Zacarías 5 - Q'eqchi Bible

Li xwaq moy u: li b'otb'ookil hu

¹ Kintaqsi wi' chik li wilob'aal ut sa' moy u kiwil jun li b'otb'ookil hu yo chi xik sa' iq'.

² Li ánjel kixpatz' we: “K'aru yookat chi rilb'al?”, chan we. Kinchaq'ok ut kinye: “Yookin chi rilb'al jun li b'otb'ookil hu yo chi xik sa' iq', numenaq oob' moqoj roq ut kach'in chik maa oxib' moqoj ru”.

³ Toja' naq kixye we: “A'an li majewank xchalk sa' xb'een chixjunil li na'ajej a'in, jo' chanru tz'iib'anb'il sa' xka'pak'alil li hu. Xb'aan naq chixjunil laj elq' taa'isiiq arin, ut chixjunil li nayehok jurament sa' tik'ti' jo'kan ajwi' tixk'ul.

⁴ Laa'in xintaqlank chaq re -chan li Nimajwal Yos- re naq taa'ok sa' rochoch laj elq' ut sa' rochoch li xyehok jurament sa' ink'ab'a' chi yal tik'ti'; ut aran taakanaaq chi xsachb'al ut xjuk'b'al li roqechal ut li xpekul li rochoch”.

Li xwuq moy u: li ixq sa' li chakach re b'isok

⁵ Kichalk wi' chik li ánjel li yo chi aatinak wik'in ut kixye we: “Taqsi laawilob'aal ut k'e reetal li yo chi chalk”.

⁶ Ut laa'in kinpatz' re: “K'aru a'an?”, chankin re. Kichaq'ok a'an: “A'an chakach re b'isok -chan-. A'an xb'ismank wi' li xmaakeb' li poyanam sa' chixjunil li tenamit a'in”.

⁷ Sa' junpaat ki'isimank li q'unch'iich' li tz'aptz'o wi' li chakach, ut aran k'ojk'o jun li ixq sa' xyi li chakach.

⁸ Kixye li ánjel: “Li ixq a'in, a'an li maa'usilal”. Ut kixch'ik wi' chik li ixq sa' li chakach, ut kixtz'ap rik'in jun tz'apleb' q'unch'iich'.

⁹ Kintaqsi wi' chik li wilob'aal, ut sa' moy u kiwil wiib'eb' li ixq wankeb' xxik' ut yookeb' chi rupupik chiru choxa. Li xxik'eb' a'an jo' xxik'eb' li nimla jotz. Ut yookeb' chi xk'amb'al li chakach sa' iq'.

¹⁰ Toja' naq kinpatz' re li ánjel li yo chi aatinak wik'in: “B'ar yookeb' chi xk'amb'al li chakach?”, chankin.

¹¹ Kichaq'ok a'an ut kixye we: “Yookeb' chi xk'amb'al sa' li na'ajej Senahar. Aran toxe'xyiib' jun li rochoch, ut naq akaq xyaalo'k, aran te'xxaqab' sa' xna'aj re xloq'oninkil”.