Zacarías 2 - Q'eqchi Bible

Li rox moy u: laj b'isonel

¹ Kintaqsi wi' chik li wilob'aal ut kiwil sa' moy u jun li winq wank jun k'aam re b'isok sa' ruq'.

² Ut kinpatz' re: “B'ar xik aawe?”, chankin. Kixye we: “Ok we chi xb'isb'al Jerusalén re xnawb'al jo'nimal li ru ut jo'nimal li roq”, chan.

³ Toja' naq li ánjel li yo chi aatinak wik'in, koho ut jun chik ánjel kolk'uluq re;

⁴ ut kixye re: “Ayu sa' aanil chi aatinak rik'in li winq a'an ut ye re: «Jerusalén taatenamito'q wi' chik; ut xb'aan xk'ihaleb' li poyanam ut ketomq li te'tamq aran, maak'a'aq chik li xsuttz'ak.

⁵ Ab'anan naxye li Qaawa': Laa'in chik li xsuttz'akil; chanchanaqin xam chi xsutam lintenamit, ut linloq'al wanq aran sa' xyanqeb'»”.

Li Qaawa' tixkol li xtenamit

⁶ Ayuqex, elenqex chaq sa' li tenamit wank sa' xjayal releb'l iq', chan li Qaawa'. Laa'in xincha'cha'ink eere junsut junrub'el choxa. Elenqex anaqwan.

⁷ Kol aawib', at Sión, laa'at li wankat aran Babilonia.

⁸ Xb'aan naq jo'ka'in naxye li Nimajwal Yos li xtaqlank chaq we chi xyeeb'al reheb' li xe'rahob'tesink eere: “Ani taarahob'tesinq eere, tinxrahob'tesi ajwi' laa'in”.

⁹ Jo'kan naq ok we chi xtaqsinkil li wuq' sa' xb'eeneb', ut te'sache'q ru xb'aaneb' li xe'wank rub'el xwankileb'. Aran teenaw naq li Nimajwal Yos xtaqlank chaq we.

¹⁰ B'ichan xb'aan xsahil aach'ool, at Sión, xb'aan naq chalk we chi hilank aawik'in, chan li Qaawa'.

¹¹ Sa' li kutan a'an naab'aleb' li tenamit te'chalq wik'in, ut a'anaqeb' ajwi' lintenamit. Ut laa'in tinhilanq sa' eeyanq. Chi jo'kan taanaw naq a' li Nimajwal Yos xtaqlank chaq we aawik'in.

¹² Li Qaawa' taa'ok wi' chik Judá jo' tz'aqal reechanihom sa' li Santil Na'ajej, ut tixsik' wi' chik ru li tenamit Jerusalén.

¹³ Ch'anch'ooq chixjunileb' chiru li Qaawa', xb'aan naq A'an xwakliik ut yo chi elk chaq sa' li xloq'laj muheb'aal!