Proverbios 2 - Q'eqchi Bible

Li nokoorusila wi' li chaab'il na'leb'

¹ At walal ink'ajol, chak'ulub'an li waatin ut chak'uula sa' laach'ool lintaqlahom;

² k'e aach'ool chi rab'inkil li choxahil na'leb' ut xtawb'al ru li chaab'il k'a'uxl.

³ Chatz'aama ut chawelaji li seeb'al k'a'uxl;

⁴ chasik' a'an jo' nasik'mank li tumin, ut k'e aach'ool chirix jo' nasik'e'k li b'ihomal.

⁵ Chi jo'kan taataw xyaalal li roxloq'inkil li Qaawa' jo' ajwi' taanaw ru A'an chi yaal.

⁶ Xb'aan naq a' li Qaawa' nak'ehok re li chaab'il k'a'uxl; rik'in A'an nachalk li nawok ut li na'leb'ak.

⁷ Li Yos naxtenq'a ut naxk'aak'ale li nawank sa' tiikilal ut chaab'ilal;

⁸ naril li xyu'ameb' li tiikeb' xch'ool ut naxkoleb' li neke'paab'ank chiru.

⁹ Taanaw ajwi' xyaalal li tiikil ch'oolej ut li yaal, ut taataw ru k'aru li chaab'ilal.

¹⁰ Xb'aan naq toxaataw li choxahil na'leb' ut taayal xsahil li nawok.

¹¹ Li seeb'al k'a'uxl ut li chaab'il nawok tatxk'aak'ale ut tatxkol,

¹² tatrisi sa' li ink'a' usil b'e ut tatxkol chiruheb' laj b'alaq',

¹³ chiruheb' li xe'xkanab' li chaab'il b'e ut xe'xk'am xb'ehil li q'oqyink,

¹⁴ a'eb' li neke'saho'k xch'ool chi xb'aanunkil li ink'a' us ut k'ojk'o xch'ooleb' sa' li maa'usilal,

¹⁵ eb' li ink'a' neke'b'eek sa' tiikilal ut neke'sachje'k sa' li xb'eheb'.

¹⁶ Tatxkol ajwi' chiru li rixaqil li junchik li naq'unb'esink rik'in q'unil aatin:

¹⁷ naxtz'eqtaana li xsum'aatin sumsu wi' chalen sa' xsaajilal ut naxtz'eq chirix xch'ool li xsumwank rik'in li xYos.

¹⁸ Li b'e li naxik sa' rochoch li ixq a'an, nak'amok sa' li kamk, sa' xna'ajeb' li kamenaq.

¹⁹ Eb' li neke'xik aran, ink'a' chik neke'sutq'iik chaq, chi moko toxe'xtaw xb'ehil li yu'am.

²⁰ A'ut laa'at, at walal, chataaqe xb'e eb' li chaab'ileb' xch'ool, ut wanqat sa' tiikilal.

²¹ Xb'aan naq ka'ajwi' li tiikeb' xch'ool te'wanq sa' li ch'och' a'in, ut te'kanaaq arin chi junelik.

²² A'ut eb' li ink'a' useb' xna'leb' isinb'ilaqeb' sa' li na'ajej a'in; eb' laj b'alaq' te'sachmanq chi junwaakaj.