Salmos 100 - Tayta Diosninchi Isquirbichishan

Tayta Diosta agradësicushan

Agradësicunanpaj alabansa.

¹ ¡Cay pachacho tiyajcunaga Tayta Diosta cushisha alabay!

² Cushishalla Tayta Diosta aduray-llapa. ¡Shacyalla ñaupanman shamuy-llapa!

³ Paylla Tayta Dios cashanta musyay-llapa. Paymi ruramashcanchi. Noganchïpis paypami canchi. ¡Pay acrashanmi canchi, tajta pampancho uyshancuna caycajnöpis!

⁴ Agradësicushpayqui Tayta Diospa sawanninpa yaycuy. Wasin puncunman shamuy alabansacunata cantaraycar. ¡Agradësicushpayqui payta aduray!

⁵ Tayta Diosga fiyupa allimi. Payga imaycamapis cuyacojmi. Imaypis payga allillatami ruranga.