Sofonías 3 - Q'eqchi Bible

Raqok aatin sa' xb'een Jerusalén

¹ Ra chaalel sa' xb'een Jerusalén, li tenamit q'etq'et, muxb'il ru ut aj rahob'tesinel.

² Ink'a' xraj rab'inkil li xyaab' xkux li Qaawa' chi moko xk'ulub'a li q'use'k xb'aan; ink'a' xk'ojob' xch'ool chirix li xYos chi moko xjilok chi xk'atq A'an.

³ Li xninqaleb' ru winq li wankeb' aran, chanchaneb' li kaqkoj chaajeb' re; eb' laj raqol aatin jo'keb' laj xojb' sa' li chaqich'och' li ink'a' neke'xkanab' xtib'eb' re wulaj.

⁴ Eb' li xpropeeteb' naxik xb'een neke'xye, aj b'alaq'eb' ut aj tik'ti'eb'. Eb' laj tij neke'xmux li loq'laj na'ajej ut neke'xsach xwankil li xchaq'rab' li Yos.

⁵ Ab'anan li Qaawa' wank sa' xyanqeb'. A'an usilal naxb'aanu, ut maawa' li ink'a' us. Wulaj wulaj naraqok aatin ut rajlal eq'la naxk'ut li tiikilal chiruheb'. A'ut li reemaaru aj winq ink'a' naxnaw xutaanak.

⁶ Jo'ka'in xye li Qaawa': “Xinsach ruheb' li tenamit, xinjuk'eb' li najt xteramil ochoch; nakirirnak xinkanab'eb' li b'e, chi maajun chik nanume'k aran. Xsache'k chixjunil li na'ajej ut maak'a' chik yu'am aran.

⁷ Sa' inch'ool laa'in naq tinxxiwa Jerusalén ut tixk'ulub'an naq tintij; xink'oxla naq ink'a' tixtz'eq chirix li xch'ool chixjunil li xrahob'tesinkil inb'aan. Ab'an xe'xseeb'a chik rib' chi xb'aanunkil li k'iila maa'usilal.

⁸ Jo'kan naq chineeroyb'eni wan laa'ex sa' li kutan a'an, chan li Qaawa', naq tinchalq chi raqok aatin sa' eeb'een. Tinch'utub'eb' li tenamit ut eb' li awab'ej re xkutb'al linjosq'il sa' xb'eeneb', jo' ajwi' re xk'utb'al jo'nimal li naxamnak wi' li waanm. Ut chixjunil li ruuchich'och' taasache'q xb'aan linjosq'il.

⁹ “Naq taawulaq li kutan a'an, tink'e naq eb' li poyanam chaab'il aatin chik te'xye, re naq chixjunileb' te'xyaab'a xk'ab'a' li Qaawa' ut te'k'anjelaq chiru chi junajaq xch'ooleb'.

¹⁰ Toj junpak'al eb' li nima' re Etiopía tole'tz'aamanq ut tole'elajinq chiwu eb' li walal ink'ajol li cha'cha'inb'ileb', ut te'xk'amatq chaq xmayejeb'.

¹¹ “Sa' li kutan a'an ink'a' chik tatxutaanaq chirix li ink'a' us xab'aanu we, at intenamit, naq xaq'etq'eti aawib' chiwu, xb'aan naq twisiheb' aawik'in li q'etq'eteb' jo'wi' li neke'xnimob'resi rib', ut ink'a' chik taanima aawib' sa' linsantil na'aj.

¹² Tinkanab' aawik'in jun tenamit kub'enaq xwankil ut neb'a', li te'xkawub'resi xch'ooleb' wik'in.

¹³ Ut eb' li te'kole'q sa' xyanqeb' laj Israel ink'a' chik te'xb'aanu li maa'usilal chi moko te'tik'ti'iq chik; moko te'xye ta chik b'alaq'il aatin. Naru chik te'tzekanq ut te'hilanq chi sa, chi maajun chik taaxib'esinq reheb'”.

B'ich re sahil ch'oolej sa' xk'ab'a' Jerusalén

¹⁴ B'ichan, at tenamit Sión. Jap aawe xb'aan xsahil aach'ool, at Israel. Saho'qat chi x'anchalil laawaanm, at Jerusalén.

¹⁵ Xb'aan naq li Qaawa' xrisi li raqb'a aatin sa' aab'een ut xraanilasiheb' li xik' neke'ilok aawe. Li Qaawa', li x'awab'ej laj Israel, wank aawik'in, ut maajun chik taaxib'esinq aawe.

¹⁶ Sa' li kutan a'an taayeemanq re Jerusalén: “Matxiwak, at Sión, chi moko chich'inaaq laach'ool”.

¹⁷ Li Qaawa' laaYos wank aawik'in: A'an q'axal nim xwankil ut tatxkol. K'ajo' naq tsaho'q xch'ool sa' laak'ab'a'! Rik'in li xrahom tix'ak'ob'resi laayu'am, ut taab'ichanq xb'aan xsahil xch'ool

¹⁸ jo' na'uxmank sa' xkutankil li ninq'e. Jo'ka'in xye li Qaawa': “Twisi li rahilal ut li xutaan wankat wi'.

Te'sutq'iiq chaq eb' li xe'k'ame'k sa' najtil tenamit

¹⁹ K'e reetal, sa' li kutan a'an tinsach ruheb' chixjunileb' li neke'rahob'tesink aawe. Tintenq'aheb' li karneer li yeq roqeb' ut tinxok chaq li sachenaq. Tinterq'usi leeloq'al ut leek'ab'a' sa' chixjunil li na'ajej b'arwi' xek'ul rahilal.

²⁰ Chiruheb' li kutan a'an texink'am chaq ut texinch'utub'. Toja' naq tinnima leek'ab'a' ut texink'e chi nawe'k sa' xyanqeb' chixjunileb' li tenamit sa' ruuchich'och', naq texwosob'tesi wi' chik”, chan li Qaawa' Yos.