Salmos 146 - Tayta Diosninchi Isquirbichishan

Tayta Dios rurashancunata alabashan

¹ ¡Aleluya! ¡Tayta Diosga alabasha cachun! Llapan shongöpami Tayta Diosta alabashaj.

² Cawashäyäga imaypis Tayta Diosta alabaycäshämi. Cay pachacho cawashäcamaga alabansacunawan Tayta Diosta alabaycäshämi.

³ Ama yäracuychu munayniyoj runacunamanga. Paycunaga runallami. Manami salbashunquipächu.

⁴ Paycunaga wañushpan cashgan allpamanmi ticran. Ima-aycata rurananpaj yarpashancunapis chay junajllami ushacanga.

⁵ Jacobpa Diosnin yanapashan runaga cushishami cawanga. Tayta Diosllaman yäracoj runaga cushishami cawanga.

⁶ Tayta Diosmi camasha syëluta, cay pachata, lamartapis, chaycunacho caycajtapis. Payga aunishancunata cumlinmi.

⁷ Ñacaycajcunataga yanapanmi. Yargaypita caycajcunatanami micuyta tarichin. Prësu caycajcunatapis Tayta Diosga jorgunmi.

⁸ Tayta Diosga gapracunatapis allchacächinmi. Tayta Diosga jatarachinmi tunisha caycajcunata. Tayta Diosga cuyanmi alli runacunata.

⁹ Tayta Diosga ima-ayca mana allipitapis chapanmi juc-lä nasyun runacunata. Yanapanmi wacchacunata biyüdacunata. Fiyu runacunapänami ichanga camacächin mana alliman chayananpaj.

¹⁰ Sión, imaycamapis Tayta Diosllami mandanga. Tayta Diosnillayquimi imaycamapis ray canga. ¡Aleluya! ¡Tayta Diosga alabasha cachun!