Salmos 9 - Tayta Diosninchi Isquirbichishan

Ñacajcunatapis Tayta Dios ricashan Álef

David isquirbishan alabansa.
Álef

¹ Tayta Dios, llapan shongöpami alabayta munä. Allita rurashayquitaga llapantami willacushaj.

² Munayniyoj Tayta Diosnë gampaj cushicurmi gamta alabä. ¡Alabansacunatami cantashaj!

Bet

Bet

³ Chiquimajcuna gampitaga gueshpinmi. Tunerga jinanchömi wañun.

⁴ Gamga alli juez carmi dimandöta alli arriglanqui. Jamaränayquiman jamaycushcanqui llapanta jusganayquipaj.

Guímel

Guímel

⁵ Mana rispitashojcunataga piñacushcanquimi. Mana wiyacojcunataga illgächishcanquimi. Paycunataga para-simrina gongaycärinanpämi camacächishcanqui.

⁶ Chiquimajcunaga wañushanami. Quiquinwan iwalmi illgasha siudänincunapis. Gammi illgächishcanqui. Paycunapaga manami imallanpis quëdashachu yarpänanpaj.

He

He

⁷ Tayta Diosmi ichanga imaycamapis ray canga. Jusgananpaj jamacunantapis camacächisha.

⁸ Cada ünuntami jusganga imano cashantapis. Llapantapis iwalmi jusgangapaj.

Vav

Vav

⁹ Tayta Diosga imapita ñacaycajcunatapis chapanmi. Payga llaquicuycajcunata washanmi.

¹⁰ Tayta Dios, gamta rejsishoj cäga gammanmi yäracun. Gamman yäracamojtaga manami cachaycunquichu.

Zayin

Zayin

¹¹ Sioncho mandaj caycaj Tayta Diospaj alabansata cantay. Imata rurashantapis intëru marcacunacho willacuy.

¹² Wañuchicojcunata castigäga manami gongangachu llaquicuycajcunata.

Jet

Jet

¹³ Tayta Dios, chiquimajcunaga fiyupami llaquicaycächiman. ¡Cuyapaycamay ari! ¡Wañuchimänantaga ama camacächiychu!

¹⁴ Chaynöpami Jerusalenman yaycunacho willacushaj alabashunayquipaj. Salbamashayquipitapis cushicushämi.

Tet

Tet

¹⁵ Mana rispitashojcunaga yaganga quiquincuna uchcuta rurashallanmanmi. Togllata churashanpis quiquincunatami charenga.

¹⁶ Tayta Dios gamga musyachimashcanqui allita ruraj cashayquitami. Fiyucunaga watacäcusha quiquincuna churashan togllachömi. Selah

Yod

Yod

¹⁷ Fiyucunawan Tayta Diosta mana rispitajcunaga wañojcuna cashanmanmi chayanga.

Caf

Caf

¹⁸ Pobricunatami ichanga imaypis mana gonganquichu. Gamman yäracamojcunataga yarparaycanquimi.

¹⁹ Tayta Dios apuray ari. Ama camacächiychu fiyu runacuna alli-tucunantaga. ¡Mana rispitashojcunataga jusgay ari!

²⁰ Tayta Dios chay runacunataga fiyupa mancharachiy. ¡Mana rispitashojcunaga tantiyacuchun quiquin manacajlla cashanta! Selah