Proverbios 30 - Q'eqchi Bible

VI. XYEHOM LAJ AGUR (30,1-33)

¹ A'an a'in li xyehom laj Agur, ralal laj Jaké, aj Masá. Laj Agur kiraatinaheb' laj Itiel ut laj Ukal chi jo'ka'in:

² Tz'aqal yaal naq laa'in jwal kaw injolom sa' xyanqeb' li maak'a' neke'xnaw; ut ink'a' ninnaw k'oxlak.

³ Ink'a' xintzol li chaab'il na'leb', chi moko ninnaw ani li Qaawa'.

⁴ Ani kitaqe'k sa' choxa ut kikub'e chaq wi' chik? Ani kixmoch'o li iq' sa' li ruq'? Ani kilanok re li ha' sa' t'ikr ut kixk'ojob' xnub'ajlil li ruuchich'och'? Ye we ani xk'ab'a' a'an ut ani xk'ab'a' li ralal.

⁵ Chixjunil li raatin li Yos puuxinb'il ru; li Qaawa' naxkoleb' li neke'xk'ojob' xch'ool rik'in.

⁶ Maak'e xb'een li raatin li Yos; mare anchal tatxch'iila ut tatxk'e cho'q aj tik'ti'.

⁷ Wiib' ajwi' li na'leb' xintz'aama aawe, at Qaawa', rub'elaj linkamik, ut maaram chiwu:

⁸ Minaak'e chi b'alaq'iik ut chi tik'ti'ik; maak'e inb'ihomal chi moko neb'a'il, ka'ajaq b'an wi' lintzekemq re rajlal kutan.

⁹ Mare anchal naq ak xinwa'ak ut xinnujak, tinye: “Ink'a' ninnaw ani li Yos”, cha'qin. Ut wi wanqin sa' neb'a'il, mare tin'ok chi elq'ak ut tink'e chi majewaak laak'ab'a'.

¹⁰ Maaq'ab'a junaq aj k'anjel chiru laj eechal re. Mare anchal tatxmajewa, ut taatoj rix laamaak.

¹¹ Wankeb' poyanam neke'xmajewa li xyuwa' ut ink'a' neke'xk'e xloq'al li xna'.

¹² Wankeb' li neke'xye naq maak'a'eb' xmaak, ab'an nujenaqeb' chi maa'usilal.

¹³ Wankeb' neke'xnimob'resi rib' ut yal sa' rix ruheb' neke'ril chixjunileb'.

¹⁴ Wankeb' ajwi' poyanam li wankeb' xq'esnal ch'iich' cho'q ruuch reheb', ut kok' q'esnal ch'iich' cho'q xkalam e, re xkamsinkileb' li kub'enaqeb' xwankil ut xsachb'aleb' chi junajwa li neb'a' sa' ruuchich'och'.

¹⁵ Li xul li natz'ub'uk kik' wankeb' wiib' li ral. Li jun naxk'ab'a'in: “K'e we”, ut li jun chik: “Twaj xkomon” xk'ab'a'. Oxib'eb' malaj kaahib'eb' li ink'a' neke'k'ojlaak xch'ool ut maajoq'e neke'xye: “Tz'aqalaq”.

¹⁶ A'aneb' li xmuqleb'aal kamenaq ut li xma'al ixq, li ch'och' li sa' junpaat naruk' li ha' ut li xam ink'a' nach'anaak chi sachok.

¹⁷ Li naxtz'eqtaana li xyuwa' ut ink'a' naxpaab' li xna', taa'isiiq xsa'eb' li ru xb'aaneb' li so'sol ut taat'upiiq li xtib'el xb'aaneb' li t'iw.

¹⁸ Wankeb' oxib' malaj kaahib' li na'leb' li nasachk inch'ool xb'aaneb' ut ink'a' nintaw xyaalal:

¹⁹ chanru xnawb'al li xnums li t'iw chiru li choxa, chanru xnawb'al li xnums li k'anti' chiru li pek, chanru xnawb'al li xnums li jukub' chiru li palaw ut chanru xnawb'al naq li winq xwank rik'in jun li ixq.

²⁰ Li ixq li naxmux li xsumlajik, nawank rik'in jalanil winq, na'atink ut naxye: “Maak'a' maak xinb'aanu”, chan.

²¹ Wank oxib' li na'leb' ink'a' ninkuy rilb'al, ut li xka nareek'asi li ruuchich'och':

²² li moosej na'ok chi awab'ejink, li maak'a' xna'leb' nanumwa'ak,

²³ li kanab'anb'il ixq nasumlaak wi' chik, ut li moos ixq nakanaak cho'q reeqaj laj eechal re.

²⁴ Wankeb' kaahib' paay li kok' xul sa' ruuchich'och' li q'axal wankeb' xna'leb' chiruheb' li wankeb' xna'leb':

²⁵ eb' li sank li moko kaweb' ta rib', ab'an neke'xk'uula xtzekemqeb' sa' li saq'ehil;

²⁶ eb' li yak li moko kaweb' ta, ut neke'wank sa' xjob'olaleb' li pek;

²⁷ eb' laj saak' li us ta maak'a' aj k'amol xb'eheb'; ab'an neke'b'eek chi tzol ut chi tustu ru;

²⁸ ut eb' li tolokok li naru xchapb'aleb' ut wankeb' ajwi' sa' rochoch li awab'ej.

²⁹ Wankeb' oxib' malaj kaahib' li ch'ina'us rilb'al naq neke'b'eek:

³⁰ li kaqkoj li jwal kaw rib' sa' xyanqeb' li xul ut maajun naxxiwa ru;

³¹ li tzo' kaxlan li q'axal q'etq'et, li teelom chib'aat ut li awab'ej li naxk'am xb'eheb' laj puub'.

³² Wi xb'aan aamemil xak'e aawankil ut xak'uub' maa'usilal chirixeb' jalan chik, k'oxla a'in:

³³ naq taayuule li xya'al xtu' li wakax, taasaso'q ru; wi taapitz' chi kaw laawu'uj, taawisi xkik'el; ut wi taachiq' xjosq'il jalan chik, raaxiik' toxaataw.