jëtu'unës nja'ëna'any ko wäänë jotkujk tsyëënëty pën ka'ap jatëkok pyiky. Jëtu'unës nmay ntajy ets Dios yë jya'awën jëtu'un xyaj'ënaanpës.