Proverbios 13 - Q'eqchi Bible

¹ Li alalb'ej chaab'il xna'leb' naxpaab' li xyuwa'; a'ut li kaw xjolom ink'a' naxk'e sa' xch'ool li xq'usb'al.

² Li junjunq tixk'ul xq'ajkamunkil xb'aan li xyehom; a'ut eb' laj b'alaq' nasemsotk xch'ooleb' chirix li raaxiik'.

³ Li naxk'e reetal li k'aru naxye, yo chi xkolb'al li xyu'am; a'ut li k'ajo' naxye, xjunes naxsach rib'.

⁴ Laj q'em narahink ut maak'a' naxtaw; a'ut li seeb'eb' chi k'anjelak, sa' neke'wank.

⁵ Li tiik xch'ool xik' naril li tik'ti'; li ink'a' us xna'leb' xik' na'ile'k ut xutaanal na'elk.

⁶ Li tiikilal naxkol li winq maak'a' xmaak; li maa'usilal naxsach laj maak.

⁷ Wankeb' neke'yehok naq b'ihomeb', ut maak'a' nayo'laak reheb'; ut wankeb' chik neke'yehok naq neb'a'eb', ut maak'a' namajelo'k reheb'.

⁸ Wankeb' li neke'xkol rix li xyu'ameb' rik'in li b'ihomal; ab'an eb' li neb'a' maak'a' nach'i'ch'i'ink reheb'.

⁹ Li xyu'ameb' li tiikeb' xch'ool chanchan jun lochlookil saqenk; a'ut li ink'a' useb' xna'leb' chanchaneb' jun saqenk chupchu.

¹⁰ Li q'etq'etil junes raaxiik' naxyoob'; a'ut li chaab'il k'a'uxl wank rik'ineb' li neke'xkub'si xwankil.

¹¹ Li b'ihomal li natawmank chi junpaat, sa' junpaat taa'oso'q; li ani naxch'utub' li xtumin chi timil timil, taab'ihomo'q.

¹² Li ink'a' naxk'ul li k'aru naroyb'eni, naraho'k xch'ool. Ab'an k'ajo' li sahil ch'oolej naq naqak'ul li qoyb'enihom!

¹³ Ra tixk'ul li naq'etok aatin; li ani naxpaab' li xchaq'rab'inkil, taaq'ajkamuuq.

¹⁴ Li xk'utum li ani wank xna'leb', a'an yu'am ut nakolok chiru li kamk.

¹⁵ Li nak'ehok na'leb', taak'ehe'q xloq'al; a'ut eb' laj b'alaq' ink'a' us te'elq.

¹⁶ Li wank xna'leb', toj naxk'oxla rix li naxb'aanu; a'ut li maak'a' xna'leb' naxk'ut li xmemil.

¹⁷ Laj yehol esil li ink'a' us xna'leb' nayoob'ank raaxiik'; ab'an wi tiik xch'ool laataql, nakatrisi sa' li ch'a'ajkilal.

¹⁸ Xutaanal ut neb'a'il tixtaw li ink'a' naraj q'use'k; a'ut li naxk'e sa' xch'ool li tijb'al, taak'ehe'q xloq'al.

¹⁹ K'ajo' li sahil ch'oolej naq naqak'ul li qoyb'enihom! Eb' li maak'a' xna'leb' ink'a' neke'raj xkanab'ankil li ink'a' us.

²⁰ Li narochb'eeniheb' li chaab'ileb' xna'leb', tixtaw xna'leb'; ab'an li nawank rik'ineb' li jip, taasachq chi junwaakaj.

²¹ Laj maak ink'a' nakanab'aak xb'aan li rahilal; a'ut li chaab'il xna'leb' naq'ajkamuuk xb'aan li usilal.

²² Li winq chaab'il naxkanab' x'erens eb' li ralal xk'ajol; a'ut li xb'ihomal laj maak a' chik li tiik xch'ool taa'eechaninq re.

²³ Sa' li xk'aleb'aal li neb'a' na'elk naab'al li tzekemq; ab'an wi maak'a' li tiikilal, taasachq chixjunil.

²⁴ Li ink'a' naxtij li ralal, ink'a' naxra; li naxra li ralal, naxk'e xch'ool chi xtijb'al.

²⁵ Li winq chaab'il sa natzekank; a'ut li ink'a' us xna'leb', ink'a' nanujak.