Zacarías 4 - Q'eqchi Bible

Li ro' moy u: li xna'aj saqenk ut eb' li oliiw

¹ Toja' naq li ánjel li yo chi aatinak wik'in kisutq'iik chaq ut kinrajsi jo' junaq li na'ajsiik sa' xwara.

² “K'aru nakawil?”, chan we. Laa'in kinye re: “Yookin chi rilb'al jun xna'aj saqenk yiib'anb'il rik'in oor chixjunil. Sa' xb'een a'an wank li xna'aj li xya'al li xam, wuqub' chi saqenk rochb'een li xnumleb'aal li xya'al.

³ Ut chi xk'atq wank wiib' toon li oliiw, jun wank sa' xnim ut jun chik sa' xtz'e”.

⁴ Kinpatz' wi' chik re li ánjel li yo chi aatinak wik'in: “K'aru xyaalal li yookin chi rilb'al, wa'chin?”.

⁵ Kinxsume li ánjel: “Ma ink'a' nakanaw xyaalal a'in?”, chan. Ut laa'in kinye re: “Ink'a' ninnaw, wa'chin”.

⁶ Jo'kan naq kixye wi' chik we: “A'an a'in li raatin li Qaawa' cho'q re laj Sorobabel: «Moko rik'in ta metz'ew chi moko rik'in kawil ch'oolej tatk'anjelaq, ka'aj b'an wi' rik'in linMusiq' -chan li Nimajwal Yos-.

⁷ Anihat laa'at, at xnimal tzuul? Chiru laj Sorobabel chanchanaqat aj chik jun nimla taq'a, ut aran taarisi chaq li pek re rub'elankil li kab'l, naq japjo'qeb' re chixjunileb' chi xyeeb'al: K'ajo' xch'ina'usal, k'ajo' xch'ina'usal!, cha'qeb'»”.

⁸ Toja' naq li Qaawa' kixye we:

⁹ “Laj Sorobabel xk'ojob'ank re li rub'elankil li ochoch a'in, ut a'an ajwi' taachoyoq xb'aanunkil. Chi jo'kan teenaw naq li Nimajwal Yos xtaqlank chaq we eerik'in.

¹⁰ Li ink'a' xk'e xloq'al li xtiklajik li k'anjel, taasaho'q chik naq taaril chi yaalo'k li xk'anjel laj Sorobabel”. Chirix chik a'an li ánjel kixye: “Eb' li wuqub' chi eetalil a'in, a'aneb' xsa' ruheb' li Qaawa' li naril wi' chixjunil li ruuchich'och'”, chan.

¹¹ Kinpatz' ajwi' re: “K'aru xyaalal eb' li wiib' toon chi oliiw li wankeb' chi xka'pak'alil li xna'aj saqenk?

¹² K'aru naraj naxye li wiib' ruq' oliiw li nanume'k wi' li xya'al li xam, yiib'anb'il rik'in oor?”.

¹³ Ut li ánjel kixye we: “Ma ink'a' nakanaw k'aru xyaalal a'an?”. Kinchaq'ok ut kinye: “Ink'a', wa'chin”.

¹⁴ Toja' naq li ánjel kixye we: “A'aneb' reetalil li wiib'eb' chi winq xaqab'anb'ileb' xb'aan li Qaawa' re te'k'anjelaq chiru sa' chixjunil li ruuchich'och'”, chan.