Zacarías 6 - Q'eqchi Bible

Li xwaqxaq moy u: eb' li b'eleb'aal ch'iich'

¹ Jun sut chik kintaqsi li wilob'aal ut kiwil jun chik moy u: sa' xyanqeb' wiib' chi tzuul ke'elk chaq kaahib' b'eleb'aal ch'iich' re yalok, ut eb' li tzuul a'an junes q'anch'iich'eb'.

² Li xb'een b'eleb'aal ch'iich' yo xkelonkil xb'aaneb' junes kaqikawaay, li xkab' b'eleb'aal ch'iich' kelonb'il xb'aaneb' q'eqikawaay,

³ li rox b'eleb'aal ch'iich' yo xkelonkil xb'aaneb' saqikawaay ut li xka yo xkelonkil xb'aaneb' kawaay b'alak'eb' rix.

⁴ Toja' naq kinpatz' re li ánjel li yo chi aatinak wik'in: “Wa'chin, k'aruheb' a'an?”, chankin.

⁵ Kichaq'ok li ánjel ut kixye: “A'aneb' li kaahib' chi musiq'ej. Junelikeb' chi k'anjelak chiru li xQaawa' li choxach'och', ut anaqwan xe'elk chaq.

⁶ Li b'eleb'aal ch'iich' kelonb'il xb'aaneb' li q'eqikawaay xkoheb' sa' xjayal releb'l iq'; li kelonb'il xb'aaneb' li saqikawaay xkoheb' sa' xjayal rokeb'l li saq'e ut li kelonb'il xb'aaneb' li b'alak' rixeb' xkoheb' sa' xjayal li xsak'leb' iq'”.

⁷ Eb' li kawaay ke'elk chi te'raj ru xb'eeninkil chixjunil li ruuchich'och'. Ut li ánjel kixye reheb': “Ayuqex, b'eeniiq chaq chixjunil li ruuchich'och'”. Ut jo'kan ki'uxmank.

⁸ Chirix chik a'an kinxb'oq re xyeeb'al we chi kaw: “K'e reetal, li xkoheb' sa' xjayal releb'l iq' a'aneb' te'ch'anab'anq re li xjosq'il li Qaawa' sa' li tenamit a'an”.

Laj Josué kik'ehe'k xkoroon

⁹ Li Qaawa' kinraatina chi jo'ka'in:

¹⁰ “Ayu ut ch'utub' li oor ut li plaat sa' xyanqeb' li xe'sutq'iik chaq Babilonia: a' laj Jelday, laj Tobías ut laj Jedaías. Chirix chik a'an, chiru ajwi' li kutan a'in, tatxik sa' rochoch laj Josías, ralal laj Sofonías.

¹¹ Li oor ut li plaat li ak xaxok, taayiib' jun koroon li taak'e chi xjolom laj Josué, li xyuwa'il aj tij, li ralal laj Josadak,

¹² ut taaye re chi jo'ka'in: «Jo'ka'in xye li Nimajwal Yos: A'an a'in li winq li Tuxm naxk'ab'a'in. Taatuxmeq ut tixyiib' wi' chik li rochoch li Qaawa'.

¹³ A'an taayiib'anq re li rochoch li Qaawa' ut tixk'ul xloq'al cho'q awab'ej; taak'ojlaaq sa' li xk'ojarib'aal chi awab'ejink. Laj tij taawanq chi xk'atq, ut li awab'ej ut laj tij te'wanq sa' tuqtuukilal ut sa' junaj ru ch'oolejil».

¹⁴ Li koroon taakanaaq sa' rochoch li Qaawa', re xpatz'b'alaqeb' laj Jelday, laj Tobías, laj Jedaías ut laj Josías, ralal laj Sofonías.

¹⁵ Te'chalq li wankeb' chaq chi najt, ut tole'okenq chi xyiib'ankil wi' chik li rochoch li Qaawa'. Toja' naq te'xnaw naq a' li Nimajwal Yos xtaqlank chaq we eerik'in. Jo'ka'an taak'ulmanq wi relik chi yaal naq teepaab' li raatin li Qaawa' leeYos”.