Proverbios 6 - Q'eqchi Bible

Q'usuk chirix k'asok

¹ At walal ink'ajol, wi xatk'asok chirix laawas aawiitz'in; wi xasume xtojb'al li xk'as junaq ink'a' nakanaw ru;

² wi xaye laawaatin ut xab'ak' aawib' rik'in laayeechi'om,

³ maak'e aawib' chi chape'k, at walal, ut b'aanu a'in re xkolb'al aawib' chiru laawas aawiitz'in: ayu sa' rochoch, tz'aaman elajin chiru;

⁴ matwark ut mathilank toj reetal taayiib' ru laach'a'ajkilal.

⁵ Kol aawib' jo' naxb'aanu li yuk chiru li ch'imb', kama' naxb'aanu li xik'anel xul chiru li ra'al.

Laj q'em ut li sank

⁶ Laa'at li ink'a' nawulak chawu k'anjelak, il li sank, chak'e reetal chanru yo chi k'anjelak ut tzol aawib' rik'in.

⁷ Us ta maajun najolomink re ut maak'a' aj taqlanel chi moko aj eechal re,

⁸ ab'an sa' saq'ehil naxch'utub' li xtzekemq ut naxk'uula li xwa sa' xq'ehil li q'olok.

⁹ Ut laa'at li ink'a' nawulak chawu k'anjelak, toj jo'q'e sotsooqat, jo'q'e taa'ajq aawu sa' laawara?

¹⁰ Nakatwark junpaataq, nakatxiiqank; chirix chik a'an nakathilank chi moq'mo laatel.

¹¹ Ut maak'a' sa' aach'ool naq taachalq li neb'a'il, k'utaamil chawu li we'ej jo' junaq aj elq', jo' junaq aj b'eeninel rib'.

Li ink'a' us xch'ool

¹² Li ink'a' us xch'ool ut yib'ru xna'leb' junes tik'ti' na'elk chi xtz'uumal re;

¹³ naxmutz' jun li ru, yal naxkelo li roq naq nab'eek, nak'utb'esink rik'in ru'uj ruq'.

¹⁴ Yib'ru li xna'leb': junes maa'usilal wank sa' xch'ool ut junelik yo chi xyoob'ankil raaxiik'.

¹⁵ Jo'kan naq taanaq li rahilal sa' xb'een chi maak'a' sa' xch'ool; taa'oso'q chi junpaat, chi maak'a' chik xja'lenkil.

Li k'aru ink'a' nawulak chiru li Yos

¹⁶ Wank waqib' li na'leb', malaj wuqub', li ink'a' nawulak chiru li Yos ut xik' na'ile'k xb'aan chi junajwa:

¹⁷ li q'etq'etil, li tik'ti'ik, li kamsink poyanam maak'a'eb' xmaak,

¹⁸ li k'uub'ank maa'usilal, li xrahinkil ut ratawankil li ink'a' us,

¹⁹ li q'ab'ank sa' li raqleb'aal aatin ut li yoob'ank raaxiik' sa' xyanqeb' li tenamit.

Li muxuk sumlaak

²⁰ At walal ink'ajol, k'e sa' laach'ool li raatin ut li xq'usum laana' laayuwa'.

²¹ Chatz'iib'a sa' laawaanm ut chiwanq sa' laak'a'uxl jo' junaq chaab'il q'ol chakux laa'at.

²² A'an tk'amoq aab'e naq tatb'eeq; tatxk'aak'ale naq tatsotlaaq; ut taaseeraq'iq aawik'in naq taa'ajq aawu.

²³ Xb'aan naq li chaq'rab' ut li taqlahom, a'an jun lochlookil xam; li qatijb'al ut qaq'usb'al a'an xb'ehil li yu'am.

²⁴ A'an tatxkol chiru li ixq ink'a' us xch'ool, ut chiruheb' li b'alaq'il aatin naxye li ab'li ixq.

²⁵ Maak'e aawib' chi q'unb'esiik xb'aan li xch'ina'usal, chi moko chakanab' aawib' chi xb'alaq'i xb'aan li rilob'aal.

²⁶ Laj yumb'eet nak'ojlaak xch'ool yal rik'in li xwa; ab'an laj muxul sumlaak li k'aru naxsik', a'an xsachb'al laayu'am.

²⁷ Ma naru tab'i' xk'amb'al xam chire laach'ool chi ink'a' taak'atq laab'aatal?

²⁸ Ma naru tatb'eeq sa' xb'een ru xam chi ink'a' ta taak'at laawoq?

²⁹ Jo'kan ajwi' naxk'ul li naxch'ik rib' rik'in rixaqil li ras riitz'in: chixjunil li nach'e'ok re li ixq a'an, ink'a' taakuymanq li xmaak.

³⁰ Maajun natz'eqtaanank re junaq aj elq' wi na'elq'ak xb'aan xtz'okajik;

³¹ ab'an wi natawe'k chi elq'ak, tento tixk'e wuqub' wa chik xk'ihal li reeqaj, jo'wi' chixjunil li xjunkab'lal.

³² Ab'an li naxch'ik rib' rik'in junaq ab'li ixq, xjunes rib' naxsach li xyu'am.

³³ Tento tixkuy sak'e'k ut hob'e'k, ut xutaanal taakanaaq wi' chi junelik.

³⁴ Xb'aan naq li b'eelomej aj sowen, a'an chanchan li xam; ink'a' taakuyuq naq twulaq xkutankil li eeqajunk.

³⁵ Ink'a' tk'ojlaaq xch'ool rik'in k'a'aq re ru; us ta chixjunil li xb'ihomal li ruuchich'och' taak'ehe'q re cho'q reeqaj, ab'anan ink'a' tixk'ulub'an.