Zacarías 8 - Q'eqchi Bible

Li xyeechi'om li Qaawa'

¹ Li Nimajwal Yos kinraatina wi' chik chi jo'ka'in:

² “Jo'ka'in naxye li Nimajwal Yos: K'ajo' naq naxamnak linch'ool xb'aan injosq'il chirix Sión; k'ajo' naq naxamnak li waanm!

³ “Jo'ka'in naxye li Qaawa': Tinsutq'iiq wi' chik Sión ut tink'ojlaaq sa' xyi li tenamit Jerusalén. Xtenamit li tiikil ch'oolej taayeemanq re Jerusalén, ut Santil Tzuul tixk'ab'a'in li xtzuulil li Nimajwal Yos.

⁴ “Jo'ka'in naxye li Nimajwal Yos: Toj te'hilanq wi' chik eb' li tiixil winq ut tiixil ixq sa' xyi li tenamit Jerusalén; li junjunq wanq li xxuq' sa' ruq'eb', jo' xk'ulub'eb' xb'aan naq tiixeb' chik chi us.

⁵ Ut naab'alaqeb' li kok'al, teelom ut ixq, te'b'atz'unje'q sa'eb' li xk'ayiil Jerusalén.

⁶ “Jo'ka'in naxye li Nimajwal Yos: Chiruheb' li kutan a'an jo'k'ihaleb' li te'kole'q, te'xk'oxla naq chixjunil a'in ch'a'ajkaq xb'aanunkil; ab'anan moko ch'a'ajkaq ta cho'q we laa'in, chan li Nimajwal Yos.

⁷ “Jo'ka'in naxye li Nimajwal Yos: Tinkoleb' lintenamit naq twisiheb' chaq sa' xjayal releb'l saq'e ut sa' xjayal rokeb'l saq'e;

⁸ ut tink'ameb' chaq re naq te'hilanq Jerusalén. A'anaqeb' lintenamit ut laa'inaq li xYoseb': Yos re li tiikilal ut tiikil ch'oolej”.

⁹ “Jo'ka'in naxye li Nimajwal Yos: Kawaq leech'ool, laa'ex li xex'ab'ink re eb' li aatin a'in rik'ineb' li propeet, chalen naq kik'ojob'aak li rub'elankil li rochoch li Nimajwal Yos.

¹⁰ Xb'aan naq chiruheb' li kutan a'an maak'a' chaq li tojleb' cho'q reheb' li winq chi moko reheb' li xul neke'iiqank; maak'a' ajwi' li tuqtuukilal sa' xyanqeb' li poyanam xb'aaneb' li xik' neke'ilok reheb', ut laa'in ajwi' xinb'aanunk naq maak'a' li sahilal chirib'ileb' rib' li tenamit.

¹¹ Ab'an anaqwan ink'a' chik jo'kanaq cho'q reheb' li tenamit te'kole'q, jo' kik'ulmank chaq chiruheb' li kutan a'an -chan li Nimajwal Yos-.

¹² Xb'aan naq laa'in tin'awoq re li tuqtuukil usilal: eb' li xtoonal li uub' te'uuchinq chi us; taa'elq chik li awimq chiru li ch'och' ut li k'ajob' tixt'aqresi wi' chik li ch'och'; ut chixjunil a'in tink'e chi reechaniheb' li Rela' li tenamit a'in.

¹³ Jo' naq laa'ex aj Judá ut aj Israel majewanb'ilex sa' xyanqeb' li tenamit naq kexwank, jo'kan naq chalen anaqwan osob'tesinb'ilaqex chik naq texinkol. Mexxiwak ut meech'ina eech'ool!

¹⁴ “Jo'ka'in naxye li Nimajwal Yos: Laa'in kexink'e raj chi rahob'tesiik xb'aan naq ke'xchiq' injosq'il leemama' leerixa'an, ut ink'a' kinjal link'a'uxl -chan li Nimajwal Yos-.

¹⁵ Ab'an chiruheb' li kutan a'in xink'uub' rusilankil ru Jerusalén jo'wi' eb' laj Judá. Jo'kan naq mexxiwak.

¹⁶ A'an a'in li teeb'aanu: xyeeb'al li yaal cherib'il eerib', texraqoq aatin sa' tiikilal sa' leeraqleb'aal aatin re twanq li tuqtuukilal;

¹⁷ minume'k kach'inaq sa' leech'ool xb'aanunkil li rahilal reheb' leeras eeriitz'in, chi moko chexyehoq jurament sa' tik'ti', xb'aan naq jwal xik' nawil chixjunil a'in, chan li Qaawa'”.

¹⁸ Li Qaawa' ki'aatinak wi' chik wik'in chi jo'ka'in:

¹⁹ “Jo'ka'in naxye li Nimajwal Yos: Li ayuunik chiru li xka po, li ro', li xwuq ut li xlaje po, a'anaq li xnimal sahil ch'oolej cho'q reheb' laj Judá; taasutq'iiq cho'q nimla ninq'e re paab'ank ut loq'onink. Cherahaq b'i' li tiikilal ut li tuqtuukilal.

²⁰ “Jo'ka'in naxye li Nimajwal Yos: Toj te'chalje'q li poyanam re kok' ut xninqal tenamit.

²¹ Ut li wankeb' sa' jun tenamit te'xik sa' li jun chik, yooqeb' chi xyeeb'al: «Yo'qeb' chi xsik'b'al li Nimajwal Yos ut xtz'aamankil rusilal sa' qab'een!». Ut eb' li junch'ol chik te'xsume: «Tooxik ajwi' laa'o», cha'qeb'.

²² Naab'aleb' li poyanam ut xninqaleb' ru tenamit jwal kaweb' te'chalje'q Jerusalén chi xloq'oninkil ru li Nimajwal Yos jo'wi' re xtz'aamankil rusilal.

²³ “Jo'ka'in naxye li Nimajwal Yos: Chiruheb' li kutan a'an lajeeb' chi winq li jalan jalanq raatinob'aal ut xtenamiteb', te'xchap chi raq' junaq aj Judá ut te'xye re: «Naqaj xik cherix, xb'aan naq xqab'i resil naq li Yos wank eerik'in», cha'qeb'”.