Proverbios 24 - Q'eqchi Bible

- 19 -

¹ Maarahi ruheb' li ink'a' useb' xna'leb', chi moko taawochb'eeniheb',

² xb'aan naq junes rahilal neke'xk'oxla xb'aanunkil, ut junes chirix xb'aanunkil raaxiik' neke'aatinak.

- 20 -

³ Rik'in chaab'il na'leb' na'uxk li kab'lak ut rik'in seeb'al k'a'uxl nak'ehe'k li rub'elankil.

⁴ Rik'in naab'al li nawom na'uutz'u'ujiik xsa' li rochoch, jo' ajwi' nanujak rik'in li k'a'aq re ru terto xtz'aq ut jwal ch'ina'us rilb'al.

- 21 -

⁵ Jwal us li winq wank xna'leb' chiru li kaw rib'; ut q'axal loq' li seeb' xk'a'uxl chiru li nim xwankil.

⁶ Xb'aan naq li yalok, us na'elk naq k'oxlanb'il chi us, ut ani taaraj q'axok u, tento xb'enwa taak'ehe'q xna'leb'.

- 22 -

⁷ Li maak'a' xna'leb' ink'a' naxnaw k'aru tixye sa' li raqleb'aal aatin, xb'aan naq maak'a' li chaab'il na'leb' rik'in.

- 23 -

⁸ Li junes maa'usilal naxk'oxla, aj sik'ol ch'a'ajkilal nayeemank re.

⁹ Li jip junes xb'aanunkil li maak naxk'oxla, ut eb' li poyanam xik' neke'ril laj hob'onel.

- 24 -

¹⁰ Li nach'inank xch'ool naq wank sa' ch'a'ajkilal, naraj naxye naq moko kaw ta xch'ool.

- 25 -

¹¹ Kol li xteneb'aak kamk sa' xb'een, ut ach'ab' li ak ok re xkamsinkil.

¹² Us ta taaye: “Maak'a' ninnaw chirix a'an”, li Yos li natz'ilok rix li ch'oolej naxtaw xyaalal; Li na'ilok re laawaanm tixnaw a'an ut tixtoj jo' chanru li xb'aanuhom li junjunq.

- 26 -

¹³ At walal ink'ajol, chawuk'aq li xya'al kab' sa' li xsok, xb'aan naq jwal sa li xki'al.

¹⁴ Jo'kanaq xsahil cho'q aawe li chaab'il na'leb'. Wi nakataw, sa tatwanq ut taatz'aqloq ru laawoyb'enihom.

- 27 -

¹⁵ At yib'ru aana'leb', maak'uub' rahilal re li tiik xch'ool, ut maajuk' li xjunkab'al nahilank wi'.

¹⁶ Us ta wuqub' sut nat'ane'k li tiik xch'ool, ab'an nawakliik wi' chik; a'ut li ink'a' useb' xna'leb', ra toxe'oso'q wi'.

- 28 -

¹⁷ Matsaho'k naq taat'ane'q li xik' na'ilok aawe, chi moko tatninq'ehiq xb'aan li xrahilal.

¹⁸ Mare anchal li Qaawa' moko taawulaq ta chiru rilb'al a'an, ut sa' aab'een chik taachalq li xjosq'il.

- 29 -

¹⁹ Matjosq'o'k xb'aaneb' li ink'a' useb' xna'leb', chi moko charahi ru li xmaa'usilaleb'.

²⁰ Xb'aan naq li ink'a' useb' xch'ool, ra toxe'oso'q wi', ut sa' junpaat te'oso'q jo' naq nachupk junaq saqenk.

- 30 -

²¹ At walal ink'ajol, chawoxloq'i li Yos ut li awab'ej, ut maajunaji aawib' rik'ineb' laj q'etol aatin,

²² xb'aan naq te'oso'q chi junpaat, ut maajun nanawok re li rahilal taak'ehe'q sa' xb'eeneb' xb'aan li Qaawa' ut li awab'ej.

IV. WANKEB' CHIK XKOMON LI XYEHOMEB' LI WANKEB' XNA'LEB' (24,23-34)

²³ Eb' li aatin a'in yeeb'il ajwi' xb'aaneb' li wankeb' xna'leb': Moko us ta xtiib'al ru eb' li poyanam sa' li raqleb'aal aatin.

²⁴ Li naxye re laj maak: “Laa'at maak'a' aamaak”, cha'aq, majewanb'ilaq xb'aaneb' li poyanam ut tz'eqtaananb'ilaq xb'aaneb' li tenamit.

²⁵ A'ut li naraqok aatin sa' xb'een laj maak, sa ilb'ilaq ut osob'tesinb'ilaq xb'aaneb' li tenamit.

²⁶ Li nasumenk sa' xyaalal, chanchan li nak'ehok sahil ch'oolej.

²⁷ Kawresi laak'anjel chirix kab'l ut ch'oolani laak'aleb'aal; ut moqon chik taayiib' laawochoch.

²⁸ Maaye tik'ti' chi moko q'ab'anb'il aatin chirix laawas aawiitz'in.

²⁹ Maaye: “Tweeqaju li rahilal jo' li x'uxmank we”.

³⁰ Sa' jun kutan xinnume'k chaq sa' li xk'aleb'aal ut li rawimq uub' li maak'a' xna'leb' ut aj q'em.

³¹ Ut xwil naq nujenaq chi k'ix li xk'aleb'aal, naab'al li pajl sa' li awimq, jo' ajwi' ak xe't'anje'k li pek sutsu wi' li na'ajej.

³² Naq xwil a'an, xink'uula sa' inch'ool; xink'oxla rix ut xintaw inna'leb':

³³ Wi tatwark b'ayaq malaj tathilanq ut taamoq'ob' aawib',

³⁴ tat-oso'q sa' xnimal neb'a'il; ut taachalq li we'ej sa' aab'een jo' naq nachalk junaq aj elq'.