Proverbios 28 - Q'eqchi Bible

¹ Li ink'a' us xna'leb' na'elelik, us ta maajun na'aanilasink re; ab'an li tiik xch'ool maak'a' naxxiwa, jo' li kaqkoj.

² Naq nanumtaak li q'etok chaq'rab' sa' li tenamit, neke'numtaak ajwi' laj jolominel; ab'an, wi li awab'ej wank xna'leb', li tenamit nak'ojlaak xch'ool ut kaw rib'.

³ Li neb'a' li naxtawasi li rech neb'a'il, a'an chanchan li kawil hab' nasachok li awimq.

⁴ Li naxtz'eqtaana li chaq'rab' nasaho'k xch'ool chirixeb' li ink'a' useb' xna'leb'; ab'an li tiik xch'ool xik' narileb'.

⁵ Eb' li ink'a' useb' xna'leb' ink'a' neke'xtaw ru li tiikilal; ab'an li neke'xsik' li Qaawa', neke'xtaw ru chixjunil.

⁶ Jwal us li neb'a' tiik xch'ool, chiru li b'ihom aj b'alaq'.

⁷ Li naxpaab' xchaq'rab' li Yos, a'an wank xna'leb'; ab'an li wank chi jo'maajo', a'an xxutaan li xyuwa'.

⁸ Li nak'ehok tumin chi to' ut terto li ral naxpatz', a'an nab'ihomo'k; ab'an li k'aru naxtamresi, tkanaaq cho'q re li na'uxtaanank ru li neb'a'.

⁹ Li ink'a' naxpaab' xchaq'rab' li Qaawa', ink'a' ajwi' nak'ule'k li xtij xb'aan li Yos.

¹⁰ Li nak'amok reheb' li chaab'ileb' xch'ool chi maakob'k, a'an ajwi' taat'ane'q sa' li xmaa'usilal. Ab'an eb' li tiikeb' ru xyu'am te'q'ajkamuuq chi chaab'il.

¹¹ Li b'ihom naxk'oxla naq wank xna'leb'; ab'an li neb'a' ut tiik xch'ool tixye ani li winq a'an.

¹² Naq li tiik xch'ool naxaqab'aak xwankil, nawank ninq'ehik; ab'an naq neke'numtaak li ink'a' useb' xna'leb', chixjunileb' neke'xmuq rib' xb'aaneb' xxiw.

¹³ Li naxmuq li xmaak, maajaruj tox'usaaq; a'ut li naxxooto xmaak ut ink'a' chik naxb'aanu, kuyb'ilaq li xmaak.

¹⁴ Li Yos narosob'tesi li napaab'ank chiru; ab'an li nakawuuk xch'ool sa' li maak, ra tixk'ul.

¹⁵ Jo' li kaqkoj naxjap re ut li tz'uqtz'un naxt'upi li xtzak, jo'kan naxb'aanu li maak'a' xna'leb' chi awab'ejink sa' xb'eeneb' li neb'a'.

¹⁶ Naq na'awab'ejink li ink'a' us xna'leb', nanumtaak li rahilal; ab'an li awab'ej li ink'a' narataw ru li b'ihomal, taanajto'q roq li xyu'am.

¹⁷ Meetenq'a li xkamsi ras riitz'in; a'an ink'a' taach'anaaq chi kamsink toj reetal sa' li xkamik.

¹⁸ Li winq tiik xch'ool, taakole'q; a'ut li ink'a' us xna'leb', taasache'q ru.

¹⁹ Li naxk'anjela li xch'och', yo'oon xtzekemq taawanq; a'ut li yal narahink, sa' neb'a'il tox'oso'q.

²⁰ Li tiik xch'ool, naab'aleb' neke'osob'tesink re; a'ut li nab'ihomo'k chi junpaat, toxtoj rix li xmaak.

²¹ Moko us ta xtiib'aleb' ru li poyanam; wankeb' li neke'xb'aanu a'in yal xb'aan junwa'al chi wa.

²² Li pix aj winq narataw b'ihomo'k chi junpaat, ut ink'a' naxnaw naq sa' neb'a'il tox'oso'q.

²³ Li naq'usuk chi yaal, sa' jun kutan q'axal chik taak'ehe'q xloq'al chiru li naxye q'unil aatin, ab'anan yal sa' b'alaq'.

²⁴ Li narelq'a k'a'aq ru re li xna' xyuwa' ut naxye naq moko maak ta, a'an xkomoneb' li maa'us aj winq.

²⁵ Li naxrahi ru li tumin, nayoob'ank raaxiik'; ab'an li k'ojk'o xch'ool rik'in li Qaawa', us taa'elq.

²⁶ Li naxkawu xch'ool xjunes rib', a'an maak'a' xna'leb'; ab'an li nab'eresiik xyu'am xb'aan li chaab'il na'leb', a'an tixkol rib'.

²⁷ Li naruxtaanaheb' li neb'a', maak'a' taalajq chiru; ab'an li ink'a' naxtenq'aheb', naab'al li majewaak tixk'ul.

²⁸ Naq na'awab'ejink li ink'a' us xna'leb', chixjunileb' neke'xmuq rib' xb'aaneb' xxiw; ab'an naq nach'anaak chi awab'ejink, sa chik wankeb' li tiikeb' xch'ool.