Proverbios 20 - Q'eqchi Bible

¹ Li ha' li nakaltesink napo'ok na'leb'; li nakalaak nakaano'k ru ut nasachk xna'leb': maajoq'e tixtaw xchaab'il na'leb'.

² Naq li awab'ej najosq'o'k, naxjap re jo' li kaqkoj; li ani nayoob'ank xjosq'il xiw xiw wank li xyu'am.

³ Li maak'a' xna'leb' naxch'ik rib' sa' raaxiik'; ab'an li narisi rib' chisa', xk'ulub' naq taak'eemanq xloq'al.

⁴ Laj q'em ink'a' na'awk sa' xq'ehil li awk; ut sa' xq'ehil li q'olok, nasik'ok, ab'an maak'a' naxtaw.

⁵ Li xk'a'uxl li winq, a'an kama' li chamal ha'; ab'an li seeb' xch'ool, naxtaw ru.

⁶ Naab'aleb' neke'xye naq chaab'ileb'; ab'an ink'a' natawmank junaq tiik xch'ool.

⁷ Us xaq reheb' li ralal xk'ajol li winq li kiwank sa' tiikilal ut chaab'ilal.

⁸ Naq li awab'ej nak'ojlaak sa' li raqleb'aal aatin, sa' junpaat naxtaw ani wank xmaak.

⁹ Maajun truuq tixye: “Maak'a' inmaak; relik chi yaal naq saq ru linch'ool”.

¹⁰ Rajom li Yos naq tiikaq laach'ool: li Qaawa' xik' narileb' li neke'b'isok chi ink'a' tz'aqal.

¹¹ Rik'in li naxb'aanu li saaj al nak'utunk ma chaab'il ut tiikaq li xch'ool.

¹² Li xikej, a'an re ab'ink, ut li xsa' uhej re ilok: chi xkab'ichaleb' xyoob'tesihom li Qaawa'.

¹³ Mixik aach'ool chi wark, re naq ink'a' tatneb'a'o'q; k'e b'an aach'ool chi k'anjelak, ut taawanq aatzekemq.

¹⁴ “Ink'a' us laak'ay”, chan laj loq'onel; ab'an naq naxik, nasaho'k sa' xch'ool rik'in li xloq'om.

¹⁵ Wank li oor ut naab'al li chaab'il q'ol; ab'an q'axal loq' wi' chik li chaab'il na'leb'.

¹⁶ Li xk'asok chirix li ink'a' naxnaw ru, maq'omaq li raq' chiru, ut kanaaq cho'q ruuchil li xk'asok.

¹⁷ Li natzekank li elq'anb'il wa sa nareek'a sa' xtiklajik; ab'an sa' roso'jik ch'och' aj chik tixlow.

¹⁸ Naq k'uub'anb'il chi us junaq k'anjel, us na'elk. Matxik chi yalok wi ink'a' xak'oxla chi us.

¹⁹ Li nawulak chiru molok aatin, maajun li na'leb' naxk'uula chi muqmu; jo'kan naq maawochb'eeniheb' laj tik'ti'.

²⁰ Li naxmajewa li xna' xyuwa', jwal ra tixk'ul naq taakamq: taaxik sa' jun na'ajej q'axal q'oqyinkil ru.

²¹ Li nab'ihomo'k chi junpaat, ink'a' tox'osob'tesiiq moqon.

²² Maak'oxla reeqajunkil li rahilal xak'ul. K'ojob' aach'ool rik'in li Yos, ut A'an taakoloq aawe.

²³ Li Qaawa' xik' naril li b'isleb' ink'a' tz'aqal: naq wank jun b'isleb' re loq'ok ut jalan chik re k'ayink.

²⁴ Li Qaawa' nak'utuk xb'e li junjunq. Maajun naxnaw xjunes b'ar yo chi xik.

²⁵ Xiw xiw xyeechi'inkil junaq mayej chiru li Yos chi junpaat, ut moqon ink'a' taawaj xk'eeb'al.

²⁶ Naq li awab'ej wank xna'leb', naraanilasiheb' li ink'a' useb' xch'ool ut naxsach ruheb' chi junwaakaj.

²⁷ Li musiq'ej li wank qik'in, a'an xsaqenk li Qaawa', li naxsik'i jo'ch'inal jo'nimal wank sa' qach'ool.

²⁸ Li rahok ut li uxtaanank nak'aak'alenk re li awab'ej; xaqxooq xwankil chi kaw wi chaab'il ut tiik xch'ool li awab'ej.

²⁹ Li xloq'aleb' li saaj poyanam a'an li xkawilaleb'; li xkorooneb' li ak cheekeb' a'an li xchaab'il yu'ameb'.

³⁰ Li rahob'tesiik naxb'an li maa'usilal, ut li rahilal naxk'irtasi li ch'oolej toj sa' xchamal.