Proverbios 9 - Q'eqchi Bible

Li chaab'il na'leb' ut li xmajelalil li seeb'al k'a'uxl

¹ Li chaab'il na'leb' xkab'la li rochoch ut xruutz'u'uji ru rik'in wuqub' chi oqech;

² xkamsiheb' li xul re li ninq'e ut xyeechi'i li chaab'il b'iin. Xkawresi li xmeex

³ ut xtaqlaheb' li xmoos ixq re xyeeb'al resil toj sa'atqeb' li xnajt teramil b'ool re li tenamit:

⁴ “Kimqex arin laa'ex li maak'a' eek'a'uxl. Chalqex laa'ex li maak'a' eena'leb'.

⁵ Wa'inqex wik'in ut uk'umaq linb'iin xink'uub'.

⁶ Kanab'omaq li xmajelalil eena'leb', ut taawanq eeyu'am; taaqehomaq xb'ehil li seeb'al k'a'uxl”.

⁷ Li naq'usuk re li q'etq'et, naxk'am chaq tz'eqtaanaak sa' xb'een; li naq'usuk re li ink'a' us xch'ool, junes hob'e'k tixb'oq chaq sa' xb'een.

⁸ Maaq'us li q'etq'et xb'aan naq xik' tatril; chaq'us li wank xna'leb', ut a'an tatxra.

⁹ Chatij li wank xna'leb', ut q'axal wi' chik tixtaw xkomon na'leb'; chatzol li tiik xch'ool, ut taanimanq li xk'a'uxl.

¹⁰ Li roxloq'inkil ru li Qaawa', a'an xtiklajik li chaab'il na'leb'; wi nakanaw ru Li nim xsantilal, a'an reetalil naq seeb' aak'a'uxl.

¹¹ Sa' ink'ab'a' laa'in taatiqmanq roq laayu'am ut taak'ihob'resimanq laakutan.

¹² Wi wank aana'leb', toxaayal xsahil; ab'an wi q'etq'etat, laa'at tattojoq re rik'in rahilal.

¹³ Li xmajelalil seeb'al k'a'uxl a'an chanchan jun li ixq aj molol aatin, jip ut maak'a' naxnaw.

¹⁴ Naxchunub' rib' chire li rochoch, sa' jun li na'ajej jwal najt xteram chiru li tenamit,

¹⁵ ut naxb'oqeb' laj numel b'e, eb' li yal tiik li xb'eheb':

¹⁶ “Kimqex arin laa'ex li maak'a' eek'a'uxl. K'ehomaq reetal laa'ex li maak'a' eena'leb':

¹⁷ Li uk'a' elq'anb'il, a'an jwal ki'; ut li wa nawa'mank sa' muqmu, a'an jwal sa”, chan reheb'.

¹⁸ Ab'anan eb' li yookeb' chi ab'ink ink'a' neke'xnaw naq li ochoch a'an, a'an xna'ajeb' li kamenaq, ut eb' li rula' wankeb' chik sa' xchamal li xb'alb'a.