Proverbios 31 - Q'eqchi Bible

VII. XYEHOM LAJ LEMUEL (31,1-9)

¹ A'an a'in li raatin laj Lemuel, awab'ej re Masá, li kitzole'k wi' xb'aan li xna':

² At walal ink'ajol, li xatyo'laak wik'in, xsumenkilat lintij chiru li Yos, k'aru tinye aawe?

³ Maakaanob'resi aawu xb'aaneb' li ixq xb'aan naq xb'aaneb' a'an naab'aleb' li awab'ej xe'sachk xna'leb'.

⁴ At Lemuel, moko us ta naq eb' li awab'ej te'kalaaq chi moko naq li xjolomileb' li tenamit te'ruk' li ha' nakaltesink,

⁵ xb'aan naq wi neke'kalaak, nasachk li chaq'rab' sa' xch'ooleb' ut ink'a' chik neke'xkol li neb'a'.

⁶ K'e li ha' nakaltesink reheb' li ra sa' xch'ooleb' ut kamkeb' re.

⁷ Uk'aqeb'; chi jo'kan taasachq sa' xch'ooleb' li neb'a'il ut li rahilal yookeb' chi xk'ulb'al.

⁸ Chat-aatinaq chirixeb' li ink'a' naru te'xkol rib' xjuneseb' ut chakoleb' li maajun na'aatinak chirixeb'.

⁹ Aatinan chirixeb' ut raqon aatin sa' xb'eeneb' rik'in tiikilal; chakoleb' li neb'a' ut li kub'enaqeb' xwankil.

VIII. LI IXQ CHAAB'IL XNA'LEB' (31,10-31)

¹⁰ Jwal ch'a'aj xtawb'al junaq ixq chaab'il xna'leb'; q'axal loq' wi' chik chiru li lemtz'il q'ol.

¹¹ Li xsum'aatin, k'ojk'o xch'ool rik'in a'an, xb'aan naq maajun wa taaneb'a'o'q.

¹² Li ixq a'an naxb'aanu li us cho'q re li xsum'aatin, rajlal kutan, chiru chixjunil li xyu'am.

¹³ Naxsik' li tuuxnoq' ut li liin, ut chi anchal xch'ool natz'uluk.

¹⁴ Chanchan wi' xjukub' laj yakonel, li najt naxk'am chaq li chaab'il eechej.

¹⁵ Toj hik'ho nawakliik ut naxk'eheb' chi wa'ak li xkok'al, ut naxjek'i xk'anjeleb' li xmoos ixq.

¹⁶ Naxsik' ut naxloq' jun siiraq li ch'och', ut rik'in li xtumin naraw li x'uub'.

¹⁷ Chi anchal xch'ool na'ok chi k'anjelak, xb'aan naq q'axal kaw rib'.

¹⁸ Naril chi us li xk'anjel re naq us taa'elq, ut ink'a' nahilank chi k'anjelak chiru q'oqyink.

¹⁹ Naxq'in li xnoq' rik'ineb' li ruq'; naxkem ut naxb'ojeb' li xb'aatal.

²⁰ Junelik naxtenq'aheb' li neb'a' ut narileb' li wankeb' sa' rajb'al ru.

²¹ Ink'a' nak'oxlak chirix li ke, xb'aan naq ka'taheb' li raq' chixjunileb' sa' li xjunkab'al.

²² A'an ajwi' naxkem li risb' ut naxtiqib' rib' rik'in chaab'il t'ikr.

²³ Li xsum'aatin jwal nawno ru sa' li tenamit, naq nak'ojlaak sa' xyanqeb' li cheekel winq.

²⁴ Nakemok aq'ej ut k'aamal sa', ut naxk'ayi reheb' laj yakonel.

²⁵ Naxtiqib' rib' rik'in loq'al ut kawilal, ut ink'a' nak'oxlak chirix li kutan chaalel.

²⁶ Na'aatinak junes rik'in chaab'il na'leb', ut naxtijeb' li xkok'al rik'in rahok.

²⁷ Naxch'oolaniheb' li wankeb' sa' rochoch, ut ink'a' naxtzeka li k'aru ink'a' xk'anjela.

²⁸ Usilaatinanb'il xb'aaneb' li ralal xk'ajol, ut li xsum'aatin naxk'e xloq'al ut naxye re:

²⁹ “Naab'aleb' li ixq chaab'ileb' xch'ool, ab'an laa'at li q'axal chaab'il chiru chixjunileb', chan.

³⁰ Li chaab'ilal nab'alaq'ik ut li ch'ina'usal yal nanume'k; ab'an li ixq li naroxloq'i li Qaawa', a'an xk'ulub' xk'eeb'al xloq'al.

³¹ K'ehomaq xloq'al li k'anjel naxb'aanu, ut chisaho'q xch'ool chixjunileb' sa' li tenamit rik'in li xb'aanuhom.