Tito 3 - Q'eqchi Bible

Li teneb'anb'il sa' xb'een chixjunileb' laj paab'anel

¹ Chajultika reheb' laj paab'anel naq che'paab'anq chiruheb' laj taqlanel ut li wankeb' sa' xwankil; che'ab'inq ut yo'oon wanqeb' re xb'aanunkil chixjunil li chaab'il k'anjel.

² Me'xhob' anihaq, maawa'aqeb' aj yoob'anel ch'a'ajkilal, q'unaqeb' b'an xch'ool ut che'wanq tz'aqal sa' tuulanil chiruheb' chixjunil.

³ Xb'aan naq junxil xoowank ajwi' chaq laa'o sa' xmaak'a'il qana'leb' ut sa' li q'etb'a aatin; xqak'e qib' chi b'alaq'iik, b'ak'b'ooko chaq chi k'anjelak chiru yalaq k'a' chi maa'usilal nawulak chiru li tz'ejwalej, xqanumsi li kutan chi lab'alink ut kaqalink, tz'eqtaananb'ilo jo'wi' naqatz'eqtaana chaq qib' chiqib'il qib'.

⁴ A'ut naq kixk'ut rib' li rusilal ut li qaraab'al xb'aan li Yos laj Kolol qe,

⁵ a'an kooxkol maawa' xb'aan ta xtiikilal li k'anjel uxb'il qab'aan, sa' xk'ab'a' b'an li xnimal ruxtaan, rik'in li kub'iha' li naxyoob'tesi ut narak'ob'resi li qayu'am, rik'in li Santil Musiq'ej

⁶ li kihoye'k sa' qab'een chi numtajenaq sa' xk'ab'a' li Jesukriist laj Kolol qe,

⁷ re naq tiikob'resinb'ilaq qach'ool xb'aan li rusilal ut taaqeechani li junelik yu'am rik'in li loq'laj oyb'enink.

Xch'olob'ankil xna'leb' laj Tito

⁸ Tz'aqal yaal li aatin a'in ut nawaj naq taach'olob' chi tz'aqal, re naq eb' li ak neke'xpaab' li Yos te'xk'e xch'ool chi xb'aanunkil li chaab'il k'anjel. A'an us ut nak'anjelak cho'q reheb' chixjunil.

⁹ Ab'an li patz'ink li maak'a' rajb'al, li xtz'ilb'al rix xk'ab'a'eb' li qaxe' qatoon, li wech'ij ib' ut li choqink chirix xChaq'rab' laj Moisés, maab'aanu a'an xb'aan naq maak'a' na'ok wi' ut maak'a' rajb'al.

¹⁰ Laj po'ol paab'aal, naq ak xaq'us jun wa ka'wa, maawaatina chik:

¹¹ chanawaq naq li winq a'an ak xpo' xna'leb' ut xjunes naxk'e rib' sa' tojb'amaak, xb'aan naq tz'aqal aj maak.

Xraqik li hu

¹² Naq tintaqla aawik'in laj Artemas malaj laj Tíkiko, chaseeb'a aawib' chintawb'al aran Nikópolis b'arwi' xink'oxla xnumsinkil li hab'alq'e.

¹³ Chak'e aach'ool chi xk'eeb'al re laj Zenas, a' laj nahol chaq'rab', jo'wi' re laj Apolo chixjunil li k'aru taak'anjelaq cho'q re xb'eenikeb', re naq maak'a' taamajelo'q reheb'.

¹⁴ Eb' li qakomon che'xtzolaq rib' chi xq'axtesinkileb' rib' chi xb'aanunkil li chaab'il k'anjel re xtenq'ankil li q'axal wankeb' sa' rajb'al ru; chi jo'kan moko jo'qeb' ta li maak'a' neke'ok wi'.

¹⁵ Neke'xtaqla xsahil aach'ool chixjunileb' li wankeb' wochb'een. Chak'e xsahil xch'ooleb' li neke'rahok qe sa' li paab'ank. Li rusilal li Yos chiwanq taxaq eerik'in chejunilex.