Proverbios 25 - Q'eqchi Bible

V. WANKEB' CHIK XKOMON LI XYEHOM LAJ SALOMÓN (25,1—29,27)

¹ Eb' li aatin a'in yeeb'il ajwi' xb'aan laj Salomón, ut tusb'ileb' xb'aaneb' laj k'anjel chiru laj Esekías, li awab'ej re Judá.

² Xloq'al li Yos, a'an xk'uulankil li xk'a'uxl; ab'an xloq'al li winq xtawb'al ru li k'aru muqmu.

³ Li xteram li choxa, li xchamal li ruuchich'och' ut li xk'a'uxeb' li awab'ej: maa'ani natawok ru.

⁴ Wi taa'isiiq li xq'olel li plaat, laj tenol ch'iich' tixyiib' jun chaab'il sek'.

⁵ Chawisiiq li ink'a' us xna'leb' chi k'anjelak chiru li awab'ej, ut taak'ojlaaq li x'awab'ejihom chi junajwa sa' tiikilal.

⁶ Maanimob'resi laawankil chiru li awab'ej, chi moko chatk'ojlaaq sa' xyanqeb' li xninqal ru winq:

⁷ jwal us naq li awab'ej tixye aawe: “Taqen chaq arin”, cha'aq, chiru naq taak'ute'q aaxutaan chiruheb' li ninqeb' xwankil. Wi wank k'aru xawil rik'in laawu,

⁸ matxik sa' aanil chi jitok sa' raqleb'aal aatin, xb'aan naq mare jalan chik toxch'olob'anq li yaal ut laa'at ink'a' chik taanaw k'aru taab'aanu.

⁹ Kol aawib' chiru li najitok aawe, ab'an maapatz' jalan chik aawas aawiitz'in.

¹⁰ Mare anchal tat-ab'iiq xb'aan jalan chik ut tatxk'e sa' xutaan, ut maak'a' chik k'aru taab'aanu chirix a'an.

¹¹ Li aatin nayeemank tz'aqal sa' xq'ehil, a'an chanchan li ki'il q'een sa' junaq plaatil sek'.

¹² Jo' junaq matq'ab' oor ut junaq chaab'il q'ol, jo'kan li chaab'il q'usuk cho'q re li naxkuy rab'inkil.

¹³ Jo' xkehal li ratz'am ke sa' xq'ehil, jo'kan tz'aqal li taql chaab'il xch'ool cho'q re li ani xtaqlank re.

¹⁴ Jo' li choql ut li iq' chi maak'a' hab' chiru, jo'kaneb' li neke'xye naq te'sihinq, ab'an maak'a' neke'xk'e.

¹⁵ Li ani wank xkuyum, naxtuulanob'resi laj raqol aatin; ut li na'aatinak sa' q'unil, naxchup li josq'il.

¹⁶ Wi taataw xya'al kab', ka'ajwi' tz'aqalaj li taatzeka. Mare anchal taayib'oq sa' laach'ool ut yal taaxa'wa ajwi'.

¹⁷ Maawula'ani laawamiiw chi kok'aq xsa', re naq ink'a' taatitz' chawilb'al ut tatxtz'eqtaana sa' jun kutan.

¹⁸ Li naxq'ab'a li ramiiw, a'an chanchan li t'ojleb', li q'esnal ch'iich' ut li simaj jutz' ru'uj.

¹⁹ Wi nakak'ojob' aach'ool chirix junaq aj b'alaq' sa' xhonalil li ch'a'ajkilal, a'an jo' tzekank naq wank li xul e malaj jo' b'eek naq toqol junaq oqej.

²⁰ Matb'ichank cho'q re junaq li ra sa xch'ool: a'an chanchan k'ehok atz'aminb'il ha' sa' tiq'ilal malaj jo' risinkil li aq'ej naq yo li ke.

²¹ Wi li xik' na'ilok aawe yo xtz'okajik, k'e chi wa'ak; ut wi nachaqik re, k'e ruk'a'.

²² Chi jo'kan taakaqo'q li xnaq' ru xb'aan xxutaan, ut li Qaawa' tatxq'ajkamu.

²³ Li iq' nachalk chaq sa' releb'l iq' naxk'am chaq li hab'. Jo'kan ajwi' li b'alaq'il aatin nayoob'ank josq'il.

²⁴ Jwal us li wank sa' kuukil ochoch chiru li wank sa' chaab'il kab'l rochb'een junaq josq' aj ixq.

²⁵ Jo' li keelha' cho'q re li nachaqik re, jo'kan li chaab'il esil nachalk chaq chi najt.

²⁶ Jo' li ha' sulul ru malaj tz'ajn ru, jo'kan li tiik ru xyu'am naq nawiib'ank xch'ool chiru laj maak.

²⁷ Moko us ta ruk'b'al naab'al li xya'al kab' chi moko li xsik'b'al naab'al li loq'al.

²⁸ Li winq li ink'a' naxkuy rib', a'an chanchan junaq tenamit maak'a' xsuttz'akil re xkolb'al rib'.