Sofonías 1 - Q'eqchi Bible

Li xkutankil li xjosq'il li Qaawa'

¹ A'an a'in li raatin li Qaawa' li kiyehe'k re laj Sofonías, ralal laj Kusí, ralal laj Kedalías, ralal laj Amarías, ralal laj Esekías, sa'eb' li kutan naq laj Josías, ralal laj Amón, wan chaq cho'q awab'ej re Judá.

² Jo'ka'in xye li Qaawa': “Ok we chi xsachb'al chi junajwa chixjunil li wank sa' ruuchich'och'.

³ Tinsach ruheb' li poyanam ut eb' li xul, tinkamsiheb' li xik'anel xul jo'wi' eb' li kar; teb'ink'e chi tichk'ok li ink'a' useb' xna'leb' ut twisiheb' li winq sa' ruuchich'och'”, chan li Qaawa'.

⁴ “Tinrahob'tesiheb' laj Judá ut chixjunileb' li wankeb' Jerusalén. Jo'nimal toj xkanaak re laj Bahal li xyoseb' tinsach ru chi junajwa; a' ajwi' li xk'ab'a'eb' laj k'anjel chiru ut eb' laj tij tinsacheb' ru.

⁵ Tinsach ruheb' li neke'taqe'k sa' xb'een li kab'l chi xloq'oninkileb' ru li chahim, eb' li neke'xwiq'ib' rib' chiwu laa'in ut neke'xpatz' ajwi' xk'ab'a' laj Milkón li xyoseb';

⁶ eb' li xe'xkanab' intaaqenkil, eb' li ink'a' nikine'xsik' cho'q Qaawa' chi moko neke'patz'ok wik'in”.

⁷ Mexchoqink chiru li Qaawa' xb'aan naq nach' chik wank li xkutankil li Qaawa'. Li Yos xkawresi jun mayejak ut ak xrosob'tesiheb' li rula'.

⁸ “Sa' xkutankil li mayejak -chan li Qaawa'- laa'in tolinrahob'tesi li xninqaleb' ru winq, eb' li ralaleb' li awab'ej jo' ajwi' chixjunileb' laj ab'l tenamit.

⁹ Sa' li kutan a'an tinrahob'tesiheb' ajwi' li neke'ok chi pisk'onb'il sa' rochoch li xyoseb' ut neke'xnujob'resi a'an rik'in elq' ut b'alaq'ik”.

¹⁰ Jo'ka'in xye li Qaawa': “Sa' li kutan a'an taa'ab'imanq xyaab' kuxej chi xtz'aamankil xtenq'ankileb' chalen toj sa' li Okeb'aal reheb' li kar. Japjo'qeb' re chi tz'uyink sa' li Ak' Na'ajej ut taa'ab'iiq xyaab'eb' li tzuul li yooqeb' chi uq'e'k.

¹¹ Yaab'anqex laa'ex li wankex taq'a, xb'aan naq te'kamq chixjunileb' laj k'ay ut te'sache'q chixjunileb' laj jalol ru tumin.

¹² “Sa' li kutan a'an tinxok linsaqenk ut tinpoqle li tenamit Jerusalén. Toja' naq tink'eheb' chi xtojb'al li xmaakeb' li k'ojk'ookeb' xch'ool ut sa yookeb' chi hilank, eb' li neke'yehok sa' xch'ooleb': «Li Qaawa' maak'a' naxb'aanu: chi moko li us chi moko li ink'a' us».

¹³ Jo'kan naq taa'elq'aaq li xb'ihomaleb' ut taajuk'manq li rochocheb'. Xe'yiib'ank ochoch, ab'an ink'a' te'wanq chisa'; xe'awk uub', ab'an ink'a' te'uk'aq b'iin”.

¹⁴ Xnach'ok chaq li xnimla kutankil li Qaawa'; ak xseeb'ank ut nach' chik wank. Naq taawulaq li kutan a'an, xiwajelaq li japok e: tixjap ajwi' re chi yaab'ak li jwal kaw rib'.

¹⁵ A'anaq xkutankil li josq'il, xkutankil li rahil ch'oolej ut rahilal, xkutankil li sachok ut juk'uk, xkutankil li aak'ab' ut li q'oqyink; muhaq ru li kutan a'an ut choqlaq ru,

¹⁶ xkutankil li tz'uyink ut xyaab'asinkil li tronpeet chirixeb' li kawub'resinb'il tenamit ut chirixeb' li xnajt xteramil ochoch.

¹⁷ Jo'ka'in xye li Qaawa': “Tinrahob'tesi xch'ooleb' li poyanam ut te'b'eeq sa' mutz'il, xb'aan naq xe'maakob'k chiwu. Taahoye'q li xkik'eleb' jo' li pojtz', ut li xtib'eleb' kama'aq aj chik li k'ot”.

¹⁸ Sa' xkutankil li xjosq'il li Qaawa', maak'a' taakoloq reheb' li poyanam, chi moko li plaat chi moko li oor, xb'aan naq chixjunil li ruuchich'och' taa'oso'q sa' xxamlel xjosq'il li Yos. Jo'k'ihaleb' li wankeb' junsut junrub'el choxa te'oso'q sa' junpaat.