Proverbios 29 - Q'eqchi Bible

¹ Li winq li ink'a' nawulak chiru li q'use'k taasache'q ru chi junpaat ut chi junwaakaj.

² Naq neke'k'ihank li tiikeb' xch'ool, nake'saho'k eb' li poyanam; ab'an naq neke'taqlank li ink'a' useb' xna'leb', ra neke'xk'ul li tenamit.

³ Li naxra li chaab'il na'leb', naxk'e sa sa' xch'ool li xyuwa'; ut li nawank rik'ineb' laj yumb'eet, naxb'atz'unle li xtumin.

⁴ Naq li awab'ej nataqlank sa' tiikilal, naxk'ojob' xwankil li xtenamit; ab'an wi junes titz'ok tumin naxb'aanu, naxsach li xtenamit.

⁵ Li junelik na'aatinak chi chaab'il chirix li ramiiw, relik chi yaal naq yo xk'eeb'al jun ra'al re taat'ane'q chisa'.

⁶ Li maak li naxb'aanu li winq, a'an ajwi' nat'anok re; ab'an li tiik xch'ool sa wank ut sa nab'ichank.

⁷ Li tiik ru xyu'am naxk'e xch'ool chirix li xk'ulub'eb' li neb'a'; a'ut li ink'a' us xna'leb', maak'a' naraj wi'.

⁸ Eb' laj po'ol ch'oolej neke'xpo' xna'leb' li tenamit; a'ut li tiikeb' xch'ool neke'xch'anab' li ch'a'ajkilal.

⁹ Naq li wank xna'leb' na'ok sa' raaxiik' rik'in junaq li maak'a' xna'leb', us ta taajosq'o'q malaj taase'eeq, ab'an maak'a' taakanaaq wi'.

¹⁰ Eb' laj kamsinel ras riitz'in, xik' neke'ril li tiikeb' xch'ool; ab'an li tiikeb' xch'ool neke'raj wank rik'ineb'.

¹¹ Li maak'a' xna'leb' sa' junpaat najosq'o'k; ab'an li wank xna'leb' naxkuy rib'.

¹² Li awab'ej li napaab'ank tik'ti', naxpo' xna'leb' chixjunileb' laj k'anjel chiru.

¹³ Li neb'a' ut laj rahob'tesinel, chi xkab'ichaleb' neke'ilok sa' xk'ab'a' li Qaawa'.

¹⁴ Li awab'ej li naxjolomiheb' li neb'a' sa' tiikilal, k'ojk'o chi junajwa li x'awab'ejihom.

¹⁵ Li rapok chi tz'uum ut li q'usuk nak'ehok na'leb'; ab'an li ink'a' natije'k, naxk'ut xxutaan li xna'.

¹⁶ Naq neke'k'ihank li ink'a' useb' xna'leb', nak'ihank li maa'usilal; ab'an li tiikeb' xch'ool toxe'rileb' chi oso'k.

¹⁷ Tij laawalal ut sa tatwanq: a'an taak'ehoq xsahil laach'ool.

¹⁸ B'arwi' maak'a' propeet, eb' li tenamit ink'a' neke'xnaw k'aru te'xb'aanu. Us xaq reheb' li neke'xpaab' li xchaq'rab' li Yos.

¹⁹ Ink'a' naru xq'usb'al junaq moosej yal rik'in aatin, xb'aan naq naxtaw ru, ab'an ink'a' naxb'aanu.

²⁰ Jwal nim chik li woyb'enihom rik'in junaq li maak'a' xna'leb' chiru li qoyb'enihom rik'in li ink'a' naxk'oxla li k'aru naxye.

²¹ Wi numtajenaq nakara laamoos chalen sa' xkach'inal, moqon chik taaq'apliiq sa' aab'een.

²² Li sa' junpaat najosq'o'k, naxyoob' raaxiik'; ut laj q'etol chaq'rab' k'iila sut namaakob'k.

²³ Li q'etq'et aj winq taakub'siiq xwankil; a'ut li kub'enaq xwankil, taak'ehe'q xloq'al.

²⁴ Li na'okenk chirixeb' laj elq', ink'a' naxra rib', xb'aan naq, us ta taamajewaaq, ab'an ink'a' taajitoq re.

²⁵ Li naxiwak chiruheb' li winq, a'an naxsach rib'; ab'an li k'ojk'o xch'ool rik'in li Qaawa', maak'a' rahilal tixk'ul.

²⁶ Naab'aleb' neke'xsik' usilal rik'in li awab'ej; ab'an ka'ajwi' li Qaawa' nak'ehok li xk'ulub' li junjunq.

²⁷ Eb' li tiikeb' xch'ool xik' neke'ril li ink'a' useb' xna'leb'; ut li ink'a' useb' xch'ool xik' neke'ril li tiikeb' ru xyu'am.