Zacarías 7 - Q'eqchi Bible

Li ayuunik li ink'a' naxk'ul ru li Qaawa'

¹ Sa' li kaahib' kutan xb'e li xb'ele li po, Kislew xk'ab'a', re li xka chihab' chi awab'ejink laj Darío, li Qaawa' kiraatina laj Sakarías.

² Chiruheb' li kutan a'an, eb' laj Betel ke'xtaqla laj Saréser jo'wi' laj Rekem-Mélek, rochb'eeneb' laj tenq' reheb', re xtz'aamankil rusilal li Qaawa',

³ jo' ajwi' re xpatz'b'al reheb' li propeet ut eb' laj tij li yookeb' chi k'anjelak sa' rochoch li Nimajwal Yos: “Ma toj wanq li rahil ch'oolejil ut li ayuunik sa' ro' li po, rajlal chihab', jo' naqab'aanu chalen toj anaqwan?”, chankeb'.

⁴ Toja' naq li Nimajwal Yos kinraatina wi' chik ut kixye we:

⁵ “Ye reheb' chixjunil li tenamit jo'wi' reheb' laj tij chi jo'ka'in: «Laa'ex nekex'ayuunik ut nekexyaab'ak chiru li ro' ut xwuq po chalen chaq lajeeb' xkaak'aal chihab' toj anaqwan; ab'an moko nekeb'aanu ta a'an re inloq'oninkil laa'in.

⁶ Naq nekexwa'ak ut nekex'uk'ak, nekeb'aanu a'an cho'q eere eejunes.

⁷ Ma ink'a' jultik eere eb' li aatin xyehom chaq li Qaawa' chi xtz'uumal reheb' li propeet junxil, naq Jerusalén ut eb' li tenamit chi xsutam wankeb' chaq sa' tuqtuukilal ut k'ajo'eb' li xpoyanamil, ut li chaqich'och' re Nejeb ut li ru taq'a toj tenamiteb' chaq?»”.

⁸ Laj Sakarías ki'aatinaak wi' chik xb'aan li Qaawa' ut kiyehe'k re chi jo'ka'in:

⁹ “Jo'ka'in naxye li Nimajwal Yos: Chexraqoq aatin sa' tiikilal, aj uxtaanaqex ut rahomaq eerib' cherib'il eerib'.

¹⁰ Meerahob'tesi li xmalka'an, li neb'a'yox, laj ab'l tenamit ut li neb'a'; chi moko teek'oxla sa' leech'ool xb'aanunkil li rahilal cherib'il eerib'.

¹¹ Ab'an eb' li tenamit ink'a' ke'raj xpaab'ankil, ke'xjipi chik rib'eb' ut ke'xtz'ap xxikeb' re naq ink'a' ke'ab'ink;

¹² ke'xkawub'resi li xch'ooleb' jo' li raxpek, re naq ink'a' ke'xpaab' li xchaq'rab' ut eb' li raatin li Nimajwal Yos naq kixtaqla chaq li xmusiq', chi xtz'uumal reheb' li najter propeet. Jo'kan naq k'ajo' naq kijosq'o'k li Nimajwal Yos, ut kixye:

¹³ Jo' naq eb' a'an ink'a' ke'raj wab'inkil naq keb'inb'oq, laa'in ink'a' ajwi' nawaj rab'inkil li neke'xtz'aama ut neke'relaji chiwu.

¹⁴ Jo'kan naq kincha'cha'iheb' sa' chixjunileb' li tenamit ink'a' xnawomeb' ru, ut li na'ajej li ke'elk wi' kisache'k ut maajun chik naru nawank aran. Nakirirnak aj chik kikanaak li chaab'il ch'och' a'in”.